និស្សិតផ្នែកព័ត៌មានវិទ្យាមួយរូបក្នុងទីក្រុងភ្នំពេញ ឈ្មោះ ហ្វា អ៊ីហ្សះ មានប្រសាសន៍ថា មិនថាតែប្រជាពលរដ្ឋទូទៅដែលរស់នៅតាមតំបន់ជនបទទេ សូម្បីតែនិស្សិតមួយចំនួនក៏មិនទាន់បានស្វែងយល់អំពីការប្រើប្រាស់ Internet បានច្បាស់លាស់ផងនោះ។ កញ្ញាបានបញ្ជាក់ថា វិស័យ Internet ជាបណ្តាញមួយដែលធ្វើឲ្យមនុស្សដឹងអំពីព្រឹត្តិការណ៍ដែលកើតមានលើសកលលោក និងការស្រាវជា្រវមេរៀនរបស់សិស្សនិស្សិតទៅតាមអ្វីដែលគេចង់បាន។
កញ្ញា ហ្វា អ៊ីហ្សះ មានប្រសាសន៍ថា ៖ «អ៊ីចឹងអ្នកខ្លះគេអត់ទាន់ស្គាល់ថា អ្វីទៅជាអ៊ិនធឺណេត ឬក៏ការបើកអ៊ិនថឹណិត អីយ៉ាងម៉េចៗ ការ(ស្រាវជ្រាវ)មេរៀន អត្ថបទអីទាក់ទងនឹងការរៀនរបស់ពួកគេ អ៊ីចឹងអ្នកខ្លះអត់ទាន់ស្គាល់ អត់ទាន់ចេះ(ស្រាវជ្រាវរក)ទេ»។
និស្សិតមួយចំនួននៅក្នុងទីក្រុងភ្នំពេញ បានលើកឡើងថា វិស័យព័ត៌មានវិទ្យា និង Internet ជាផ្នែកមួយដែលជំរុញឲ្យមនុស្សមានការយល់ដឹងច្រើនអំពីសង្គម និងហេតុការណ៍ដែលកើតមានឡើងនៅទូទាំងសកលលោក និងធ្វើឲ្យសង្គមឈានទៅរកភាពរីកចម្រើន ដូចបណ្តាប្រទេសដែលកំពុងជឿនលឿននាពេលបច្ចុប្បន្នផងដែរ។
កាលពីថ្ងៃទី២៧ មិថុនា ក្រុមហ៊ុនInternet ឈ្មោះថា Angkorone.com ដែលជាក្រុមហ៊ុនថ្មីមួយ មានស្នាក់ការធំនៅសហរដ្ឋអាមេរិក បានរៀបចំកម្មវិធីសម្ពោធគេហទំព័រក្រុមហ៊ុន Website Angkorone ឲ្យប្រើប្រាស់ជាផ្លូវការនៅឯសកលវិទ្យាល័យបញ្ញាសាស្រ្ត ដែលមានអ្នកចូលរួមដូចជា និស្សិត សិល្បករ ម្ចាស់ហាងអ៊ិនថឹណិត វិនិយោគិន និងអ្នកសារព័ត៌មានរាប់រយនាក់។
នាយកប្រតិបត្តិនៃក្រុមហ៊ុន Angkorone លោក ព្រាប កុល មានប្រសាសន៍ថា ការបង្កើតក្រុមហ៊ុននេះឡើង គឺដើម្បីចង់ឲ្យខ្មែរនៅលើសកលលោកមានការទាក់ទងគ្នា និងរួបរួមគ្នាតែមួយ ពិសេសគឺចង់ឲ្យសេវា Internet នៅប្រទេសកម្ពុជា មានការកែប្រែ ពីព្រោះ Internet អាចជួយអភិវឌ្ឍសង្គមផ្នែកសេដ្ឋកិច្ច និងផ្នែកអប់រំដល់ពលរដ្ឋកម្ពុជា។
លោក ព្រាប កុល បានបញ្ជាក់ប្រាប់អំពីការដាក់ឈ្មោះ Website: Angkorone ដូច្នេះថា ៖ «មូលហេតុសំខាន់ ដោយសារអង្គរគឺជាអ្វីដែលខ្មែរយើងទាំងអស់ស្គាល់ មិនតែខ្មែរទេ គឺពិភពលោកស្គាល់ យើងមានមោទនភាព ហើយ One មានន័យថា យើងចង់ឲ្យខ្មែរទាំងអស់គ្រប់មជ្ឈដ្ឋានខ្មែរតែមួយ កុំឲ្យមានខ្មែរច្រើនប្រភេទ យើងចង់ឲ្យទាំង់អស់គ្នារួបរួមជាខ្មែរតែមួយ។ ទី២ គឺយើងចង់ធ្វើឲ្យវ៉ឹបសៃថ៍នេះ គឺជាវ៉ឹបសៃថ៍លេខ១ របស់ខ្មែរនៅទូទាំងពិភពលោក»។
លោក ព្រាប កុល បានបន្តថា ទិសដៅមួយផ្សេងទៀតរបស់ក្រុមហ៊ុន គឺដើម្បីរួមចំណែកក្នុងការអភិវឌ្ឍសង្គម ដោយមើលឃើញថាវិស័យព័ត៌មានវិទ្យា និងការប្រើប្រាស់ Internet នៅមានកម្រិតទាបនោះ គឺក្រុមហ៊ុនរបស់លោកនឹងធ្វើការបង្កើតមធ្យោបាយថ្មីមួយ ដែលតាមរយៈនេះ ខ្មែរនៅទូទាំងពិភពលោកអាចរួមចំណែកធ្វើឲ្យប្រទេសមានការរីកចម្រើននិងរឹងមាំជាងមុន។
លោក ព្រាប កុល មានប្រសាសន៍បន្តដូច្នេះ ៖ «ប្រជាពលរដ្ឋខ្មែរយើងប្រើប្រាស់វ៉ឹបសៃថ៍នេះដោយឥតគិតថ្លៃ យើងមានការ charge ខ្លះៗទៅលើក្រុមហ៊ុន ឬក៏វិនិយោគទុនដែលគាត់ត្រូវការផ្សព្វផ្សាយនៅក្នុងវ៉ឹបសៃថ៍របស់យើង។ ព័ត៌មានវិទ្យានៅស្រុកខ្មែរយើងនៅមានកម្រិតទាប ចង់ឃើញមាតុភូមិ ប្រជាពលរដ្ឋយើងរីកចម្រើនលឿន យើងមិនអង្គុយរង់ចាំដល់វិស័យអ៊ិនធឺណេតហ្នឹង មានការរីកចម្រើនបានយើងធ្វើទេ យើងនាំគ្នាធ្វើដើម្បីជំរុញការប្រើប្រាស់អ៊ិនធឺណេត បានជឿនលឿនទៅមុខដែលខ្មែរយើងអាចឈានយកប្រយោជន៍ពីអ៊ិនថឹណិត ដូចបណ្ដាប្រទេសអភិវឌ្ឍន៍ដទៃទៀត»។
និស្សិតមួយរូបឈ្មោះ ជុំ សុគារ៉ា មានប្រសាសន៍ថា បញ្ហាចម្បងរបស់សិស្សនិសិ្សតគឺ ពុំមានសមត្ថភាព និងលទ្ឋភាពប្រើប្រាស់ Internet ដែលមកពីវ័ស័យបច្ចេកវិទ្យានៅស្រុកខ្មែរមិនសូវរីកចម្រើន និងតម្លៃនៃការប្រើប្រាស់ Internet នៅថ្លៃនៅឡើយ ដែលជាបញ្ហាធ្វើឲ្យនិស្សិតកំពុងជួបប្រទះ។
និស្សិត ជុំ សុគារ៉ា មានប្រសាសន៍ដូច្នេះ ៖ «ក្នុងនាមខ្ញុំជានិស្សិត ខ្ញុំសង្ឃឹមថា ខ្ញុំនឹងបានទទួលព័ត៌មាន ឬក៏ឱកាសធ្វើការងារណាមួយឲ្យសមស្របចំពោះខ្ញុំ ក្នុងការទៅទស្សនានូវវ៉ឹបសៃថ៍របស់ angkorone.com»។
តំណាងយុវជនឈានមុខ ក៏បានមានប្រសាសន៍នៅក្នុងកម្មវិធីសម្ពោធនោះដែរថា យុវជនខ្មែរជាសសរទ្រូងរបស់ប្រទេសជាតិ ដូច្នេះយុវជនមានការយល់ដឹងផ្នែកសង្គមបានច្រើន លុះត្រាវិស័យបច្ចេកវិទ្យាក្នុងប្រទេសមានលក្ខណៈទូលំទូលាយ ដើម្បីបង្កការងាយស្រួលដល់យុវជន ពិសេសយុវជនក្រីក្រ ៖ «ម្យ៉ាងវិញទៀតដោយសារយើងជាយុវជនខ្មែរ ភាគច្រើនយុវជនខ្មែរតែងតែចង់បានឱកាស ឧទាហរណ៍ទៅរៀននៅប្រទេសក្រៅ»។
តារាភាពយន្តខ្មែរ លោក ហម ឈូរ៉ា មានប្រសាសន៍ថា ក្រុមហ៊ុន Angkorone.com ជាក្រុមហ៊ុន Internet មួយ ដែលបានរួមចំណែកក្នុងការផ្សព្វផ្សាយវប្បធម៌និងប្រពៃណីខ្មែរ ដើម្បីឲ្យពិភពលោកបានដឹងនិងបានស្គាល់។
ម្ចាស់ក្រុមហ៊ុន Angkorone ជាជនខ្មែររស់នៅសហរដ្ឋអាមេរិក គឺលោកSteven Path (ស្ទេវិន ផាត់) បានបើកក្រុមហ៊ុនសេវា Internet ដំបូងគេនៅកម្ពុជា មានប្រសាសន៍ថា គេហទំព័រនេះ លោកមានគោលបំណងឲ្យក្លាយជាគេហទំព័រខ្មែរ និងជាគេហទំព័រទេសចរណ៍កម្ពុជា លេខ១ របស់ខ្មែរនៅក្នុងពិភពលោក។ លោកជាសហគ្រិនសង្គមមួយរូប លោកមានការប្តេជ្ញាចិត្តដើម្បីបរិច្ចាគប្រាក់ចំណេញមួយផ្នែកធំ ក្នុងការចូលរួមអភិវឌ្ឍសង្គម និងជំរុញសហគមន៍កម្ពុជា ឲ្យចូលរួមក្នុងបុព្វហេតុនេះ។
នាយកប្រតិបត្តិនៃក្រុមហ៊ុន Angkorone លោក ព្រាប កុល បានឲ្យដឹងទៀតថា ក្រុមហ៊ុននេះមានទីស្នាក់ការធំនៅរដ្ឋម៉ានីសូតា សហរដ្ឋអាមេរិក និងបានមកបើកសាខាចំនួនពីរកន្លែងទៀតកម្ពុជា កាលពីដើមឆ្នាំ២០០៩ នេះ គឺរួមមានក្រុងភ្នំពេញ និងខែត្រសៀមរាប។ ហើយបុគ្គលិកលើសពី ៩០% ក្នុងចំណោមបុគ្គលិក ១៤នាក់ មានចំណែកភាគហ៊ុនក្នុងក្រុមហ៊ុននេះ។
លោកបន្តទៀតថា ប្រាក់ចំណេញមួយផ្នែកនឹងបរិច្ចាគជួយដល់សង្គម ដូចជាក្រុមហ៊ុនគ្រោងនឹងទិញមួកសុវត្ថិភាព ដើម្បីយកទៅចែកជូនប្រជាពលរដ្ឋក្រីក្រគ្មានលទ្ធភាពទិញមួកសុវត្ថិភាព និងគ្រោងប្រមូលសៀវភៅ កុំព្យូទ័រ ពីប្រទេសអាមេរិក, កាណាដា ប្រទេសផ្សេងៗទៀត នឹងយកមកបើកជាបណ្ណាល័យសម្រាប់ឲ្យសិស្សនិស្សិតប្រើប្រាស់ដោយឥតគិតថ្លៃ ហើយនិងទិញធុងចម្រោះទឹកស្អាតចែកជូនប្រជាពលរដ្ឋក្រីក្រនៅក្នុងប្រទេសកម្ពុជាផងដែរ។
លោកបញ្ជាក់ថា កម្មវិធីទាំងនេះក្រុមហ៊ុនកំពុងកំណត់គោលដៅថា តើនឹងជួយនៅតំបន់ណាខ្លះ? ហើយប្រជាពលរដ្ឋរស់នៅក្នុងនិងក្រៅប្រទេសអាចជួយដល់កម្មវិធីទាំងបីនេះបានតាមរយៈក្រុមហ៊ុនរបស់លោក។
រដ្ឋមន្រ្តីក្រសួងប្រៃសណីយ៍ និងទូរគមនាគមន៍ លោក សូ ឃុន មិនបានបំភ្លឺជុំវិញនឹងសំណួរដែលថា តើវិស័យព័ត៌មាន និង Internet មានការរីកចម្រើនដល់កម្រិតណានៅកម្ពុជា? ហើយក្រុមហ៊ុន Internet ទាំងអស់នៅកម្ពុជាមានចំនួនប៉ុន្មាននោះទេ?៕