ចៅក្រមទាំង ២រូបនោះមានឈ្មោះ លោក ហួត ហ៊ាង និងអ្នកស្រី ខូវ ចាន់ថូ រីឯមន្ត្រីសុរិយោដីមានឈ្មោះអ្នកស្រី យឹម វួច។
លោក កែវ រ៉េមី សមាជិកក្រុមប្រឹក្សាជាតិ និងជាអ្នកនាំពាក្យនៃអង្គភាពប្រឆាំងអំពើពុករលួយ មិនបានអត្ថាធិប្បាយចំពោះការចាប់ខ្លួនមនុស្សទាំង ៣នាក់នេះថា ពាក់ព័ន្ធរឿងអ្វីខ្លះនោះទេ នៅថ្ងៃទី២១ ខែមករា ឆ្នាំ២០១២។ លោកគ្រាន់តែបញ្ជាក់ថា ទុកពេលវេលាឲ្យខាងសមត្ថកិច្ច ជាពិសេសខាងអង្គភាពប្រឆាំងអំពើពុករលួយ លោក ឱម យ៉ិនទៀង ធ្វើកិច្ចការទាំងអស់នេះ។
ប៉ុន្តែមន្ត្រីសិទ្ធិមនុស្សបញ្ជាក់ថា ការចាប់ខ្លួននេះអាចពាក់ព័ន្ធជាសំខាន់ក្នុងរឿងអំពើពុករលួយ និងជម្លោះដីធ្លី។
អនុប្រធានផ្នែកស៊ើបអង្កេតនៃសមាគមការពារសិទ្ធិមនុស្សអាដហុក លោក ចាន់ សុវ៉េត បានបញ្ជាក់នៅថ្ងៃទី២១ ខែមករា ថា ពិតជាមានការចាប់ខ្លួនចៅក្រមសាលាដំបូងខេត្តកណ្ដាល ២រូប និងមន្ត្រីសុរិយា ១រូបពិតមែន។ លោកបានគាំទ្រចំពោះការចាប់ខ្លួននេះ ប៉ុន្តែទោះជាយ៉ាងណាលោកបានសុំឲ្យមន្ត្រីមានសមត្ថកិច្ច អនុវត្តច្បាប់ឲ្យបានពេញលេញទៅតាមនីតិវិធី និងមានតម្លាភាព។
កាលពីថ្ងៃទី២៩ ខែវិច្ឆិកា ឆ្នាំ២០១០ អង្គភាពប្រឆាំងអំពើពុករលួយ ដែលដឹកនាំផ្ទាល់ដោយលោក ឱម យ៉ិនទៀត បានចុះចាប់ខ្លួនព្រះរាជអាជ្ញាអមសាលាដំបូងខេត្តពោធិ៍សាត់មួយរូប គឺលោក តុប ចន្ទសេរីវុឌ្ឍ ដែលគេបានរកឃើញថា បានពាក់ព័ន្ធនឹងអំពើពុករលួយ៕