អ្នក​ភូមិ​បុរី​កីឡា​៥​នាក់​ត្រូវ​ចាប់​ខ្លួន​ និង​២​នាក់​សន្លប់​ក្នុង​ពេល​តវ៉ា

សមត្ថកិច្ច​ក្រុង​ភ្នំពេញ និង​ប្រជាពលរដ្ឋ​តំបន់​បុរី​កីឡា បាន​ផ្ទុះ​អំពើ​ហិង្សា​ដាក់​គ្នា​នៅ​មុខ​សាលា​ក្រុង​ភ្នំពេញ ក្នុង​ពេល​ដែល​អ្នក​ភូមិ​បុរី​កីឡា​ប្រហែល ៥០​នាក់ ធ្វើ​បាតុកម្ម​ដើម្បី​ទាមទារ​ឲ្យ​អភិបាល​សាលា​រាជធានី​ភ្នំពេញ អន្តរាគមន៍​ទៅ​ក្រុមហ៊ុន​ផានអ៊ីម៉ិច ឲ្យ​សង​ការ​ខូច​ខាត​ពី​ការ​បណ្ដេញ​ពួក​គាត់​ចេញ​ពី​លំនៅ។

0:00 / 0:00

អ្នក​ភូមិ​បុរី​កីឡា ៥​នាក់ ត្រូវ​អាជ្ញាធរ​ចាប់​ខ្លួន និង​ពីរ​នាក់​ផ្សេង​ទៀត​បាន​ដួល​សន្លប់​នៅ​ក្នុង​យុទ្ធនាការ​របស់​អាជ្ញាធរ​បង្ក្រាប​អ្នក​ភូមិ​បុរី​កីឡា ដែល​នាំ​គ្នា​តវ៉ា​នៅ​មុខ​សាលា​រាជធានី​ភ្នំពេញ នៅ​ថ្ងៃ​ទី​០១ ខែ​កុម្ភៈ ឆ្នាំ​២០១២។

ពលរដ្ឋ​នៅ​សហគមន៍​បុរី​កីឡា បាន​ស្វះស្វែង​រក​កិច្ច​អន្តរាគមន៍​ពី​អភិបាល​សាលា​ក្រុង​ជួយ​រក​ដំណោះ​ស្រាយ​ដល់​ពួក​គាត់​ក្នុង​ការ​អភិវឌ្ឍ​តំបន់​បុរី​កីឡា​នោះ។

មុន​ពេល​ដែល​សមត្ថកិច្ច​បង្ក្រាប ស្ត្រី​អ្នក​តវ៉ា​ពីរ​នាក់​បាន​ដោះ​អាវ​ដើម្បី​ទាមទារ​ឲ្យ​មន្ត្រី​សាលា​ក្រុង​ចេញ​មក​ជួប​ពួក​គាត់ ដើម្បី​ជជែក​រក​ដំណោះ​ស្រាយ​ជាមួយ​អ្នក​ភូមិ ប៉ុន្តែ​មិន​មាន​មន្ត្រី​ណា​ម្នាក់​ចេញ​មក​ជួប​ពលរដ្ឋ​ឡើយ។ ក្រុម​សន្តិសុខ​ខណ្ឌ​ដូនពេញ និង​សមត្ថកិច្ច​កង​អន្តរាគមន៍​ប្រដាប់​ដោយ​ដំបង និង​ខែល​ការពារ​ផង បាន​ផ្ទុះ​ហិង្សា​ជា​មួយ​ពលរដ្ឋ​អ្នក​តវ៉ា ហើយ​បាន​ចាប់​អ្នក​តវ៉ា​ប្រមាណ ៥​នាក់​ដាក់​រថយន្ត​បញ្ជូន​ទៅ​ស្នងការ​នគរបាល។

អ្នកស្រី តូច វណ្ណា ពលរដ្ឋ​តំបន់​បុរី​កីឡា បាន​ថ្លែង​ថា ការ​ស្វែង​រក​កិច្ច​អន្តរាគមន៍​ពី​គ្រប់​ស្ថាប័ន​នេះ គឺ​ដើម្បី​ឲ្យ​ក្រុមហ៊ុន​ទទួល​ខុសត្រូវ និង​គោរព​កិច្ច​សន្យា​នៃ​ការ​អភិវឌ្ឍ៖ «គឺ​គ្មាន​អ្វី​ក្រៅ​ពី​ខ្ញុំ​មក​ទាមទារ​ទីលំនៅ​របស់​ពួក​ខ្ញុំ​វិញ​ទេ។ ទី​១ គឺ​ខ្ញុំ​ទាមទារ​ឲ្យ​ក្រុមហ៊ុន​ផានអ៊ីម៉ិច សាងសង់​អាគារ​ពីរ​បន្ថែម​ទៀត​ឲ្យ​គ្រប់ ១០​អាគារ​ដល់​ពួក​ខ្ញុំ។ ទី​២ ឲ្យ​រដ្ឋាភិបាល​ត្រូវ​តែ​ដោះលែង​ពួក​ខ្ញុំ​ដែល​ជាប់​នៅ​ពន្ធនាគារ​ព្រៃ​ស គឺ​ឲ្យ​ដោះលែង​ពួក​ខ្ញុំ​មក​វិញ​មក ព្រោះ​ថា ពួក​ខ្ញុំ​អត់​មាន​ទោស​កំហុស​អ្វី​ធំ ដែល​ត្រូវ​យក​ពួក​ខ្ញុំ​ដាក់​គុក​នោះ​ទេ។ ទី​៣ គឺ​អ្វី​ដែល​បាន​ខូច​ខាត​នៅ​បុរី​កីឡា គឺ​ដូច​ជា​ផ្ទះ​សម្បែង​ទ្រព្យ​សម្បត្តិ​របស់​ពលរដ្ឋ​ទាំង​អស់​ដែល​ក្រុមហ៊ុន​ផានអ៊ីម៉ិច ឈូស​កម្ទេច​អស់​រលីង»

អ្នក​ភូមិ​បុរី​កីឡា ធ្លាប់​បាន​ដាក់​ញត្តិ​ទៅ​រដ្ឋសភា​ដើម្បី​ឲ្យ​ជួយ​រក​ដំណោះ​ស្រាយ ហើយ​រដ្ឋសភា​បាន​បញ្ជូន​សំណើ​របស់​ពលរដ្ឋ​មក​សាលា​រាជធានី​ភ្នំពេញ ដើម្បី​ដោះស្រាយ។ ប៉ុន្តែ​ដំណោះ​ស្រាយ​ដែល​ពួក​គាត់​ទទួល​បាន​នោះ គឺ​សមត្ថកិច្ច​បំបែក​ការ​តវ៉ា និង​ចាប់​ខ្លួន​អ្នក​តវ៉ា​នោះ។

លោក អំ សំអាត ប្រធាន​ផ្នែក​ស៊ើប​អង្កេត​អង្គការ​លីកាដូ បាន​ថ្លែង​ថា ការ​ប្រើ​ហិង្សា​បំពាន​លើ​ពលរដ្ឋ​នេះ ​មិន​មែន​ជា​ដំណោះ​ស្រាយ​ឡើយ៖ «នេះ​មិន​មែន​ជា​ដំណោះស្រាយ​ល្អ​ទេ​សម្រាប់​ការ​ដោះ​ស្រាយ គឺ​គួរ​ណាស់​តែ​មាន​ការ​ចរចា​គ្នា​រវាង​តំណាង​ប្រជាពលរដ្ឋ និង​តំណាង​អាជ្ញាធរ​ក្រុង ដើម្បី​ស្វែង​រក​ដំណោះស្រាយ​ណា​មួយ​ដែល​បញ្ចៀស​នូវ​ការ​បង្ក្រាប ឬ​ក៏​អំពើ​ហិង្សា​កើត​ឡើង​ហ្នឹង​បាទ!»

អ្នក​ភូមិ​បុរី​កីឡា ដែល​ចូល​រួម​ធ្វើ​បាតុកម្ម​នៅ​មុខ​សាលា​ក្រុង​នោះ មិន​អាច​ជួយ​អ្វី​ដល់​អ្នក​ដែល​ត្រូវ​សមត្ថកិច្ច​ចាប់​នោះ​ឡើយ គឺ​បាន​ត្រឹម​តែ​យំ និង​ស្រែក​ថា អយុត្តិធម៌​ណាស់។

លោក សៀ ភារម្យ នាយក​លេខាធិការដ្ឋាន​ក្រុម​ការងារ​ពិសេស​សិទ្ធិ​លំនៅឋាន បាន​ថ្លែង​ឲ្យ​ដឹង​ថា អាជ្ញាធរ​បាន​ធ្វើ​ហួស​ពី​កាតព្វកិច្ច​របស់​ខ្លួន៖ «នេះ​គឺ​ជា​ការ​ប្រាស់​ចាក​អំពី​កាតព្វកិច្ច​ក្នុង​នាម​អាជ្ញាធរ​ជា​អ្នក​បម្រើ​ប្រជាពលរដ្ឋ​គឺ​ត្រូវ​តែ​ចេញ​មក​ដោះស្រាយ​ជួប​ជជែក​ជា​មួយ​ប្រជាពលរដ្ឋ ហើយ​រក​ដំណោះស្រាយ​ជូន​គាត់ (ពលរដ្ឋ) ហើយ​មិន​អាច​យក​កម្លាំង​ចាប់​ពួក​គាត់​ដោយ​បំបិទ​នូវ​ការ​តវ៉ា ឬ​ក៏​សំឡេង​របស់​ពួក​គាត​យ៉ាង​ដូច្នេះ​ទេ»

ពលរដ្ឋ​សហគមន៍​បុរី​កីឡា​ប្រហែល ៣០០​គ្រួសារ ដែល​ត្រូវ​អាជ្ញាធរ និង​ក្រុមហ៊ុន​ផានអ៊ីម៉ិច បាន​ឈូស​ផ្ទះ​កាល​ពី​ថ្ងៃ​ទី​០៣ ខែ​មករា កន្លង​មក​នេះ កំពុង​តែ​ជួប​ការ​លំបាក​ដោយ​សារ​តែ​ពលរដ្ឋ​ខ្លះ​ត្រូវ​អាជ្ញាធរ​ជម្លៀស​ឲ្យ​ទៅ​ក្បែរ​ភ្នំ​ឧត្តុង្គ ក្នុង​ខេត្ត​កណ្ដាល ខ្លះ​ទៀត​រស់​នៅ​ទួល​សំបូរ ក្នុង​ខណ្ឌ​ដង្កោ ហើយ​ខ្លះ​ទៀត​កំពុង​តែ​រស់នៅ​តាម​សំយាប​ផ្ទះ​គេ​នៅ​ទី​ក្រុង​ភ្នំពេញ៕

កំណត់​ចំណាំ៖ ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ ដើម្បី​រក្សា​សេចក្ដី​​ថ្លៃថ្នូរ យើង​​ខ្ញុំ​នឹង​ផ្សាយ​តែ​មតិ​ណា​ដែល​មិន​​ជេរ​​ប្រមាថ​​ដល់​​អ្នក​​ដទៃ​តែ​ប៉ុណ្ណោះ។