លោក ទូច ណារ៉ុថ ស្នងការប៉ូលិសក្រុងភ្នំពេញបានមានប្រសាសន៍ឲ្យដឹងនៅថ្ងៃទី១១ សីហា ថា ប៉ូលិសចាប់បានត្រាក់ និងឃាត់ខ្លួនមនុស្សមួយរូបដែលជាប់សង្ស័យថាជាអ្នកបាចត្រាក់នោះ។
លោកស្នងការប៉ូលិសក្រុងភ្នំពេញបានមានប្រសាសន៍ឲ្យដឹងថា បុរសដែលចាប់ខ្លួននោះ បច្ចុប្បន្នប៉ូលិសកំពុងឃុំខ្លួន និងធ្វើការសាកសួរដើម្បីរកប្រភពត្រាក់នោះ និងបក្ខពួករបស់គេ។
ខ្លឹមសារត្រាក់ដែលវិទ្យុអាស៊ីសេរីទទួលបាន មានសរសេរជាអាទិឲ្យដឹងថា ជាតិខ្មែរកំពុងប្រឈមនឹងគ្រោះមហន្តរាយ ដោយសារនយោបាយរបស់វៀតណាម និងពួកក្បត់ជាតិលក់ទឹកដី ដែលមានគេបានសរសេរឈ្មោះលោក ហេង សំរិន, លោក ជា ស៊ីម និងលោក ហ៊ុន សែន។
ត្រាក់នោះបានសរសេរទៀតថា មានជនជាតិវៀតណាមហូរចូលមករស់នៅប្រទេសកម្ពុជា ដោយគ្មានលិខិតឆ្លងដែនតាមរូបភាពជាអ្នកទេសចរណ៍ និងតាមរយៈសមាគមវៀតណាមនៅ២៤ខេត្តក្រុង។ មានការបញ្ជូនទាហានវៀតណាមមកតំបន់ប្រាសាទព្រះវិហារ ដើម្បីជួយខ្មែររឿងប្រាសាទព្រះវិហារ និងដើម្បីការពារក្រុមហ៊ុនវិនិយោគដែលរឹបអូសយកដីប្រជាពលរដ្ឋ។
ខ្លឹមសារត្រាក់នោះបានលើកឡើងទៀតថា ដើម្បីលេបយកទឹកដីខ្មែរវៀតណាមបានប្រើក្រុមចារកម្មសម្ងាត់សម្លាប់ខ្មែរ តាមរបៀបដាក់ថ្នាំបំពុល ប្រើជាតិគីមីលើចំណីអាហារ និងធ្វើឲ្យមានជំងឺផ្សេងៗជាដើម។
ខ្លឹមសារត្រាក់នោះបានអំពាវនាវឲ្យប្រជាពលរដ្ឋខ្មែររួមសាមគ្គីគ្នា ក្រោកឡើងដេញវៀតណាម និងផ្លាស់ប្ដូរអ្នកដឹកនាំគណបក្សប្រជាជនកម្ពុជា។
ត្រាក់នោះសរសេរដោយអក្សរកុំព្យូទ័រ និងមានដាក់ទង់ជាតិខ្មែរ ដោយមានថែមផ្កាយចំនួន ៣ លើទង់ជាតិនោះ និងមានសរសេរអក្សរធំៗថា "សម្លេងខ្មែរជាតិនិយម"ទៀតផង។
លោក ចាន់ សូវេត បុគ្គលិកអង្កេតរបស់សមាគមការពារសិទ្ធិមនុស្សឈ្មោះ អាដហុក បានមានប្រសាសន៍ថា ការបាចត្រាក់ជាការបញ្ចេញមតិមួយប៉ុណ្ណោះ បើសិនជាការសកម្មភាពបាចត្រាក់នោះ មិនបណ្ដាលឲ្យមានចលាចលសង្គមទេ គេគ្រាន់តែអប់រំអ្នកបាចនោះ ហើយគួរដោះលែងទៅ។
ប្រភពមន្ត្រីប៉ូលិសបានឲ្យដឹងថា ការបាចត្រាក់នេះជាករណីលើកទីមួយហើយនៅក្នុងឆ្នាំ២០១០នេះ។
ការបាចត្រាក់ប្រឆាំងវៀតណាម និងអ្នកដឹកនាំគណបក្សប្រជាជនកម្ពុជានេះ កើតមានឡើងក្នុងពេលដែលលោកនាយករដ្ឋមន្ត្រីកម្ពុជា និងលោកនាយករដ្ឋមន្ត្រីថៃ កំពុងតែមានការប៉ះទង្គិចពាក្យសម្ដីគ្នាយ៉ាងគ្រោតគ្រាត ទាក់ទងជាមួយទំនាស់តាមព្រំដែននៅតំបន់ប្រាសាទព្រះវិហារ ជាពិសេសក្នុងពេលអ្នកដឹកនាំថៃបានគំរាមប្រើកម្លាំងយោធាវាយលុកមកលើប្រទេសកម្ពុជា៕