អធិការនគរបាលស្រុកត្រពាំងប្រាសាទ លោក កែវ ប៉ាន់ បានមានប្រសាសន៍កាលពីព្រឹកថ្ងៃច័ន្ទ ទី៧ ខែធ្នូ ថា យុវជនខ្មែរម្នាក់ឈ្មោះ មាស ក្អូន អាយុ១៩ឆ្នាំ នៅភូមិស្រែល្អ ឃុំបាក់អន្លូង បានស្លាប់ក្នុងទឹកដីថៃនៅឡើយ បន្ទាប់ពីពួកគេបាននាំគ្នាលួចចូលទៅក្នុងទឹកដីថៃ ដែលមិនទាន់ប្រាកដថាដើម្បីរកអ្វី ហើយអាជ្ញាធរស្រុកត្រពាំងប្រាសាទកំពុងទាក់ទងមន្ត្រីព្រំដែន ដើម្បីសុំឲ្យថៃបញ្ជូនសាកសពយុវជនខ្មែរនោះមកឲ្យក្រុមគ្រួសារវិញ កាលពីរសៀលថ្ងៃច័ន្ទ។
លោក កែវ ប៉ាន់ បានបញ្ជាក់ថា ៖ «គាត់ទៅពីថ្ងៃ៤ ថ្ងៃ៥ហ្នឹងគ្រោះថ្នាក់។ បើតាមមើលនៅលើចំណុចផែនទីហ្នឹង គឺនៅក្នុងភូមិរលាយ ស្រុកខាន់ថារៈឡាក់ ខេត្តស៊ីសាកេត ដែលប្រជាពលរដ្ឋទាំងអស់ហ្នឹងគឺរងគ្រោះម្នាក់ ហើយឥឡូវខាងអភិបាលស្រុកកំពុងធ្វើការទំនាក់ទំនងជាមួយទំនាក់ទំនងច្រកព្រំដែន ដើម្បីឲ្យគេជួយសម្រួលរឿងហ្នឹងណា៎!»។
មេឃុំបាក់អន្លូង លោក ស៊ឹម សេង បានមានប្រសាសន៍កាលពីវេលាម៉ោងជាង១២ថ្ងៃច័ន្ទ ថា លោកនិងក្រុមគ្រួសារជនរងគ្រោះកំពុងទៅកាន់ច្រកព្រំដែនដើម្បីទទួលយកសាកសពពីថៃដែលសន្យាបញ្ជូនមកឲ្យ។
លោកមេឃុំបានមានប្រសាសន៍ទៀតថា ប្រជាពលរដ្ឋរបស់លោកមានគ្នាចំនួន ១៣នាក់បានឆ្លងដែនចូលទឹកដីថៃដើម្បីរកកាប់ឈើមកលក់ ប៉ុន្តែប្រជាពលរដ្ឋ ១២នាក់ផ្សេងទៀតបានវិលត្រឡប់មកដល់ផ្ទះវិញអស់ហើយ បន្ទាប់ពីទាហានថៃបានបាញ់រះ។
លោក ស៊ឹម សេង បានឲ្យដឹងថា ៖ «ស្លាប់យប់មិញ យើងទាក់ទងគេសុំសាកសពមកវិញ។ ថៃគេធានាដឹកមកឲ្យយើង ខ្ញុំឡើងមកយកហើយនេះ មករង់ចាំទទួលខាងបង្គោល៨ ច្រកខាងកើតជប់រុន។ ថៃចាប់យកទៅ ទៅអារឈើគេ ទើបចូលទៅបាន២ថ្ងៃ»។
ក្រុមគ្រួសារសពបានឲ្យដឹងថា គេមានការឈឺចាប់ខណៈដែលសាច់ញាតិរបស់គេត្រូវបានបាញ់សម្លាប់។
លោក មាស ហៃលី ជាឪពុករបស់ជនរងគ្រោះបានមានប្រសាសន៍ក្នុងពេលដែលកំពុងរង់ចាំទទួលយកសាកសពកូននៅច្រកព្រំដែនខ្មែរថៃយ៉ាងដូច្នេះ ៖ «ខ្ញុំវាខ្វះខាតហ្នឹង វាទៅ២-៣ថ្ងៃហើយតាមខ្សែរយៈមិត្តភក្តិវាច្រើន ស្រុកភូមិគ្នាឯង វាទៅច្រើន។ ខ្ញុំតូចចិត្តណាស់បង ខ្ញុំប្រាប់បងឯងមួយម៉ាត់ ឥឡូវបើថា ឲ្យចូលយកសាកសព បើថាមានកាំភ្លើង ខ្ញុំសង្ស័យខ្ញុំកាន់កាំភ្លើងទៅទៀតបង ខ្ញុំប្រាប់បងឯងឲ្យត្រង់អ៊ីចឹងតែម្តង»។
កាលពីថ្ងៃទី២៧ ខែវិច្ឆិកាកន្លងមក យុវជនខ្មែរម្នាក់ឈ្មោះ សុខ សំណាង អាយុ១៩ឆ្នាំដែរ នៅភូមិអភិវឌ្ឍន៍ សង្កាត់អូរស្មាច់ ក្រុងសំរោង ត្រូវបានទាហានថៃស្រុកកាប់ជើង ខេត្តសុរិន្ទ បាញ់ស្លាប់ខណៈនាំគ្នាឆ្លងដែន ដែលក្រុមគ្រួសារអះអាងថា ដើរដកផ្សិតព្រៃមកលក់ដូរនោះ។
ចាប់តាំងពីអំឡុងខែកញ្ញា ឆ្នាំ២០០៩ រហូតដល់ខែធ្នូនេះ នៅខេត្តឧត្តរមានជ័យ ចំនួនប្រជាពលរដ្ឋខែ្មរដែលឆ្លងដែនហើយត្រូវទាហានថៃបាញ់ស្លាប់បានកើនដល់ ៤នាក់ហើយ៕