កាសែតខ្មែរម្ចាស់ស្រុក ដែលបានផ្អាកការចេញផ្សាយរយៈពេលជាង ៩ខែ កន្លងមក ដោយសារក្ស័យធុននោះ បានចេញផ្សាយជាថ្មីនៅថ្ងៃទី២១ ខែមីនា ឆ្នាំ២០១១ ចំនួន ១៥០០ច្បាប់ ចំណាយថវិកាអស់ជាងចំនួន ១០០ដុល្លារអាមេរិក។
ចាងហ្វាងកាសែតខ្មែរម្ចាស់ស្រុកលោក ហង្ស ចក្រា មានប្រសាសន៍បញ្ជាក់ថាកាសែតនេះ បានផ្អាកការចេញផ្សាយនៅខែមិថុនា ឆ្នាំ២០១០ រហូតដល់ខែថ្ងៃទី២០ ខែមីនា ឆ្នាំ២០១១។ កាសែតនេះ មានចំនួន ៤ទំព័រ រូបភាពសខ្មៅ ចេញផ្សាយប្រចាំថ្ងៃ ដោយផ្ដោតលើបញ្ហានយោបាយ បញ្ហាសង្គម និងការអប់រំ និងមាននិន្នាការរិះគន់រដ្ឋាភិបាលដើម្បីស្ថាបនា ប៉ុន្តែលោកបញ្ជាក់ថា មិនមែនជាកាសែតរបស់គណបក្សប្រឆាំងសមរង្ស៊ីទេ។
ចាងហ្វាងកាសែតខ្មែរម្ចាស់ស្រុក លោក ហង្ស ចក្រា អាយុ៥៧ឆ្នាំ ដែលកាសែតរបស់លោកបានបង្កើតនៅឆ្នាំ២០០៧ កន្លងមក បានមានប្រសាសន៍ប្រាប់វិទ្យុអាស៊ីសេរីនៅថ្ងៃទី២១ ខែមីនា ថាកាសែតរបស់លោក មានជំហរឯករាជ្យ ហើយការចេញផ្សាយនេះ គឺចេញថវិកាផ្ទាល់ខ្លួន ៖ "គេតែងតែនិយាយថា កាសែតរបស់ខ្ញុំនេះមាននិន្នាការគាំទ្រគណបក្សប្រឆាំង។ ប៉ុន្តែជាគោលការណ៍របស់ខ្ញុំ កាសែតរបស់ខ្ញុំ គឺរិះគន់ក្នុងន័យស្ថាបនាដដែល។ ប្រកាន់ជំហរឯករាជ្យ មិនលំអៀងទៅរកបក្សនយោបាយណាមួយទេ"។
ប្រធានផ្នែកអភិវឌ្ឍន៍ប្រព័ន្ធផ្សព្វផ្សាយលោក ណុប វី បានមានប្រសាសន៍អត្ថាធិប្បាយថា ការរិះគន់របស់កាសែតនេះ គឺជាការកែលម្អសង្គម ៖ "ចូលរួមចំណែកក្នុងការធ្វើឲ្យការអនុវត្តការងារខ្លះរបស់មន្ត្រីរដ្ឋាភិបាល មានភាពកាន់តែប្រសើរឡើង។ មួយចំណុចទៀត យើងឃើញថា ការចេញផ្សាយឡើងវិញនេះ គឺជាការរួមចំណែកមួយនៅក្នុងការលើកស្ទួយសេរីភាពនៃការបញ្ចេញមតិ សម្រាប់ប្រទេសកម្ពុជាយើងដែរ"។
លោក ហង្ស ចក្រា ធ្លាប់ត្រូវបានតុលាការក្រុងភ្នំពេញកាត់ទោសកាលពីខែមិថុនា ឆ្នាំ២០ ០៩ កន្លងទៅ ឲ្យជាប់គុក ១២ខែ និងផាកពិន័យចំនួន ៩លានរៀល ស្មើនិង ២២៥០ដុល្លារអាមេរិក ក្រោមបទចោទថា លោកបានផ្សាយព័ត៌មានមិនពិត និងបរិហារកេរ្តិ៍ ដោយសារតែលោកបានផ្សាយព័ត៌មានមួយចំនួន ចោទប្រកាន់មន្ត្រីរដ្ឋាភិបាលកម្ពុជាប្រព្រឹត្តិអំពើពុករលួយ និងបក្សពួកនិយម។
ប៉ុន្តែក្រោយមក លោក ហង្ស ចក្រា ត្រូវបានព្រះមហាក្សត្រ ព្រះបរមនាថ នរោត្តម សីហមុនី បានប្រទានការលើកលែងទោស ដោះលែងឲ្យមានសេរីភាពនៅថ្ងៃទី១៣ ខែមេសា ឆ្នាំ២០១០ តាមសំណើរបស់រដ្ឋាភិបាលកម្ពុជា ក្រោយពីលោកបានជាប់ពន្ធនាគារចំនួនជាង ៧ខែ ស្មើ២ភាគ៣ នៃទោសសរុប ១២ខែ។
គេបានកត់សំគាល់ឃើញថា តាំងពីឆ្នាំ២០០៨ មក មានអ្នកកាសែតជាច្រើនបានរងការប្ដឹងក្រោមបទបរិហារកេរ្តិ៍ និងផ្សាយព័ត៌មានមិនពិត នៅក្នុងនោះ មានដូចជាចាងហ្វាងកាសែតខ្មែរម្ចាស់ស្រុក លោក ហង្ស ចក្រា ចាងហ្វាងកាសែតមនសិការខ្មែរ លោក ដាំ សិទ្ធិ អ្នកយកព័ត៌មានឌឺខែមប៊ូឌែដេលី (The Cambodia Daily) និងលោក រស់ សុឃិត ជាដើម៕