លោក សយ សុភាព អ្នកវិភាគនយោបាយរបស់ទូរទស្សន៍ CTN បានប្រាប់ថានេះជាដំណឹងថ្មីដែលលោកបានចេញផ្សាយកាលពីយប់មិញ ។
លោក សយ សុភាព បានមានប្រសាសន៍ថា ៖ «នៅថ្ងៃ១៤ ខែមិថុនាហ្នឹង សម្ដេចលោកសរសេរលិខិតជូនទៅលោកប្រធានតុលាការក្រុងភ្នំពេញ ក្នុងឋានៈលោកជានាយករដ្ឋមន្ត្រីនៃព្រះរាជាណាចក្រកម្ពុជា សុំធានាលោក ដាំ សិទ្ធិ ឲ្យឋិតនៅក្រៅឃុំជាបណ្ដោះអាសន្ន» ។
សម រង្ស៊ី អបអរចំពោះការចេញមុខអន្តរាគមន៍ពីសំណាក់នាយករដ្ឋមន្ត្រី
ដំណឹងចុងក្រោយនេះក៏បានទទួលការអបអរសាទរពីលោកប្រធាននៃគណបក្សសមរង្ស៊ីដែលលោកដាំ សិទ្ធិ គឺជាបេក្ខជនមួយរូបសំខាន់សម្រាប់មណ្ឌលភ្នំពេញនោះផងដែរ ។ លោក សម រង្ស៊ី បានប្រាប់វិទ្យុអាស៊ីសេរីកាលពីយប់មិញនេះថា នេះជាជោគជ័យរបស់អង្គការនានា ។
លោក សម រង្ស៊ី បានឲ្យដឹងថា ៖ «ជាព័ត៌មានល្អ មានន័យថាអង្គការក្រៅរដ្ឋាភិបាល អង្គការសិទ្ធិមនុស្ស ទាំងនៅប្រទេសកម្ពុជា ទាំងនៅឯនាយសមុទ្រ គឺបានធ្វើការប្រកបដោយជោគជ័យ ។ គេបានជំរុញឲ្យរដ្ឋាភិបាលគោរពច្បាប់ គោរពនីតិវិធីតុលាការខ្លួនឯង ហើយគោរពសិទ្ធិសេរីភាពសារព័ត៌មាន កុំគំរាមកំហែងបេក្ខជនមកពីគណបក្សប្រឆាំងដែលកំពុងតែត្រូវតែឃោសនាបោះឆ្នោតបន្តិចទៀតនេះ» ។
ថ្វីបើលោកបានសម្តែងក្តីរីករាយដែលសមាជិកបក្សនិងជាបេក្ខជនសំខាន់របស់លោក អាចនឹងបានធានាឲ្យចេញផុតពីការឃុំឃាំង លោកប្រធានគណបក្សប្រឆាំងក៏នៅតែបារម្ភថា អាចនឹងមានល្បិចកលផ្សេងទៀតប្រឆាំងនឹងបក្សលោក ។
លោក សម រង្ស៊ី បានមានប្រសាសន៍ថា ៖ «តែយើងត្រូវតែប្រុងប្រយ័ត្នក្រែងលោចប់រឿងមួយបង្កើតរឿងមួយទៀត ក្នុងស្មារតីរញ៉េរញ៉ៃអត់គោរពច្បាប់ ផ្ដាច់ការ ប្រមូលផ្ដុំកម្លាំង ប្រមូលផ្ដុំអំណាចដាក់នៅក្នុងតែកណ្ដាប់ដៃខ្លួនហ្នឹង មិនល្អទេទម្លាប់ហ្នឹង» ។
លោក សម រង្ស៊ី ក៏ចង្អុលឲ្យឃើញថា បើសិនជាលោកចាងហ្វាងកាសែត ដាំ សិទ្ធិ អាចបានទទួលសេរីភាពនៅក្រៅឃុំនៅប្រមាណជាថ្ងៃអាទិត្យនេះមែន គឺវានឹងសឲ្យឃើញថាកម្ពុជាឋិតនៅក្រោមអំណាចផ្តាច់មុខរបស់បុរសតែមួយរូប ។
លោក សម រង្ស៊ី បានបញ្ជាក់ថា ៖ «មានន័យថាឥឡូវនេះអំណាចនៅប្រទេសកម្ពុជាយើង គឺប្រមូលផ្ដុំនៅលើកណ្ដាប់ដៃតែមនុស្សម្នាក់ គឺលោក ហ៊ុន សែន តែម្ដង ។ គាត់ចង់ធ្វើភ្លៀងធ្វើផ្គរ គាត់ចង់រំលងស្ថាប័នផ្សេងៗ ដូចជាតុលាការ ដូចជារដ្ឋសភា គាត់ចង់រំលង គាត់ចង់សម្រេចអីស្រេចតែចិត្តគាត់» ។
សូមរំឭកថា លោក ដាំ សិទ្ធិ ដែលជាចាងហ្វាងនិងនិពន្ធនាយករបស់កាសែតមនសិការខែ្មរ និងជាបេក្ខជនតំណាងរាស្រ្តលំដាប់លេខ៦របស់គណបក្សសមរង្ស៊ី សម្រាប់មណ្ឌលភ្នំពេញ បានត្រូវអាជ្ញាធរប៉េអឹមចាប់ខ្លួននិងបញ្ជូនទៅគុកព្រៃស កាលពីថៃ្ងអាទិត្យ ទី៨ មិថុនា មកទល់ថ្ងៃនេះពេញមួយសប្តាហ៍ហើយ ដោយលោកត្រូវលោកឧបនាយករដ្ឋមន្រ្តី ហោ ណាំហុង រដ្ឋមន្រ្តីក្រសួងការបរទេសកម្ពុជា ប្តឹងពីបទបរិហារកេរ្តិ៍ និងផ្សាយព័ត៌មានមិនពិត ក្នុងការបោះពុម្ពផ្សាយថា លោក ហោ ណាំហុង ជាអតីតមេគុកបឹងត្របែក ៕