អ្នកនាំពាក្យក្រសួងការពារជាតិកម្ពុជា ចេញសេចក្ដីប្រកាសព័ត៌មានថា កងទ័ពថៃបាញ់ជញ្ជ្រំកាំភ្លើងធំ និងការវាយសម្រុកដោយកម្លាំងទ័ពថ្មើរជើងនៅព្រឹកថ្ងៃអាទិត្យទី ២៤ មេសា គឺដើម្បីកាន់កាប់ប្រាសាទតាមាន់។ រហូតមកដល់នេះ កងទ័ពកម្ពុជាកំពុងប្រយុទ្ធការពារទីនោះ។
នាយករដ្ឋមន្ត្រីថៃ លោក អាភីស៊ិត វ៉េតចាជីវ៉ាក់ (Abhisit Vejjajiva) ថ្លែងថា ថៃគ្មាននយោបាយរករឿងប្រទេសជិតខាងទេ ហើយការប្រយុទ្ធគ្នាជាថ្មីនេះបានចាប់ផ្ដើមឡើងដោយភាគីកម្ពុជា ហើយកងទ័ពថៃចាំបាច់ត្រូវតបតវិញដើម្បីការពារប្រជាពលរដ្ឋរបស់ខ្លួន។
លោកបញ្ជាក់ថា
«យើងតម្រង់ដាក់តែគោលដៅយោធាប៉ុណ្ណោះ»។
សេចក្ដីប្រកាសព័ត៌មានអ្នកនាំពាក្យក្រសួងការពារជាតិកម្ពុជា សរសេរថា ថៃបាញ់ផ្លោងអាវុធធុនធ្ងន់រាប់រយគ្រាប់ចូលតំបន់គោកមន ស្រុកបន្ទាយអំពិល ខេត្តឧត្តរមានជ័យ ដែលជាតំបន់ពលរដ្ឋស៊ីវិលកំពុងរស់នៅ។
សម្លេងគ្រាប់ផ្លោងជាច្រើនគ្រាប់ បានផ្ទុះឡើងជាថ្មីម្ដងទៀត នៅព្រឹកថ្ងៃអាទិត្យទី ២៤ ខែមេសានេះ នៅតំបន់ប្រាសាទតាមាន់ និងតាក្របី ដែលជាចំណុចសមរភូមិប្រយុទ្ធគ្នារវាងកងទ័ពកម្ពុជា និងថៃ រយៈពេលពីរថ្ងៃ កាលពីថ្ងៃសុក្រ និងថ្ងៃសៅរ៍។
អ្នកយកព័ត៌មានវិទ្យុអាស៊ីសេរីបានរាយការណ៍មកថា ស្នូរគ្រាប់កាំភ្លើងបានផ្ទុះឡើងនៅម៉ោង ៩ និង ៤០ នាទី បន្តរហូតមកដល់ល្ងាចម៉ោង ៤ រសៀលមានចំនួនជាង ៣០០ គ្រាប់។ ការបាញ់ផ្លោងនៅតែមានបន្តរហូតមកដល់ម៉ោង ៥ ល្ងាចនេះ។
ប្រភពព័ត៌មានពីទីបញ្ជា ការទិសឧត្តរមានជ័យបានឱ្យដឹងថា កងទ័ពថៃនៅច្រកប្រាសាទតាមាន់ចំនួន ១១ នាក់របួស និង ៥ នាក់ស្លាប់។ ក្នុងនោះមានម្នាក់ ជាប្រធានទំនាក់ទំនងច្រកនៅប្រាសាទតាមាន់។ នៅខាងកម្ពុជា មានរបាយការណ៍ថាមានរបួសចំនួនពីរនាក់។ ក៏ប៉ុន្តែ មិនទាន់មានប្រភពព័ត៌មានឯករាជ្យណាមួយបញ្ជាក់អំពីការខូចខាតពីការប្រយុទ្ធគ្នានេះនៅឡើយទេ៕