លោក មាស ខេង អនុប្រធានគណបក្សសមរង្ស៊ីប្រចាំខេត្តស្វាយរៀង មានប្រសាសន៍ប្រាប់វិទ្យុអាស៊ីសេរីនៅព្រឹកថ្ងៃទី២០ ខែកញ្ញា ថា នៅព្រឹកថ្ងៃ១៧ ខែកញ្ញា ប៉ូលិសប្រមាណ២០នាក់បានមកឡោមព័ទ្ធផ្ទះលោក ប៉ែន សាម៉ន ដែលជាប្រធានគណបក្សឃុំសំបួរ ហើយនៅថ្ងៃដដែលនោះដែរ កម្លាំងប៉ូលិសក៏បានឡោមព័ទ្ធផ្ទះ លោក ប្រាក់ វណ្ណា ប្រធានគណបក្សឃុំរមាំងថ្កោលផងដែរ។
លោក មាស ខេង បន្តថា ការចាប់ខ្លួនសកម្មជនគណបក្សសមរង្ស៊ីទាំងពីររូបនេះមានលក្ខណៈមិនប្រក្រតី ៖ «មូលហេតុដែលគេចាប់ហ្នឹង ពីយប់មានចោរប្លន់ឯចុងភូមិ ដល់ព្រលឹមឡើងម៉ោង៦ព្រឹក មកព័ទ្ធចាប់អ្នកទាំងអស់ហ្នឹងនៅតាមផ្ទះរៀងៗខ្លួនៗ។ អ៊ីចឹងបានន័យថា ការដែលចាប់ខ្លួនហ្នឹងហាក់ដូចជានីតិវិធីវាធ្វើលឿនពេក ព្រោះរឿងនេះវាចូលជារឿងស៊ើបអង្កេតហើយ ហេតុអីបានប៉ូលិសមកធ្វើដូចបទល្មើសជាក់ស្ដែង មកចាប់ខ្លួន ហើយជនរងគ្រោះមិនដែលមានបញ្ហាអីផង ក្រៅពីជាសកម្មជនរបស់គណបក្សសមរង្ស៊ី»។
លោក ប្រាជ្ញ រឹម ស្នងការប៉ូលិសខេត្តស្វាយរៀង មានប្រសាសន៍ថា ការចាប់ខ្លួន លោក ប៉ែន សាម៉ន នេះ ដោយមានភស្តុតាងបង្ហាញថា ជននេះមានការពាក់ព័ន្ធក្នុងអំពើប្លន់ប្រដាប់អាវុធ។ លោកបន្តថា ជនល្មើសបានសារភាពរួចហើយ ចំណែកឈ្មោះ ប្រាក់ វណ្ណា ប៉ូលិសគ្រាន់តែហៅទៅសួរប៉ុណ្ណោះ។
លោក ប្រាជ្ញ រឹម បានមានប្រសាសន៍ថា ៖ «យើងចាប់បានពីម្សិលម៉្ងៃ បានកាំភ្លើងមួយដើម អាកា ប្លន់នៅសំបួរ ចាប់សារភាពហើយ ប្លន់មាស៤ជី ចាប់តែ១ទេ ដោះលែងអស់ហើយ។ ដែលមានកាំភ្លើង ស្រាវជ្រាវទៅគាត់សារភាពទៅ ពាក់ព័ន្ធអ្នកផ្ទាល់ ចាប់តែអ្នកផ្ទាល់ទេ»។
គួរបញ្ជាក់ដែរថា នៅយប់ថ្ងៃទី១៦ កញ្ញា មានអំពើប្លន់ប្រដាប់អាវុធមួយបានកើតឡើងនៅក្នុងឃុំសំបួរ លុះព្រឹកឡើងកម្លាំងប៉ូលិសក៏បានមកព័ទ្ធចាប់ លោក ប៉ែន សាម៉ន តែម្តង ដោយពុំមានបង្ហាញដីកាចាប់ខ្លួនអ្វីឡើយ។
អ្នកស្រី ប្រាក់ សុភី ភរិយាលោក ប៉ែន សាម៉ន ប្រធានគណបក្សសមរង្ស៊ីឃុំសំបួរ មានប្រសាសន៍ថា អ្នកស្រីមិនបានដឹងពីមូលហេតុនៃការចាប់ខ្លួនប្តីអ្នកស្រីទេ។ អ្នកស្រីបន្តថា ប្តីគាត់គ្មានកំហុសទេ។ ការរកឃើញអាវុធក្នុងស្រះក្រោយផ្ទះគឺជាការប្រឌិតភស្តុតាងដើម្បីមួលបង្កាច់ប្តីគាត់ប៉ុណ្ណោះ។
លោក ប៉ែន សាម៉ន បានបញ្ជាក់ថា ៖ «ថ្ងៃ១៦ នៅដេកជាមួយគ្នាប្ដីប្រព័ន្ធទល់ព្រឹក ស្រាប់តែព្រឹកឡើងឃើញប៉ូលិសមកត្រៀប។ គាត់មិនដែលធ្វើស្អីផង គាត់នៅតែផ្ទះ មកចាប់រុករើផ្ទះខ្ញុំអ៊ីចឹង។ ខ្ញុំអត់ដែលមានផង ស្រាប់តែគេមកសុំឆែកផ្ទះឆែកអី ស្រាប់តែឃើញតែម្ដង»។
យ៉ាងណាក៏ដោយមន្ត្រីសិទ្ធិមនុស្សនិងអ្នកនាំពាក្យគណបក្សសមរង្ស៊ី លោក យឹម សុវណ្ណ មានប្រសាសន៍ថា លោកពុំអាចធ្វើអត្ថាធិប្បាយអ្វីបានទេ ដោយលោកពុំទាន់បានធ្វើការស៊ើបអង្កេតរឿងនេះឲ្យដិតដល់នៅឡើយ៕