លោក សុខ កុយ មេភូមិទួលប្រាសាទ បានមានប្រសាសន៍ថា កាលពីវេលាម៉ោង ៩:៣០នាទី ព្រឹកថ្ងៃច័ន្ទ ទី១៨ ខែមករា ពលទាហានថៃចំនួន ១៥នាក់បានធ្វើដំណើររំលោភចូលក្នុងទឹកដីខ្មែរ តែត្រូវកងការពារព្រំដែនរបស់រដ្ឋាភិបាលខ្មែរបណ្តេញឲ្យចាកចេញទៅវិញ។
លោក សុខ កុយ បានបញ្ជាក់ថា ៖ «វាចូលមក ១៥នាក់ ក្នុងលក្ខណៈវាចូលមកហ្នឹងគឺវាចង់ទំនាក់ទំនងជាមួយទ័ពឈរជើងយើងហ្នឹង។ វាថា សុំធ្វើ បេសកកម្មរួមគ្នា ប៉ុន្តែវាធ្វើហ្នឹង វាចង់ធ្វើនៅដីយើង»។
លោក ឈូក អាង មេបញ្ជាការវរសេនាតូចការពារព្រំដែន ៩១១ បានមានប្រសាសន៍ថា កងទាហានថៃទាំងនោះត្រូវបានកម្លាំងការពារព្រំដែនរបស់លោកបណ្តេញឲ្យត្រឡប់ចូលទឹកដីថៃវិញ។
លោក ឈូក អាង បានបញ្ជាក់ថា ទាហានថៃទាំងនោះបានឆ្លងរំលោភចូលទឹកដីខ្មែរក្នុងគោលបំណងដើរល្បាតតាមព្រំដែនក្នុងទឹកដីខ្មែរទៅពិនិត្យមើលបង្គោលសីមាលេខ៤៨។
លោក ឈូក អាង បានមានប្រសាសន៍ថា ៖ «ខាងទ័ពគេហ្នឹង គេប្រុងទៅមើលបង្គោលសីមាលេខ៤៨ ប៉ុន្តែយើងមិនឲ្យទៅ យើងឲ្យវាទៅក្រោយវិញទៅ។ ខាងយើង យើងមិនអនុញ្ញាតឲ្យចូល ឲ្យទៅវិញទៅ!»។
ក្រុមអ្នកភូមិខ្មែរបានថ្លែងថា ភាគីថៃម្តងហើយម្តងទៀតបានធ្វើសកម្មភាពរំលោភចូលក្នុងទឹកដីខ្មែរ ដូចជាការបញ្ជាយន្តហោះហោះរំលោភចូលទឹកដីខ្មែរឈ្លបយកការណ៍នៅតាមបណ្តោយព្រំដែនក្នុងខេត្តបន្ទាយមានជ័យ និងខេត្តប៉ៃលិន ជាច្រើនលើកច្រើនសា។
លោកឧត្តមសេនីយ៍ត្រី ប៉ុល ស៊ីនួន នាយរងទីចាត់ការការពារព្រំដែន និងជាប្រធានការិយាល័យទំនាក់ទំនងព្រំដែនកម្ពុជា-ថៃ បានមានប្រសាសន៍ថា កងទាហានថៃធ្វើដូច្នេះគឺជារឿងខុសច្បាប់។ លោកចោទថា ថៃកំពុងរំលោភលើកិច្ចព្រមព្រៀងដែលធ្លាប់មានជាមួយកម្ពុជានាពេលកន្លងមក។
លោកឧត្តមសេនីយ៍ត្រី ប៉ុល ស៊ីនួន បានថ្លែងថា ៖ «តាមធម្មតាល្បាតយើងត្រូវដើរម្ខាងម្នាក់ទេ... ថៃគេដើរល្បាតខាងថៃ ខ្មែរគេដើរល្បាតខាងខ្មែរ មានពេលវេលាកំណត់ កម្លាំងប៉ុន្មាន ខាងថៃប៉ុន្មាន ខ្មែរប៉ុន្មាន ខាងណោះមានអាវុធប៉ុន្មានដើម ខាងណេះមានអាវុធប៉ុន្មានដើម។ ល្បាតរួមគ្នា មិនមែនមកល្បាតក្នុងដីខ្មែរទេ!»។
លោកបន្តថា ការិយាល័យទំនាក់ទំនងព្រំដែនខ្មែរ-ថៃកំពុងធ្វើការពិនិត្យឡើងវិញជាមួយភាគីថៃចំពោះការដែលទាហានថៃទាំង ១៥នាក់ប្រដាប់ដោយអាវុធឆ្លងដែនរំលោភចូលដីខ្មែរនេះ។
ក្រោយពីមានការរំលោភឈ្លានពានពីសំណាក់កងទ័ពថៃចូលទៅកាន់តំបន់ប្រាសាទព្រះវិហារកាលពីថ្ងៃទី១៥ ខែកក្កដា ឆ្នាំ២០០៨ រហូតដល់មានការផ្ទុះអាវុធរួចមក គេសង្កេតឃើញថា ភាគីថៃនៅបន្តធ្វើសកម្មភាពរំលោភចូលទឹកដីខ្មែរជាបន្តបន្ទាប់ ដូចជានៅតាមបណ្តោយព្រំដែនខេត្តបន្ទាយមានជ័យ ប៉ៃលិន និងបាត់ដំបង៕