ប្រជាពលរដ្ឋបាននិយាយថា គេបានឮសូរសំឡេងគ្រាប់ផ្លោងជាច្រើនគ្រាប់កាលពីវេលាម៉ោងប្រមាណជា១១ព្រឹកពីលើខ្នងភ្នំថ្មរយដែលជាកន្លែងទាហានថៃមួយក្រុមបានបោះជំរំនៅ។
អ្នកភូមិបាននិយាយទៀតថា គ្រាប់កាំភ្លើងធំមួយចំនួនបានធ្លាក់ចូលមកក្នុងទឹកដីខ្មែរចម្ងាយប្រមាណ៣គីឡូម៉ែត្រពីភូមិប្រជាពលរដ្ឋបណ្តាលឲ្យប្រជាពលរដ្ឋខ្មែរខ្លះដែលរស់នៅក្បែរៗនោះមានការភិតភ័យនាំគ្នារត់រកកន្លែងសុវត្ថិភាព ៖ «ពួកទាហានថៃនៅភ្នំថ្មរយវាបាញ់។ ប្រជាពលរដ្ឋនៅនេះឮទាំងអស់... កាំភ្លើងធំ... ធ្លាក់លើភ្នំផង មកធ្លាក់ឯក្រោមភ្នំប្រហែលជា១០គ្រាប់... ប្រជាពលរដ្ឋដែលនៅនេះប្រមូលកូនចៅមកនៅជុំគ្នា»។
ទោះជាយ៉ាងណាមិនអាចទំនាក់ទំនងមន្ត្រីយោធាថៃដើម្បីសុំការបំភ្លឺជុំវិញបញ្ហានោះបានទេ។
តាមមន្ត្រីយោធាព្រំដែនខ្មែរនៃកងពលតូចលេខ៤២ប្រចាំការនៅតំបន់ប្រាសាទតាមាន់និងតាក្របីបានឲ្យដឹងកាលពីវេលាម៉ោង១២ថ្ងៃត្រង់ថ្ងៃអង្គារថា គេបានឮសំឡេងកាំភ្លើងធំបាញ់ជាច្រើនគ្រាប់មែន ក៏ប៉ុន្តែគេនៅមិនទាន់ហ៊ានអះអាងពីមូលហេតុនៃការបាញ់នោះយ៉ាងណានៅឡើយទេ ដោយកំពុងតែបញ្ជូនកម្លាំងយោធាមួយចំនួនចូលទៅពិនិត្យឲ្យបានច្បាស់លាស់សិន។
មន្ត្រីយោធាដដែលបានបញ្ជាក់ថា ៖ «មានៗ កាំភ្លើងធំ កាំភ្លើងផ្លោង អត់ទាន់ច្បាស់ខ្ញុំអត់ទាន់ជម្រាបជូនបាន កម្លាំងខ្ញុំកំពុងតែចូលទៅពិនិត្យ»។
មេបញ្ជាការរងភូមិភាគនៃកងយោធពលខេមរភូមិន្ទប្រចាំទិសឧត្តរ លោកឧត្តមសេនីយ៍ត្រី ពៅ ហេង គ្រាន់តែមានប្រសាសន៍តាមទូរស័ព្ទយ៉ាងខ្លីថា ពិតជាមានសំឡេងផ្ទុះក៏ប៉ុន្តែរង់ចាំកម្លាំងមួយក្រុមដែលបានបញ្ជូនទៅពិនិត្យសិនទើបដឹងថាយ៉ាងណា ៖ «ហ្នឹងហើយកំពុងតែរវល់ទៅពិនិត្យ»។
រហូតមកដល់ម៉ោងជាង២រសៀលកងទាហានខ្មែរនៅតែមិនទាន់អាចបញ្ជាក់អំពីមូលហេតុច្បាស់លាស់នៃការបាញ់នោះទេ ក៏ប៉ុន្តែកងទាហានបានអះអាងថា ពុំមានអ្នកណាម្នាក់រងគ្រោះថ្នាក់និងរងរបួសដោយសារគ្រាប់ផ្លោងនោះឡើយ។
ចំណែកនៅឯតំបន់ជម្លោះព្រំដែនជិតប្រាសាទព្រះវិហារឯណោះវិញមានសេចក្តីរាយការណ៍ថា ទាហានឈុតខ្មៅថៃជាង៣០នាក់បានចូលទៅក្នុងទីវត្តខ្មែរកែវសិក្ខាគិរីស្វៈរៈជាច្រើនម៉ោង ហើយហាមឃាត់ព្រះសង្ឃមិនឲ្យសាងសង់បន្ទប់ទឹកថ្មីនិងពង្រីកសាលាឆាន់ទេ ហើយចាប់តាំងពីម៉ោងជាង១រសៀលមេបញ្ជាការទាហានខ្មែរបានចេញបញ្ជាឲ្យពលទាហានប្រុងប្រយ័ត្ននិងមិនឲ្យចេញដើរចោលខ្សែត្រៀមទេបន្ទាប់ពីបានទទួលព័ត៌មាននៃការបាញ់ផ្លោងនោះ៕