លោកគឺជាមនុស្សម្នាក់ក្នុងចំណោមអ្នករួចជីវិតពីគុកទួលស្លែងនៃរបបខ្មែរក្រហមចំនួនជាង ១០នាក់ដែលបានចូលផ្ដល់សក្ខីកម្មជាលើកដំបូងក្នុងអង្គសវនាការរបស់តុលាការខ្មែរក្រហម។
លោក វ៉ាន់ ណាត ដែលបានរួចជីវិតពីគុកទួលស្លែងដោយសារតែគាត់ចេះគូររូបនោះ បានរៀបរាប់ប្រាប់អង្គសវនាការអំពីហេតុការណ៍ដែលគាត់បានជួបប្រទះ តាំងពីពេលត្រូវបានគេចាប់ខ្លួនរហូតដល់ពេលដែលគេបញ្ជូនរូបគាត់ដល់ក្រុងភ្នំពេញ តាមរយៈការសាកសួររបស់ប្រធានចៅក្រមអង្គជំនុំជម្រះនៃសាលាក្ដីខ្មែរក្រហម គឺលោក និល ណុន ក្នុងសវនាការលើករណីរបស់អតីតប្រធានមន្ទីរស-២១ ឬគុកទួលស្លែង កាំង ហ្កេកអ៊ាវ ហៅ ឌុច នៅថ្ងៃច័ន្ទ ទី២៩ ខែមិថុនា។
លោក វ៉ាន់ ណាត បានឲ្យដឹងថា រូបគាត់ត្រូវបានគេចាប់ខ្លួនក្នុងខេត្តបាត់ដំបងនៅថ្ងៃទី៣០ ខែធ្នូ ឆ្នាំ១៩៧៧ ខណៈដែលគាត់កំពុងតែប្រមូលផលស្រូវនៅឯការដ្ឋាន ហើយបញ្ជូនទៅដាក់គុកនៅក្នុងវត្តកណ្ដាល ដែលលោកមិនដឹងថារូបលោកបានប្រព្រឹត្តនូវទោសកំហុសអ្វីសោះ ដោយពេលនោះកងកម្លាំងឆ្នាំគុកខ្មែរក្រហមចោទសួរថាតើលោកបានដឹកនាំការប្រជុំប៉ុន្មានដង ហើយប្រជុំជាមួយអ្នកណាខ្លះ។
លោក វ៉ាន់ ណាត ថ្លែងដូច្នេះថា ៖ «គេថាឥឡូវកុំឲ្យឈឺខ្លួនទាន់ រកនឹកទៅ អង្គការមិនមែនភ្លើចាប់មនុស្សអត់មានកំហុសមកទេ ឥឡូវមិត្តឯងរកនឹកទៅ»។
លោក វ៉ាន់ ណាត បានបន្ថែមថា នៅក្នុងគុកវត្តកណ្ដាល ដោយគាត់គ្មានចម្លើយសារភាពដល់ក្រុមឆ្មាំគុក រូបគាត់បានរងនូវទារុណកម្មយ៉ាងដំណំ ៖ «គេយកខ្សែភ្លើងមកដល់ គេភ្ជាប់ចរន្តទៅ ភ្ជាប់ចរន្តហ្នឹងខ្ញុំលែងដឹងអីបាត់ហើយ ប្រកាច់មិនដឹងប៉ុន្មានដងទេ គ្រាន់តែភ្ញាក់ដឹងខ្លួនឡើង ខ្ញុំដេកនៅលើការ៉ូហ្នឹង គេជះទឹកលើក្បាល ហើយគេសួរទៀត»។
លោក វ៉ាន់ ណាត បានរៀបរាប់បន្តថា រូបគាត់ត្រូវបានគេបញ្ជូនពីគុកវត្តកណ្ដាលខេត្តបាត់ដំបងនៅថ្ងៃទី៧ ខែមករា ឆ្នាំ១៩៧៨ ទៅកាន់មន្ទីរស-២១ ឬគុកទួលស្លែងក្នុងក្រុងភ្នំពេញ។
លោក វ៉ាន់ ណាត ក៏បានបានបន្តឲ្យដឹងផងដែរនូវព្រឹត្តិការណ៍ដែលលោកបានជួបប្រទះនៅក្នុងគុកទួលស្លែង ដោយលោកបានថ្លែងថាជីវិតរបស់អ្នកទោសក៏ដូចជារូបលោកនៅទីនោះអន់ជាងសត្វទៅទៀត ៖ «កុំតែមានសត្វអីមករោមភ្លើងធ្លាក់ចូលមួយអត់បានទេ ធ្លាក់ចូលនៅក្បែរខ្លួន ដាក់ក្នុងមាត់ផ្លុប ទំពារលេប ហើយបើសិនតែឆ្មាំគុកឃើញ ចូលមកគេសួរអ្ហែងស៊ីអី? ខ្ញុំខ្ទប់មាត់ថា អត់ទេបងៗ តែអត់ខ្ជាក់ចេញមកវិញវាវ៉ៃហើយ ដោះស្បែកជើងវ៉ៃហើយ វ៉ៃទាល់តែខ្ជាក់ចេញកណ្ដូប ចេញចង្រិតមកវិញ»។
ក្នុងការផ្ដល់សក្ខីកម្មជាលើកដំបូង សាក្សីរូបនេះបានបន្ថែមឲ្យដឹងថា រូបគាត់ត្រូវបានសាកសួរអំពីប្រវត្តិនៃអាជីពរបស់គាត់ជាជាងគំនូរ ដោយមេគុកទួលស្លែង គឺ ឌុច ដែលកាលណោះ រូបគាត់ផ្ទាល់មិនដឹងថា ឌុច ជាអ្នកណា ហើយមានតួនាទីជាអ្វីទេ ដោយគ្រាន់តែឮគេហៅ ឌុច ថា «បងខាងកើតៗ» ប៉ុណ្ណោះ។
ក្រោយមក លោក វ៉ាន់ ណាត ត្រូវបានគេឲ្យគូររូបមេដឹកនាំនៃរបបកម្ពុជាប្រជាធិបតេយ្យ គឺរូបរបស់ ប៉ុល ពត តែម្ដង ដែលលោកសន្មតថា ការគូររូបនោះហើយដែលបានសង្គ្រោះជីវិតរបស់លោក៕