វៀតណាម​ហាម​ពលរដ្ឋ​ខ្មែរ​នៅ​ជិត​ព្រំដែន​មិន​ឲ្យ​ភ្ជួរ​ស្រែ​ជា​ថ្មី

ប្រជា​កសិករ​មាន​ទី​លំនៅ និង​មាន​ដី​ស្រែ​នៅ​ជិត​តម្រុយ​បង្គោល​ព្រំដែន​កម្ពុជា-វៀតណាម លេខ​២៧០ នៅ​ខេត្ត​តាកែវ បាន​អះអាង​ថា អាជ្ញាធរ​វៀតណាម​បាន​ដាក់​បម្រាម​ជា​ថ្មី​ទៀត។

0:00 / 0:00

ប្រជា​ពលរដ្ឋ​ជា​ច្រើន​គ្រួសារ រស់​នៅ​ភូមិ​អញ្ចាញ ឃុំ​ជ័យជោគ ស្រុក​បូរីជលសារ ខេត្ត​តាកែវ បាន​ត្អូញត្អែរ​ថា អាជ្ញាធរ​វៀត​ណាម បាន​មក​ហាម​ពលរដ្ឋ​មិន​ឲ្យ​ភ្ជួរ​ដី​ស្រែ ដើម្បី​ដាំ​ដំណាំ​កសិកម្ម​ឡើយ កាល​ពី​ថ្ងៃ​ទី​២៤ ខែ​កក្កដា។

កសិករ​ឲ្យ​ដឹង​ថា ក្រៅ​ពី​អាជ្ញាធរ​វៀតណាម​មក​ហាម​មិន​ឲ្យ​ភ្ជួរ​ស្រែ ពលរដ្ឋ​រស់​នៅ​តំបន់​នោះ ក៏​មាន​ការ​ព្រួយ​បារម្ភ​ពី​បញ្ហា​សុវត្ថិភាព​ផ្ទាល់​ខ្លួន នៅ​ពេល​រាត្រី​ផង​ដែរ។

ប្រជា​ពលរដ្ឋ​បាន​សំណូមពរ​ទៅ​អាជ្ញាធរ​មូលដ្ឋាន និង​ថ្នាក់​ដឹក​នាំ​គ្រប់​ជាន់​ថ្នាក់ ឲ្យ​ជួយ​អន្តរាគមន៍ និង​ផ្ដល់​ភាព​កក់​ក្ដៅ​ដល់​ពលរដ្ឋ នៅ​ភូមិ​អញ្ចាញ ក្បែរ​តម្រុយ​បង្គោល​ព្រំដែន​លេខ​២៧០ នៅ​ស្រុក​បូរីជលសារ ឲ្យ​បាន​ប្រសើរ​ឡើង​វិញ។

កសិករ​ម្នាក់​ស្នើ​មិន​ឲ្យ​វិទ្យុ​អាស៊ី​សេរី​បញ្ចេញ​ឈ្មោះ រស់​នៅ​ភូមិ​អញ្ចាញ មាន​ប្រសាសន៍​ថា កាល​ពី​ថ្ងៃ​ទី​២៤ ខែ​កក្កដា អាជ្ញាធរ​វៀតណាម​ថ្មី​ទៀត បាន​ហាម​ពលរដ្ឋ​ជា​ដែល​មាន​ដី​ស្រែ នៅ​ក្បែរ​បង្គោល​តម្រុយ​ព្រំដែន​កម្ពុជា-វៀតណាម​លេខ​២៧០ មិន​ឲ្យ​ភ្ជួរ​រាស់​ដី​ប្រកប​របរ​កសិកម្ម​ទៀត​ឡើយ។ ពលរដ្ឋ​រូប​នេះ អំពាវនាវ​ទៅ​ថ្នាក់​ដឹក​នាំ​ជួយ​អន្តរាគមន៍ ដើម្បី​ឲ្យ​ពលរដ្ឋ​បាន​ភ្ជួរ​រាស់​ឡើង​វិញ។

កសិករ​មាន​ប្រសាសន៍​ដូច្នេះ ៖ «យួន​គេ​មិន​ឲ្យ​ភ្ជួរ ជួយ​ដោះ​ស្រាយ​ផង។ ភ្ជួរ​ពី​ព្រឹក​មិញ​ហ្នឹង​ណា វៀត​ណាម​គេ​ហាម។ ចំណុច​៤០០​ម៉ែត្រ​ពី​បង្គោល​ហ្នឹង​គេ​ថា​មិន​ឲ្យ​ភ្ជួរ គេ​ថា​ចាំ​ថ្ងៃ​ច័ន្ទ ចាំ​ដោះ​ស្រាយ​ឲ្យ»

កសិករ​មិន​បង្ហាញ​អត្តសញ្ញាណ​ម្នាក់​ទៀត​បញ្ជាក់​ថា ដី​ស្រែ​របស់​គាត់ មាន​ចម្ងាយ​ពី​តម្រុយ​បង្គោល​ព្រំដែន​លេខ​២៧០ ជាង​៤០០​ម៉ែត្រ ត្រូវ​បាន​អាជ្ញាធរ​វៀតណាម​ហាម​មិន​ឲ្យ​ភ្ជួរ​ដី​ស្រែ​នោះ​ទេ។

កសិករ​មាន​ប្រសាសន៍​ដូច្នេះ ៖ «ខ្ញុំ​ចុះ​ទៅ​ភ្ជួរ​ដី​ហ្នឹង ខាង​ភាគី​វៀតណាម​គេ​ឃាត់។ គេ​ថា ចាំ​ថ្ងៃ​ច័ន្ទ ចាំ​មេ​គេ​ចុះ​មក​ដោះ​ស្រាយ ចេញ​ពី​បង្គោល​ប្រហែល​ជា ៤០០​ម៉ែត្រ។ ប្រជា​ពលរដ្ឋ​នៅ​ភូមិ​នេះ​មិន​ហ៊ាន​តវ៉ា​ទេ ព្រោះ​ខ្លាច​មាន​សមត្ថកិច្ច​គេ​ចោទ​ថា គណបក្ស​នេះ ឬ​គណបក្ស​នោះ។ ស្រុក​នេះ​ពិបាក​មែនទែន មិន​ស្រណុក​ទេ។ រឿង​ប្រជា​ពលរដ្ឋ​និយាយ​តែ​ពិតៗ ទេ​មិន​ចេះ​បំផ្លើស​ឡើយ»

ឆ្លើយ​តប​កង្វល់​របស់​កសិករ​នៅ​ភូមិ​អញ្ចាញ លោក ស្រី បេន អភិបាល​ខេត្ត​តាកែវ មាន​ប្រសាសន៍​ឲ្យ​វិទ្យុ​អាស៊ី​សេរី​ដឹង​នៅ​ថ្ងៃ​ទី​២៥ ខែ​កក្កដា​ថា មិន​មាន​អាជ្ញាធរ​ណា​មាន​សិទ្ធិ​មក​ហាម​ពលរដ្ឋ​ខ្មែរ​មិន​ឲ្យ​ភ្ជួរ​ស្រែ​នៅ​លើ​ទឹក​ដី​ខ្មែរ​នោះ​ទេ។

លោក ស្រី បេន មាន​ប្រសាសន៍​ដូច្នេះ ៖ «ចាំ​ទៅ​មើល។ គ្មាន​អ្នក​ណា​មាន​សិទ្ធិ​មក​ហាម​ដី​ខ្មែរ។ វៀត​ណាម​មាន​សិទ្ធិ​ទៅ​ហាម​ដី​ខ្មែរ គេ​ហាម​ដី​គេ​តើ។ ដី​ខ្មែរៗ ធ្វើ ដី​គេៗ ធ្វើ។ ដី​ខ្មែរៗ ធ្វើ ដី​វៀត​ណាមៗ​ធ្វើ​ទៅ។ វៀត​ណាម​គេ​ធ្វើ​ដី​គេ យើង​ធ្វើ​ដី​យើង​ទៅ។ ទាក់​ទង​អី​គ្នា ធ្វើ​រៀងៗ​ខ្លួន​តើ»

ពលរដ្ឋ​នៅ​ឃុំ​ជ័យជោគ បាន​អះអាង​ថា បម្រាម​របស់​អាជ្ញាធរ​វៀត​ណាម ហាម​មិន​ឲ្យ​កសិករ​ខ្មែរ​ភ្ជួរ​ស្រែ​នៅ​លើ​ដី​ខ្លួន​កើត​ឡើង បន្ទាប់​ពី​គណៈកម្មការ​បោះ​បង្គោល​ព្រំដែន​កម្ពុជា-វៀតណាម បាន​សម្រេច​បោះ​តម្រុយ​បង្គោល​ព្រំដែន​លេខ​២៧០ កាល​ពី​ថ្ងៃ​ទី​២៥ ខែ​ឧសភា ឆ្នាំ​២០១០។

ទោះ​យ៉ាង​នេះ​ក្តី លោក​ទេស​រដ្ឋមន្ត្រី វ៉ា គឹមហុង មន្ត្រី​ទទួល​បន្ទុក​កិច្ចការ​ព្រំដែន​កម្ពុជា ធ្លាប់​បាន​អះអាង​ឲ្យ​វិទ្យុ​អាស៊ី​សេរី​ដឹង​ជា​ញយ​ថា ការ​បោះ​តម្រុយ​បង្គោល​ព្រំដែន​លេខ​២៧០ កម្ពុជា-វៀតណាម នៅ​ភូមិ​អញ្ចាញ ឃុំ​ជ័យ​ជោគ ស្រុក​បូរីជលសារ ខេត្ត​តាកែវ មិន​បាន​ធ្វើ​ឲ្យ​ប៉ះ​ពាល់​ដល់​ដី​ស្រែ​ពលរដ្ឋ ឬ​បាត់​បង់​ទឹក​ដី​កម្ពុជា​នោះ​ទេ​៕