ប្រធានរដ្ឋសភា លោក ហេង សំរិន កាលពីថ្ងៃ១ មិថុនានេះ បានបដិសេធមិនឲ្យតំណាងរាស្ត្រមកពីគណបក្ស សម រង្ស៊ី ១៦រូប ចុះបំពេញបេសកកម្មពិនិត្យដំណើរការបោះបង្គោលព្រំដែនកម្ពុជា វៀតណាម លេខ២៧០ ស្ថិតនៅក្នុងឃុំជ័យជោគ ស្រុកបុរីជលសា ខេត្តតាកែវ នៅថ្ងៃព្រហស្បតិ៍នេះ ដោយស្នើឲ្យអ្នកតំណាងរាស្ត្រទាំង ១៦រូបនោះ ដាក់សំណួរទៅរដ្ឋាភិបាលវិញដើម្បីឲ្យមានការពន្យល់ពីដំណើរការបោះបង្គោលព្រំដែននេះ។
អ្នកនាំពាក្យគណបក្ស សម រង្ស៊ី លោក យឹម សុវណ្ណ បានមានប្រសាសន៍កាលពីថ្ងៃពុធ ខែមិថុនានេះ ថា អ្នកតំណាងរាស្ត្រយ៉ាងតិចចំនួន ១៦រូបនេះ នឹងបន្តគម្រោងដំណើរពិនិត្យការបោះបង្គោលនៅថ្ងៃព្រហស្បតិ៍នេះដដែល បើទោះបីគ្មានការអនុញ្ញាតពីលោក ហេង សំរិន ក៏ដោយ។
យោងតាមលិខិតអគ្គលេខាធិការរដ្ឋសភា លោក ឡេង ប៉េងឡុង ដែលចេញនៅថ្ងៃ១ ខែមិថុនា ផ្ញើជូនអ្នកតំណាងរាស្ត្រ គណបក្ស សម រង្ស៊ី ទាំង ១៦រូប បានបញ្ជាក់ថា ប្រធានរដ្ឋសភា លោក ហេង សំរិន មិនអនុញ្ញាត និងមិនទទួលខុសត្រូវចំពោះសំណើរបស់អ្នកតំណាងរាស្ត្រគណបក្ស សម រង្ស៊ី ដើម្បីទៅពិនិត្យមើលដំណើរការបោះបង្គោលព្រំដែនកម្ពុជាវៀតណាមទេ។
លោក ឡេង ប៉េងឡុង មិនបានបញ្ជាក់ពីមូលហេតុច្បាស់លាស់អំពីការបដិសេធមិនឲ្យអ្នកតំណាងរាស្ត្រ សម រង្ស៊ី ដើម្បីបំពេញបេសកកម្មនេះឡើយ ប៉ុន្តែលោកបានស្នើឲ្យអ្នកតំណាងរាស្ត្រ ធ្វើជាសំណើទៅកាន់រដ្ឋាភិបាល ដើម្បីឲ្យរដ្ឋាភិបាលឆ្លើយបំភ្លឺទៅលើផែនទីព្រំដែន ដែលមានកំណត់ទុកនៅអង្គការសហប្រជាជាតិ។
កាលពីថ្ងៃទី៣១ ខែឧសភា តំណាងរាស្ត្រទាំង ១៦រូប បានស្នើសុំឲ្យលោក ហេង សំរិន ចាត់វិធានការការពារសន្តិសុខ និងសុវត្ថិភាព ក្នុងដំណើរទៅពិនិត្យការបោះបង្គោលព្រំដែនកម្ពុជាវៀតណាមលេខ២៧០។
អ្នកតំណាងរាស្ត្រគណបក្សប្រជាជនកម្ពុជា និងជាសមាជិកអចិន្ត្រៃយ៍នៃរដ្ឋសភា លោក ជាម យៀប បានមានប្រសាសន៍ថា ប្រធានសភាមិនអនុញ្ញាតឲ្យតំណាងរាស្ត្រមកពីគណបក្ស សម រង្ស៊ី ទៅពិនិត្យមើលការបោះបង្គោលព្រំដែន ដោយសារគណបក្ស សម រង្ស៊ី ធ្លាប់បានធ្វើឲ្យខូចកិត្តិយសរដ្ឋាភិបាល ដោយបានដកបង្គោលព្រំដែនបណ្ដោះអាសន្នរវាងកម្ពុជា និងវៀតណាម នៅខេត្តស្វាយរៀងកន្លងមក។
លោក ជាម យៀប បានបដិសេធថា ការមិនអនុញ្ញាតឲ្យអ្នកតំណាងរាស្ត្រទៅពិនិត្យមើលការបោះបង្គោលព្រំដែននោះ ជាការរឹតត្បិតសិទ្ធិអ្នកតំណាងរាស្ត្រទេ។ លោកក៏បានព្រមានផងដែរនូវលទ្ធភាពដែលអាចមានអំពើហិង្សាកើតឡើងរវាងអ្នកគាំទ្រគណបក្ស ប្រជាជនកម្ពុជា និងគណបក្សប្រឆាំង ក្នុងដំណើររបស់អ្នកតំណាងរាស្ត្រនេះ។
លោក យឹម សុវណ្ណ បន្ថែមថា លោកមិនរំពឹងថា នឹងមានការតវ៉ាពីសំណាក់ប្រជាពលរដ្ឋឡើយ ចំពោះដំណើររបស់អ្នកតំណាងរាស្ត្រគណបក្ស សម រង្ស៊ី។
នាយកអង្គការគណៈកម្មការដើម្បីការបោះឆ្នោតដោយសេរី និងយុត្តិធម៌នៅកម្ពុជា លោក គល់ បញ្ញា បានមានប្រសាសន៍ថា នៅក្នុងអាណត្តិរដ្ឋាភិបាលនេះ អភ័យឯកសិទ្ធិរបស់អ្នកតំណាងរាស្ត្រត្រូវបានរំលោភបំពានពីសំណាក់អាជ្ញាធរ និងរដ្ឋាភិបាល។
លោកបានបន្ថែមថា អ្នកតំណាងរាស្ត្រមិនចាំបាច់សុំការអនុញ្ញាតពីសំណាក់ប្រធានរដ្ឋសភា ឬក៏អាជ្ញាធរទេ ប៉ុន្តែកន្លងមកអាជ្ញាធរបានប្រកាន់បក្សពួក និងគណបក្សនយោបាយរបស់ខ្លួនដែលធ្វើឲ្យពួកគេរំលោភអំណាចរបស់ខ្លួន។
តុលាការក្រុងភ្នំពេញ កាលពីខែឧសភា ឆ្នាំ២០១០ បានចេញដីកានាំខ្លួនលោក សម រង្ស៊ី បន្ទាប់ពីលោកមិនបានចូលខ្លួនបំភ្លឺតាមការកោះហៅរបស់ចៅក្រមសាលាដំបូង ទាក់ទិននឹងបណ្ដឹង រដ្ឋាភិបាលពីបទក្លែងបន្លំឯកសារសាធារណៈ និងផ្សាយព័ត៌មានមិនពិត ទាក់ទងទៅនឹងការបោះតម្រុយបង្គោលព្រំដែនរវាងកម្ពុជា និងវៀតណាម នៅស្រុកចន្ទ្រា ខេត្តស្វាយរៀង៕