រដ្ឋមន្ត្រីក្រសួងព័ត៌មាននិងជាមន្ត្រីអ្នកនាំពាក្យរបស់រដ្ឋាភិបាល លោក ខៀវ កាញារីទ្ធ បានប្រាប់អ្នកយកព័ត៌មានកាលពីវេលាព្រឹកថ្ងៃសៅរ៍យ៉ាងដូច្នេះថា ៖ «បើសិនថៃវ៉ៃចូលក៏មិនមែនឲ្យថៃចូលដោយងាយបានទេ។ យើងបានត្រៀមរៀបចំថា ពិតមែនតែថៃមានកប៉ាល់ហោះមានអីមែន ប៉ុន្តែនៅក្នុងសង្គ្រាមវាមិនមែនសំខាន់នៅលើកប៉ាល់ហោះឬមិនកប៉ាល់ទេ នៅពេលវ៉ៃលុកដំបូងអ្នកណាដែលខូតខាតធ្ងន់ដែលត្រូវគិតដែរ។ អ៊ីចឹងក៏មិនមែនជាការងាយស្រួលដល់ថៃដែរ»។
មន្ត្រីអ្នកនាំពាក្យរបស់រដ្ឋាភិបាលបានឲ្យដឹងថា បើសិនជាមានការផ្ទុះអាវុធដាក់គ្នានៅតាមបណ្ដោយព្រំដែនប្រទេសកម្ពុជាត្រូវការកងទ័ពយ៉ាងតិចពី១៧០០០នាក់ទៅ២០០០០នាក់។
លោក ខៀវ កាញារីទ្ធ បានឲ្យដឹងថា បន្ទាប់ពីមានការប្រឈមមុខដាក់គ្នាផ្នែកយោធា រដ្ឋាភិបាលខ្មែរបានសង្កេតមើលសេណារីយ៉ូចំនួនបីសំខាន់ៗ គឺទីមួយ គឺភាគីថៃនិងកម្ពុជាត្រូវដោះស្រាយបញ្ហាព្រំដែនទាំងអស់ដែលមាន ទីពីរគឺសភាពការណ៍មានការប្រឈមមុខដាក់គ្នា ប៉ុន្តែមិនមានការផ្ទុះអាវុធ ហើយទីបីគឺការផ្ទុះសង្គ្រាមរវាងប្រទេសទាំងពីរនៅតាមបណ្ដោយព្រំដែន។
លោក ខៀវ កាញារីទ្ធ បានបន្តថា រដ្ឋាភិបាលបានជ្រើសរើសយកសេណារីយ៉ូទីពីរគឺការបញ្ចៀសការផ្ទុះអាវុធដាក់គ្នា និងធ្វើការចរចាទ្វេភាគីដោយសន្តិវិធីបន្តទៀត ហើយថារដ្ឋាភិបាលអាចធ្វើការប្ដឹងទៅអង្គការសហប្រជាជាតិលុះត្រាណាតែប្រទេសថៃធ្វើការវាយលុយចូលមកក្នុងទឹកដីខ្មែរ។
គួរជម្រាបថា បញ្ហាជម្លោះព្រំដែនរវាងប្រទេសកម្ពុជានិងថៃបានផ្ទុះឡើងបន្ទាប់ពីប្រទេសកម្ពុជាសម្រេចបាននូវការដាក់បញ្ចូលប្រាសាទព្រះវិហារក្នុងបញ្ជីបេតិកភណ្ឌពិភពលោករួចមកកាលពីដើមខែកក្កដាកន្លងទៅនេះ៕