លោក កឹម សុខា ប្រធានគណបក្សសិទ្ធិមនុស្សបានថ្លែងយ៉ាងដូច្នេះនៅចំថ្ងៃ៧ ខែមករា ឆ្នាំ២០០៩ ៖ «ដោយសារពិសោធន៍ពីអតីតកាលមកថា បើយើងអត់រួម អត់ឈ្នះគណបក្សប្រជាជនទេ។ ទី២ បើគាត់យល់ស្របបើយើងអត់រួមអត់ឈ្នះគណបក្សប្រជាជនដូចគ្នា តើនៅសល់ហេតុផលអីទៀត? កុំឲ្យមានការសង្ស័យគ្នា សំខាន់ការទុកចិត្តគ្នា។ យើងនឹងពន្យល់គ្នាទៅវិញទៅមកពីហេតុផល ហើយពេលហ្នឹងគឺយើងអាចលើកឡើងអំពីប្រព័ន្ធនៅក្នុងការដឹកនាំរបស់គណបក្ស ដោយខ្ញុំនឹងគាំទ្រឯកឧត្ដម សម រង្ស៊ី ធ្វើប្រធាន គឺខ្ញុំសុខចិត្តឲ្យគាត់ធ្វើប្រធានសម្ព័ន្ធ ហើយបើថាគាត់ចង់ធ្វើជាបេក្ខជននាយករដ្ឋមន្ត្រីសម្រាប់សម្ព័ន្ធហ្នឹង ខ្ញុំគាំទ្រឲ្យគាត់ធ្វើបេក្ខជននាយករដ្ឋមន្ត្រីទៀត»។
គម្រោងជួបចរចាបង្កើតសម្ពន្ធ័ភាពនេះ ប្រធានគណបក្សសមរង្ស៊ីមិនអាចទាក់ទងបានដោយលោកនៅក្រៅប្រទេស។ ប៉ុន្តែអគ្គលេខាធិការគណបក្សសមរង្ស៊ី លោកស្រី កែ សុវណ្ណារ័ត្ន មានប្រសាសន៍ថា ៖ «យើងមិនចង់បានសម្ព័ន្ធភាពមួយគ្រាន់តែបង្កើតឡើងមកមានជារូបរាង ហើយវាស្លាប់នៅថ្ងៃណាមួយទេ។ សម្ព័ន្ធភាពទៅថ្ងៃមុខគឺជាសម្ព័ន្ធភាពរឹងមាំ សម្ព័ន្ធភាពដែលមានគោលជំហរ ដែលមានគោលដៅ និងមានចក្ខុវិស័យច្បាស់លាស់»។
ជុំវិញគម្រោងបង្កើតសម្ព័ន្ធភាពគណបក្សសមរង្ស៊ីនិងគណបក្សសិទ្ធិមនុស្សនេះ លោក គល់ បញ្ញា នាយកប្រតិបត្តិនៃអង្គការខុមហ្រ្វែលមានប្រសាសន៍ថា ការចងសម្ព័ន្ធភាពនៃគណបក្សនោះជាឧត្តមគតិល្អក្នុងការធ្វើឲ្យចំណេញផលប្រយោជន៍គណបក្ស ប៉ុន្តែសម្ព័ន្ធភាពនោះត្រូវមានគោលដៅច្បាស់លាស់ទើបអាចសម្រេចបានជោគជ័យ។
លោក គល់ បញ្ញា បានមានប្រសាសន៍ថា ៖ «ការចងគ្នាវាដូចកាំបិតមុខពីរដែរ បើចងគ្នាវាជាប់វាល្អ បើចងគ្នាមិនជាប់ វាអាចធ្វើឲ្យមានអ្នកគាំទ្រហ្នឹងគេមិនទុកចិត្តអីអ៊ីចឹងទៅ»។
តំណាងគណបក្សសមរង្ស៊ី ប្រធានគណបក្សសិទ្ធិមនុស្ស និងនាយកអង្គការខុមហ្រ្វែល សុទ្ធតែនិយាយថាបទពិសោធន៍នៃការចងសម្ព័ន្ធភាពដែលបង្កើតភ្លាមៗមិនរៀបចំចងក្រងឲ្យមានគោលការណ៍ច្បាស់លាស់និងមិនប្រុងប្រយ័ត្នទៅកិច្ចការផ្ទៃក្នុងរបស់សម្ពន្ធ័ភាពបានធ្លាក់ចុះជំនឿទុកចិត្តពីអ្នកស្រឡាញ់លទ្ធិប្រជាធិបតេយ្យ ប្រសិនបើមេគណបក្សទន់ជ្រាយជំហររបស់ខ្លួន ងាករេម្តងទៅនេះម្តងទៅនោះនាំឲ្យបាត់សំឡេងអ្នកគាំទ្រប្រជាធិបតេយ្យ។
សូមជម្រាបថា អាសនៈសភាលើកទី៤ ឆ្នាំ២០០៨ គណបក្សប្រជាជនកម្ពុជាទទួលបាន៩០អាសនៈ គណបក្សសមរង្ស៊ីទទួលបាន២៦អាសនៈ គណបក្សហ៊្វុនស៊ិនប៉ិចទទួលបាន២អាសនៈ គណបក្សសិទ្ធិមនុស្សទទួលបាន៣អាសនៈ និងគណបក្ស នរោត្តម រណឫទ្ធិ ទទួលបាន២អាសនៈ៕