ពលករ ៤នាក់បានរួចផុតពីការជួញដូរកម្លាំងពលកម្ម ហើយត្រូវនាំអោយត្រឡប់មកដល់ស្រុកកំណើតវិញ ដោយមានកិច្ចសហការរវាងរដ្ឋាភិបាលកម្ពុជា តាមរយៈក្រសួងការបរទេស ជាមួយអាជ្ញាធរអាហ្វ្រិកខាងត្បូង និងអង្គការក្រៅរដ្ឋាភិបាល។ ពលករទាំងនោះត្រូវបានគេជួយសង្គ្រោះពីការបង្ខំអោយធ្វើការនៅលើទូកនេសាទដោយខុសច្បាប់។
ពលករម្នាក់ឈ្មោះ ជា ណារ៉ា បានប្រាប់អ្នកសារព័ត៌មាននៅអាកាសយានដ្ឋានអន្តជាតិភ្នំពេញ ថា ពួកគេបានចាកចេញទៅធ្វើការតាមរយៈក្រុមហ៊ុនឯកជនGiant Ocean International Fishery កាលពីខែតុលា ឆ្នាំ២០១១ ដែលអះអាងថា នាំពួកគេទៅធ្វើការលើទូកនេសាទក្នុងប្រទេសជប៉ុន។
ជា ណារ៉ា បន្តថា ពួកគេត្រូវគេលក់ និងបង្ខំអោយទៅធ្វើការយ៉ាងលំបាកនៅលើទូកនេសាទ អស់ជាច្រើនខែ និងពុំទទួលបានប្រាក់ឈ្នួលឡើយ៖ «គេថាទាល់យើងធ្វើការដល់ដាច់ឆ្នាំទើបអោយលុយយើង។ ខ្ញុំថា នៅដាច់ឆ្នាំ តែក្រុមហ៊ុនរត់ចោលបាត់ ខ្ញុំសុំមកផ្ទះវិញ។ ទៅដល់ធ្វើការពិបាកណាស់បងអើយ! នៅកណ្ដាលសមុទ្រ ប្រើយើងទាំងភ្លៀងទាំងអី។ យើងធ្វើការមិនចំណាប់គេវ៉ៃ។ យើងទៅមុនដំបូងយើងមិនចេះហ្នឹងគេវ៉ៃ»។
ពលករខ្មែរទាំង ៤នាក់ដែលបានវិលមកវិញនោះមាន ទី១ ឈ្មោះ សេង សុខា អាយុ ២៥ឆ្នាំ មានស្រុកកំណើតក្នុងខេត្តកំពត ទី២ ចាប ស៊ីណាត អាយុ ២១ឆ្នាំ មានស្រុកកំណើតនៅខេត្តសៀមរាប ទី៣ ផាន ចាន់ផែន អាយុ ៣៤ឆ្នាំ និងទី៤ ជា ណារ៉ា អាយុ ២៤ឆ្នាំ មានស្រុកកំណើតនៅខេត្តកំពង់ចាម។
ឪពុករបស់ពលករ សេង សុខា គឺលោក នូវ ចុន មានប្រសាសន៍ថា ដោយសារជីវភាពទ័លក្រពេកទើបលោកសម្រេចចិត្តអោយកូនប្រុសទៅធ្វើការនៅប្រទេសជប៉ុន។ ប៉ុន្តែលោកមិននឹកស្មានថា កូនប្រុសត្រូវជួបការលំបាកស្ទើរតែមិនអាចត្រឡប់មកជួបជុំគ្រួសារវិញបានដូច្នេះឡើយ។ លោកអំពាវនាវដល់យុវជនកម្ពុជា គួរជ្រើសរើសការងារក្នុងស្រុកជាជាងប្រថុយប្រថានទៅរកការងារនៅក្រៅប្រទេស។
លោក នូវ ចុន៖ «ខ្ញុំចង់អោយអ្នកដែលទៅធ្វើការនៅក្រៅប្រទេសហ្នឹង មកធ្វើការនៅក្នុងប្រទេសយើងវិញ។ ខ្ញុំខកចិត្តណាស់ដែលចាញ់កលគេយកកូនទៅបោកប្រើប្រាស់នៅប្រទេសអាហ្រ្វិចខាងត្បូង។ ថាទៅហ្នឹងទៅប្រទេសជប៉ុនទេ ស្រាប់តែទៅដល់អាអាហ្រ្វិចខាងត្បូង។ វាទីទ័លក្រពេក វាប្រាក់ខែតែ ២០០រយទេ ឃើញគេទៅក៏ទៅ។ គឺសន្យាអោយប្រាក់ខែ ២០០ហ្នឹងហ្មង តែទៅអត់ឃើញបើកប្រាក់ខែអោយ»។
មន្ត្រីកម្មវិធីសិទ្ធិការងារនៃមជ្ឈមណ្ឌលអប់រំច្បាប់សម្រាប់សហគមន៍ លោក ហ៊ុយ ពេជ្រសុវណ្ណ មានប្រសាសន៍ថា អង្គការរបស់លោកបានទទួលដំណឹងរបស់ពលករទាំង ៤នាក់នោះតាមរយៈក្រុមគ្រួសាររបស់ពួកគេ ហើយអង្គការរបស់លោកបានសហការជាមួយអង្គការអន្តរជាតិទេសន្តរប្រវេសន៍ (IOM) សុំកិច្ចអន្តរាគមន៍ពីក្រសួងការបរទេស ទើបអាចនាំពលករទាំង ៤នាក់មកវិញបាន។
លោក ហ៊ុយ ពេជ្រសុវណ្ណ បន្តថា នេះជាករណីរំលោភសិទ្ធិមនុស្សធ្ងន់ធ្ងរ ហើយអង្គការរបស់លោកកំពុងសិក្សាពីផ្លូវច្បាប់ និងស្វែងរកអ្នកទទួលខុសត្រូវចំពោះការបាត់បង់អត្ថប្រយោជន៍របស់ក្រុមពលករពីការងាររហូតដល់ ៩ខែនៅលើទូកនេសាទនោះ៖ «ក្រុមហ៊ុននឹងយកគាត់ទៅដល់អាហ្រ្វិចខាងត្បូង។ ដូច្នេះឃើញថា មានការកេងប្រវ័ញ្ចលើកម្លាំងពលកម្មរបស់ពួកគាត់។ យើងមានមេធាវី យើងហ្នឹងជួយគាត់តាមផ្លូវច្បាប់។ យើងនឹងពិនិត្យមើលទៀតថា អាចជួយគាត់យ៉ាងម៉េច»។
មកដល់ពេលនេះការទៅរកការងារនៅក្រៅប្រទេសនៅតែត្រូវអះអាងថា ជាញឹកញយគឺពើបប្រទះនឹងការជួញដូរកម្លាំងពលកម្ម។ យ៉ាងណាគេនៅមិនទាន់មានតួលេខជាក់ពីចំនួនពលករខ្មែរសរុបដែលកំពុងធ្វើការនៅក្រៅប្រទេសនៅឡើយ។ បើតាមរបាយការណ៍របស់អង្គការខារ៉ាមកម្ពុជា អោយដឹងថា មានពលករខ្មែរទៅធ្វើការនៅប្រទេសថៃ មានប្រហែល ២០ម៉ឺននាក់ នៅម៉ាឡេស៊ី ៥ម៉ឺននាក់ និងកូរ៉េខាងត្បូង ១ម៉ឺននាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។