ប្រភពបានឲ្យដឹងថា លោក ហ្វិន បា កំពុងតែជាប់ឃុំខ្លួននៅក្នុងគុក នៅខេត្តឃ្លាំង ដោយគេមិនអនុញ្ញាតឲ្យក្រុមគ្រួសារចូលសួរសុខទុក្ខទេ។
ស្ត្រីខ្មែរកម្ពុជាក្រោមម្នាក់នៅក្នុងស្រុកបឹងសន្សា ខេត្តឃ្លាំង ប្រទេសវៀតណាម ទឹកដីខែ្មរកម្ពុជាក្រោម ដែលធ្លាប់បានចូលរួមតវ៉ាទាមទារដីធ្លីកន្លងមកជាមួយលោក ហ្វិន បា បានថែ្លងប្រាប់វិទ្យុអាស៊ីសេរីតាមទូរស័ព្ទមកថា ៖ «ហ្វិន បា គេកាត់ទោសពីម្សិលមិញ (១៩ មីនា) រួចហើយ។ ខ្ញុំធ្លាប់ដើរទៅប្ដឹងរឿងទឹកដីជាមួយ ហ្វិន បា ជាមិត្តភក្ដិស្គាល់គ្នា ទៅជួប»។
ប្រជាពលរដ្ឋខ្មែរកម្ពុជាក្រោមម្នាក់ទៀតនៅខេត្តអានយ៉ាង ប្រទេសវៀតណាម ទឹកដីខ្មែរកម្ពុជាក្រោម បានថែ្លងថា ៖ «សោកស្ដាយដែរ ព្រោះថា យើងខំធ្វើអស់ដើមអស់ចុងមួយគំនរ ហើយគេយកអស់អ៊ីចឹងធ្វើម៉េចទៅ? ទាមទារឲ្យដោះលែងវិញ បើគេមិនឲ្យជួបសោះអ៊ីចឹង បើសិនជាគេធ្វើបាបក៏គ្មាននរណាដឹងដែរ»។
យោងតាមសេចក្ដីប្រកាសព័ត៌មានពីសហព័ន្ធខ្មែរកម្ពុជាក្រោម ប្រចាំនៅក្នុងប្រទេសកម្ពុជា ដែលវិទ្យុអាស៊ីសេរីទទួលបាននៅថ្ងៃសៅរ៍នេះ លោក ហ្វិន បា បានរងការចាប់ខ្លូនដោយនគរបាលវៀតណាម កាលពីខែឧសភា ឆ្នាំ២០០៩ កន្លងទៅ ដាក់ក្នុងពន្ធនាគារខេត្តឃ្លាំង ដោយបានបង្អត់អាហារ កាត់សក់ បង្អាប់កិត្តិយស រហូតដល់តុលាការបើកការកាត់ទោស កាលពីថៃ្ងទី១៩ ខែមីនា កន្លងទៅថ្មីៗនេះ ក្រោមមាត្រាទី១០៤ និងមាត្រាទី២៥០ នៃច្បាប់រដ្ឋធម្មនុញ្ញប្រទេសវៀតណាម ដោយសារតែលោកបាននិយាយប្រាប់វិទ្យុអាស៊ីសេរី បំផ្លើសការពិត ប៉ះពាល់ដល់កិត្តិយសកម្មាភិបាលវៀតណាម។
ព្រះភិក្ខុសង្ឃព្រះនាម ថាច់ សុវណ្ណារ៉ា ជាអ្នកនាំពាក្យសហព័ន្ធខ្មែរកម្ពុជាក្រោមពិភពលោកនៅក្នុងប្រទេសកម្ពុជា បានមានព្រះថេរដីកាថា ៖ «អយុត្តិធម៌បំផុតចំពោះលោក ហ្វិន បា ហ្នឹងឯង។ រដ្ឋាភិបាលយួនបានគំរាមកំហែង រំលោភសិទ្ធិសេរីភាពរបស់លោក ហ្វិន បា ព្រោះលោក ហ្វិន បា មិនធ្វើអីខុសទេ គ្រាន់តែទាមទារដីធ្លីរបស់លោកប៉ុណ្ណោះដែលរដ្ឋាភិបាលយួនអូសយក ដល់ពេលលោកធ្វើទៅបានចេញដីកាមកចាប់លោកយកទៅដាក់ពន្ធនាគារ កាត់ទោសលោកថា លោកធ្វើបះបោរអំពីនយោបាយ»។
ជាមួយគ្នានេះព្រះសង្ឃ យឿង ស៊ិន ជាប្រធានសហគមន៍ព្រះសង្ឃខ្មែរកម្ពុជាក្រោមនៅក្នុងប្រទេសកម្ពុជា បានមានព្រះថេរដីកាជាមួយពាក្យធ្ងន់ៗថា ៖ «និយាយពីវៀតណាម វាអត់ត្រូវទេ និយាយយួន។ អាយួនគំនិតវាតែប៉ុណ្ណឹង ចរិតយួន។ យើងថា វៀតណាមវាមិននេះទេ បើថារឿងយួន ចារិតវាតែប៉ុណ្ណឹង»។
វិទ្យុអាស៊ីសេរី មិនអាចទាក់ទងមន្ត្រីនៃស្ថានទូតវៀតណាម នៅក្នុងប្រទេសកម្ពុជាបានទេ នៅថ្ងៃសៅរ៍ ជាថ្ងៃឈប់សម្រាក។
លោក ហ្វិន បា ធ្លាប់បានដឹកនាំគ្រួសារខ្មែរកម្ពុជាក្រោមជាច្រើននាក់កាលពីឆ្នាំ២០០១ រហូតដល់ឆ្នាំ២០០៩ កន្លងទៅ ដើម្បីទាមទារដីធ្លីកសិកម្មរបស់ប្រជាជនខ្មែរក្រោមដែលជាកេរពីដូនតា ហើយដែលរងការរឹបអូសយកពីសំណាក់អាជ្ញាធរវៀតណាម ចាប់តាំងពីឆ្នាំ១៩៧៨ ដើម្បីបែកចែកជាសមូហភាព៕