មេបញ្ជាការរងកងយោធពលខេមរភូមិន្ទនៃតំបន់ប្រតិបត្តិការសឹករងរបស់ខេត្តព្រះវិហារប្រចាំទិសជាំក្សាន្ត លោកវរសេនីយ៍ទោ មាស យឿន បានមានប្រសាសន៍ឲ្យដឹងកាលពីព្រឹកថ្ងៃព្រហស្បតិ៍ ទី១២ ខែមីនា ថា កងកម្លាំងរបស់លោកបានចាប់ខ្លួនបុរសជនជាតិថៃ៤នាក់នៅពេលដែលកងទាហានខ្មែរដើរល្បាតនៅតាមព្រំដែនចំណុចព្រលានតាទុំ ភូមិវាលពោធិ៍ ឃុំជាំក្សាន្ត កាលពីរសៀលថ្ងៃទី១០ ខែមីនា។
មន្ត្រីដដែលបានមានប្រសាសន៍ថា បុរសជនជាតិថៃទាំង៤បានប្រាប់ថា ពួកគេរស់នៅស្រុកខាន់ថាៈឡាក់នៃខេត្តអ៊ូប៊ុន ៖ «ប្រជាជនថៃវានៅខេត្តអ៊ូប៊ុន ស្រុកខាន់ថាៈឡាក់ បំណងរបស់វា វាចូលរកស៊ីបរបាញ់សត្វក្នុង(តំបន់)កម្លាំងយើងដើរល្បាតការពារភូមិសាស្ត្រនៅតំបន់ព្រលានតាទុំ អាហ្នឹងបញ្ជូនឲ្យសមត្ថកិច្ចខាងប៉ូលិសគេធ្វើការ»។
អាជ្ញាធរខេត្តព្រះវិហារបាននិយាយថា កងទាហានល្បាតព្រំដែនខ្មែរបានរកឃើញអាវុធច្នៃចំនួន៣ដើមនិងអាគុយចំនួន៣គ្រឿងនៅជាប់នឹងខ្លួនបុរសជនជាតិថៃទាំងនោះ។
អភិបាលខេត្តព្រះវិហារ លោក ព្រាប តាន់ បានមានប្រសាសន៍ថា ជនជាតិថៃទាំង៤បានអះអាងថា ពួកគេជាប្រជាពលរដ្ឋ ក៏ប៉ុន្តែពួកគេមានអាវុធដែលអាចបាញ់សម្លាប់មនុស្សបាន ដូច្នេះអាជ្ញាធរបានសម្រេចឲ្យនាំខ្លួនពួកគេទៅធ្វើការសាកសួរសិនរង់ចាំការទាក់ទងគ្នាជាមួយអាជ្ញាធរថៃដើម្បីរកដំណោះស្រាយ។
លោក ព្រាប តាន់ បានមានប្រសាសន៍ថា ៖ «គេបានប្រាប់ថាគេជាប្រជាពលរដ្ឋ ប៉ុន្តែមានកាំភ្លើង មានសឺមែល ហៅតាមភាសារបស់ថៃ កាំភ្លើងកាប៊ិនៗគឺជាប្រភេទកាំភ្លើងដែលគេច្នៃសម្រាប់បាញ់សត្វបាញ់អី ប៉ុន្តែអានេះបាញ់មនុស្សងាប់។ អត់មានស្អីទេ ឥឡូវបងប្អូនយើងយកមករក្សាទុកបងប្អូនហ្នឹងទៅ បាយទឹកអីអ៊ីចឹងទៅ ហើយរង់ចាំការទំនាក់ទំនងគ្នាដើម្បីដោះស្រាយ»។
ទោះយ៉ាងណាមិនអាចទំនាក់ទំនងសុំការអធិប្បាយជុំវិញការចាប់ខ្លួនបុរសជនជាតិថៃទាំងនោះពីមន្ត្រីទំនាក់ទំនងព្រំដែនថៃ-កម្ពុជាប្រចាំតំបន់និងពីមន្ត្រីស្ថានទូតថៃប្រចាំកម្ពុជាបានទេ។
សូមបញ្ជាក់ថា ចាប់តាំងពីខែកុម្ភៈមកកងរក្សាព្រំដែនខ្មែរបានរាយការណ៍ជាញឹកញាប់អំពីការចាប់ខ្លួនបុរសជនជាតិថៃដែលលួចចូលទឹកដីខ្មែរនៅតាមតំបន់ជម្លោះព្រំដែន ដោយកាលពីថ្ងៃទី២៦ ខែកុម្ភៈកន្លងមក បុរសជនជាតិថៃម្នាក់មកពីខេត្តសុរិន្ទត្រូវបានទាហានខ្មែរចាប់ខ្លួននៅតំបន់ថ្គាមរមាស ជិតអតីតជំរំជនភៀសខ្លួនខ្មែរ តាទុំ និងកាលពីថ្ងៃទី២៧ ខែកុម្ភៈដែរ បុរសជនជាតិថៃម្នាក់ទៀតប្រដាប់ដោយគ្រាប់មីនជាប់ខ្លួនផងត្រូវបានចាប់ខ្លួននៅលើខ្នងភ្នំដងរែក អតីតចម្ការស្វាយរបស់តាម៉ុក ជិតច្រកជាំសាង៉ាំនៃស្រុកអន្លង់វែង ខេត្តឧត្តរមានជ័យ៕