មន្រ្តីជាន់ខ្ពស់នៃអាជ្ញាធរជាតិប្រយុទ្ធប្រឆាំងគ្រឿងញៀននៅថៃ្ងព្រហស្បតិ៍នេះបានបដិសេធយ៉ាងដាច់អហង្ការ ដោយបានបន្ទោសថា វាជាការបំភ្លៃការពិតនិងចេតនាអាក្រក់ចំពោះរបាយការណ៍ស្រាវជ្រាវមួយរបស់អង្គការឃ្លាំមើលសិទ្ធិមនុស្ស Human Rights Watch ដែលបានចោទប្រកាន់ថា មានការធ្វើទារុណកម្មឆក់ខ្សែភ្លើង វាយនឹងខ្សែតី និងមានស្បែកជាប់នឹងខ្សែតីនោះ។
មន្រ្តីជាន់ខ្ពស់ចំនួន ៥នាក់នៃអាជ្ញាធរពាក់ព័ន្ធបានបើកសន្និសីទកាសែតរួមគ្នាមួយនៅឯអាជ្ញាធរជាតិប្រយុទ្ធប្រឆាំងគ្រឿងញៀននៅក្នុងទីក្រុងភ្នំពេញ ដើម្បីឆ្លើយតបទៅនឹងរបាយការណ៍របស់ Human Rights Watch នោះ។
មន្រ្តីចំនួន ៥នាក់នោះមានឧត្តមសេនីយ៍ទោ នាក់ យុទ្ធា ប្រធាននាយកដ្ឋាននីតិកម្ម អប់រំ ស្តារនីតិសម្បទា, លោក មាស វីរិទ្ធ អគ្គលេខាធិការរងនៃអាជ្ញាធរជាតិប្រយុទ្ធប្រឆាំងគ្រឿងញៀន, លោក ឆាយ វណ្ណ មកពីក្រសួងសង្គមកិច្ច អតីតយុទ្ធជន និងយុវនីតិសម្បទា, លោក ប្រាក់ សិទ្ធិ មកពីកងរាជអាវុធហត្ថ និងលោក អ៊ាន សុឃឹម ប្រធានមណ្ឌលឱកាសខ្ញុំ។
លោក មាស វីរិទ្ធ ជាអគ្គលេខាធិការរងនៃអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានមន្ទីរពិសោធន៍ បានមានប្រសាសន៍ជាមួយនឹងសម្ដីធ្ងន់ៗថា សន្និសីទកាសែតនេះគឺជាការរំឭកឲ្យអង្គការឃ្លាំមើលសិទ្ធិមនុស្ស Human Rights Watch ឲ្យចេះស្វែងរកការពិត និងកុំឲ្យមើលងាយសមត្ថកិច្ចកម្ពុជា និងចេតនាអាក្រក់ក្នុងការបំបែកទំនាក់ទំនងរវាងអាជ្ញាធរកម្ពុជា ជាមួយនឹងអង្គការសហប្រជាជាតិគ្រប់គ្រងគ្រឿងញៀននៅក្នុងប្រទេសកម្ពុជានោះ។
លោកបានបន្តថា ៖ «ផ្ទុយទៅវិញគឺបន្ទុចបង្អាក់ដំណើរការនីតិរដ្ឋនៅកម្ពុជា។ រាជរដ្ឋាភិបាលកំពុងតែធ្វើដំណើរលើផ្លូវដ៏ត្រឹមត្រូវមួយ»។
លោកឧត្តមសេនីយ៍ទោ នាក់ យុទ្ធា ប្រធាននាយកដ្ឋាននីតិកម្ម អប់រំ និងស្តារនីតិសម្បទា នៃអគ្គលេខាធិការដ្ឋានរបស់អាជ្ញាធរជាតិប្រយុទ្ធប្រឆាំងគ្រឿងញៀន ប្រទេសកម្ពុជា បានមានប្រសាសន៍បញ្ជាក់ថា គ្មានការធ្វើទារុណកម្មនោះទេ។
ជាមួយគ្នានេះ លោក អ៊ាន សុឃឹម ប្រធានមណ្ឌល ឱកាសខ្ញុំ នៅជាយទីក្រុងភ្នំពេញ បានមានប្រសាសន៍បំភ្លឺថា ៖ «មជ្ឈមណ្ឌលខ្ញុំបានយកចិត្តទុកដាក់អប់រំ ព្យាបាលស្ដារនីតិសម្បទារបស់គេ បណ្ដុះបណ្ដាលវិជ្ជាជីវៈរបស់គេ ដើម្បីឲ្យពួកគេមានជំនាញមួយច្បាស់លាស់»។
សន្និសីទកាសែតរួមគ្នានេះគឺក្រោយពីអង្គការឃ្លាំមើលសិទ្ធិមនុស្ស Human Rights Watch កាលពីថៃ្ងទី៣១ ខែមករាកន្លងទៅថ្មីៗនេះ បានចេញសេចក្តីប្រកាសព័ត៌មានមួយជាប្រញាប់ ដោយបានចោទប្រកាន់ធ្ងន់ថា មានការធ្វើទារុណកម្មដោយឆក់ខ្សែភ្លើង វាយនឹងខ្សែតី មានស្បែកជាប់នឹងខ្សែតី លើកុមារនិងមនុស្សមួយចំនួនទៀត នៅក្នុងមណ្ឌលស្តារនីតិសម្បទា និងបន្សាបគ្រឿងញៀន។
សេចក្តីប្រកាសព័ត៌មាននោះបានទទូចសុំឲ្យអង្គការ UNICEF និងការិយាល័យរបស់អង្គការសហប្រជាជាតិគ្រប់គ្រងគ្រឿងញៀន និងបទឧក្រិដ្ឋកម្ម នៅក្នុងប្រទេសកម្ពុជា ធ្វើការបញ្ជាក់ជាមួយនឹងរដ្ឋាភិបាលកម្ពុជាថា មណ្ឌលទាំងនោះគប្បីត្រូវបានបិទ។
ការបំភ្លឺនានារបស់មន្រ្តីជាន់ខ្ពស់ប្រឆាំងគ្រឿងញៀនខាងលើនេះបានបញ្ជាក់នៅក្នុងសន្និសីទកាសែតថា អាជ្ញាធរគ្មានផែនការបិទមណ្ឌលទាំងនោះទេ ប៉ុន្តែមានគោលដៅសម្រាប់ឆ្នាំ២០១៥ គឺរដ្ឋាភិបាលកម្ពុជានិងកាត់បន្ថយចំនួនមណ្ឌលនោះមកចំនួនតិចបំផុតដើម្បីក្លាយជាមណ្ឌលថ្នាក់ជាតិ ដែលមានការគ្រប់គ្រងល្អប្រសើរ ខ្នាតអន្តរជាតិក្នុងកិច្ចសហការជាមួយអង្គការសហប្រជាជាតិគ្រប់គ្រងគ្រឿងញៀន និងអង្គការ UNAID។
បច្ចុប្បន្នប្រទេសកម្ពុជាមានមណ្ឌលស្តារនីតិសម្បទានិងបន្សាបគ្រឿងញៀនសរុបចំនួន ១១កន្លែង គ្រប់គ្រងដោយរដ្ឋ ដែលមានយុវជនចំនួនរវាង ១.២០០នាក់ទៅ ១.៥០០នាក់ ។ ចំពោះអ្នកញៀនគ្រឿងញៀននៅក្រៅមណ្ឌល គេប៉ាន់ស្មានថា មានចំនួនរវាងពី ៦.៥០០នាក់ទៅ ៧.០០០នាក់ ឬគុណនឹង ៣ ឬ ៤ដងឯណោះ។
អាជ្ញាធរកំពុងតែធ្វើសេចក្តីព្រាងច្បាប់មួយកែប្រែពីច្បាប់ចាស់ដើម្បីគ្រប់គ្រងមណ្ឌលនានា និងការផ្តល់សេវាល្អប្រសើរចំពោះអ្នកញៀនគ្រឿងញៀនក្នុងប្រទេសកម្ពុជា៕