ប្រធានគណបក្សប្រឆាំង លោក សម រង្ស៊ី បានមានប្រសាសន៍ថា រដ្ឋាភិបាលត្រូវតែបញ្ឈប់ការលុបបឹងនៅក្នុងទីក្រុងភ្នំពេញដើម្បីយកដីទៅអភិវឌ្ឍរួមមានបឹងប្រយ៉ាប បឹងកក់ និងបឹងពោងពាយ ហើយធ្វើការថែរក្សាបឹងទាំងនោះដើម្បីស្តុកទឹកកុំឲ្យមានការលិចលង់។
លោក សម រង្ស៊ី បានឲ្យដឹងផងដែរថា ការលិចលង់នឹងកាន់តែមានសភាពធ្ងន់ធ្ងរថែមទៀតទៅថ្ងៃខាងមុខនៅពេលបឹងកក់ត្រូវបានលុបបាត់នោះ។
លោក សម រង្ស៊ី បានឲ្យដឹងថា ៖ «យើងដាក់សំណួរទៅរដ្ឋាភិបាល ធ្វើញត្តិហៅតំណាងរដ្ឋាភិបាលមកឆ្លើយ។ បើមិនបានលទ្ធផលទេយើងនឹងធ្វើបាតុកម្ម យើងនឹងអញ្ចើញប្រជាពលរដ្ឋអ្នករងគ្រោះទាំងអស់នៅទីក្រុងភ្នំពេញធ្វើបាតុកម្មទាមទារឲ្យក្រុមហ៊ុននោះបញ្ចប់សកម្មភាពលុបបឹង បញ្ចប់ជាបន្ទាន់ បើមិនយ៉ាងដូច្នេះទេគឺប្រជាពលរដ្ឋមិនសុខចិត្តទេ»។
អភិបាលរងខណ្ឌឬស្សីកែវ លោក កូប ស្លេស បានច្រានចោលពាក្យចោទប្រកាន់របស់មេដឹកនាំគណបក្សប្រឆាំង ហើយថាមូលហេតុដែលបណ្ដាលឲ្យមានការជន់លិចនៅក្នុងខណ្ឌនេះក៏ដោយសារមានភ្លៀងធ្លាក់ច្រើនក្នុងរាជធានីភ្នំពេញក្នុងរដូវវស្សានេះ និងដោយសារមានការចាក់ដីលុបធ្វើឲ្យកាត់ផ្ដាច់ប្រព័ន្ធបង្ហូរទឹកចូលទៅប្រឡាយរំដោះទឹក រួមមានប្រឡាយអូរវែង ប្រឡាយបាក់ទូក ប្រឡាយកប់ស្រូវ និងប្រឡាយ៥៩៨ ដែលប្រឡាយទាំងនោះត្រូវភ្ជាប់ទៅនឹងទំនប់កប់ស្រូវ។
លោក កូប ស្លេស ក៏បានឲ្យដឹងទៀតថា ការលុបបឹងកក់មិនបានប៉ះពាល់ដល់ការលិចលង់នោះឡើយ ហើយថាបឹងកក់ជាបឹងងាប់លែងមានពាក់ព័ន្ធជាមួយនឹងប្រព័ន្ធបង្ហូរទឹកខាងក្រៅទេ។
លោក កូប ស្លេស បានមានប្រសាសន៍ថា ៖ «យើងមិនដែលស្គាល់ភូមិសាស្ត្រ យើងចេះតែនិយាយបានហើយ និយាយរបៀបជាម៉្យាង និយាយមិនមែនជាអ្នកស្ថាបនាទេ និយាយរបៀបជាអ្នករិះគន់ អាចនិយាយបាន ប៉ុន្តែសូមឲ្យគាត់អ្នកនិយាយហ្នឹងទៅមើលភូមិសាស្ត្រផង តើទំហំទឹកដែលមកលិចលង់នៅឫស្សីកែវយើង ពិសេសខាងជើងភ្នំពេញតំបន់ឫស្សីកែវ តើវាមកពីណាខ្លះ?»។
លោក កូប ស្លេស បានឲ្យដឹងផងដែរថា ទឹកបានស្រកបណ្ដើរៗហើយបន្ទាប់ពីអាជ្ញាធរបានរំដោះទឹកដោយការបង្ហូរចូលទៅក្នុងទន្លេ ហើយថាទឹកនឹងបន្តស្រកអស់ក្នុងរយៈពេលមួយសប្ដាហ៍ បើសិនជាគ្មានភ្លៀងធ្លាក់បន្ថែមទៀត។
លោកបានបន្តថា រហូតមកទល់នឹងពេលនេះទឹកដែលកំពុងជន់លិចចាប់ពីភូមិស្វាយប៉ាករហូតដល់ទំនប់កប់ស្រូវនឹងមិនស្រកឡើយប្រសិនណាបើគេនៅតែមិនអាចខួងលូដែលស្ថិតក្នុងភូមិលូ សង្កាត់ស្វាយប៉ាក ផ្លូវជាតិលេខ៥នោះ ដើម្បីរំដោះទឹកចូលទន្លេបាន។
គួរជម្រាបថា ខណ្ឌឫស្សីកែវកំពុងតែទទួលរងការលិចលង់អស់រយៈពេលជាងពីរខែមកហើយ ហើយប្រជាពលរដ្ឋមួយចំនួនត្រូវធ្វើដំណើរតាមទូក ហើយមួយចំនួនត្រូវមករស់នៅក្នុងតង់ដោយសារផ្ទះរបស់ពួកគាត់ត្រូវបានលិចលង់។
តំបន់ដែលកំពុងរងការលិចលង់ខ្លាំងជាងគេមានតំបន់ពោធិ៍ចិនតុង ផ្លូវភ្នំពេញថ្មី ផ្លូវហាណូយ តំបន់បឹងប្រយ៉ាប ទឹកថ្លា ផ្សារតូច ទួលសង្កែ និងតំបន់ទួលគោកជាដើម៕