មន្ត្រីបក្សប្រឆាំងចោទថា ការបោះតម្រុយព្រំដែនរវាងមន្ត្រីជំនាញកម្ពុជា និងប្រទេសជិតខាង បានប៉ះពាល់ដល់បូរណភាពទឹកដីកម្ពុជា និងធ្វើឲ្យបាត់ដីកសិករ។
លោក យឹម សុវណ្ណ មន្ត្រីនាំពាក្យ និងជាតំណាងរាស្ត្រគណបក្ស សម រង្ស៊ី មានប្រសាសន៍ឲ្យវិទ្យុអាស៊ីសេរីដឹងនៅចុងសប្ដាហ៍នេះថា នៅក្នុងប៉ុន្មានថ្ងៃខាងមុខនេះ មន្ត្រីបក្ស សម រង្ស៊ី មានគម្រោងចុះពិនិត្យការបោះតម្រុយបង្គោលព្រំដែនទាំងអស់ ដែលកម្ពុជាបានព្រមព្រៀងបោះជាមួយប្រទេសជិតខាង។
លោកបន្តថា គម្រោងចុះពិនិត្យតម្រុយព្រំដែនកើតឡើងបន្ទាប់ពីបក្ស សម រង្ស៊ី ទទួលព័ត៌មានពីប្រជាពលរដ្ឋរស់នៅតាមព្រំដែន បានអះអាងថា ការបោះតម្រុយកំណត់ព្រំដែនរវាងកម្ពុជាជាមួយប្រទេសជិតខាង ជាពិសេសប្រទេសវៀតណាមបានធ្វើឲ្យកម្ពុជាបាត់បង់ទឹកដី។
លោក យឹម សុវណ្ណ មានប្រសាសន៍ថា ៖ «ការធ្វើហ្នឹងប៉ះពាល់ទឹកដីប្រជាពលរដ្ឋ ប៉ះពាល់ទឹកដីខ្មែរ ហើយគាត់គំរាមកំហែងមិនឲ្យប្រតិកម្មតវ៉ាទេ។ ទង្វើនេះមិនសមស្របទាល់តែសោះ រឿងនេះធ្ងន់ធ្ងរណាស់ មិនមែនត្រឹមតែបង្គោលតម្រុយព្រំដែនលេខ ២៧០ ទេ។ មាន ៤បង្គោលនៅភូមិចន្ទ្រា និង ២បង្គោលទៀតនៅឃុំកក់ ខេត្តកំពង់ចាម។ ឥឡូវយើងកំពុងពិនិត្យបង្គោលព្រំដែនដទៃទៀត ឲ្យដឹងមើល៍ថា ការបោះហ្នឹងត្រឹមត្រូវ ឬអត់? ប៉ុន្តែយើងមិនធ្វើដោយចំហទេ ចៀសវាងការរំខាន»។
ការបោះតម្រុយកំណត់ព្រំដែនរវាងកម្ពុជា និងប្រទេសជិតខាងកន្លងមក ត្រូវបានមន្ត្រីបក្សប្រឆាំង មន្ត្រីសង្គមស៊ីវិល និងពលរដ្ឋនៅតាមព្រំដែន អះអាងថា បានបោះចូលមកក្នុងទឹកដីកម្ពុជា និងធ្វើឲ្យបាត់បង់ដីបង្កបង្កើនផលរបស់ពលរដ្ឋច្រើនហិកតារ។ ប៉ុន្តែការចោទប្រកាន់នេះជានិច្ចកាលត្រូវបានមន្ត្រីរដ្ឋាភិបាលប្រកាសច្រានចោល។
លោក រ៉ុង ឈុន ប្រធានសមាគមគ្រូបង្រៀន និងជាតំណាងក្រុមប្រឹក្សាឃ្លាំមើលកម្ពុជា មានប្រសាសន៍ថា គ្មានហេតុផលណាដែលមន្ត្រីជំនាញរដ្ឋាភិបាលរារាំងមិនឲ្យមន្ត្រីបក្សជំទាស់ មន្ត្រីសង្គមស៊ីវិល ឬពលរដ្ឋ ចូលទៅពិនិត្យទីតាំងបោះតម្រុយបង្គោលព្រំដែននោះទេ ប្រសិនបើការបោះបង្គោលព្រំដែនមិនមានអាថ៌កំបាំង ឬមិនបានធ្វើឲ្យកម្ពុជាបាត់ទឹកដីនោះ។
លោក រ៉ុង ឈុន មានប្រសាសន៍ដូច្នេះ ៖ «ខ្ញុំចង់ឲ្យថ្នាក់ដឹកនាំរដ្ឋាភិបាលហ្នឹង ត្រូវតែទទួលស្គាល់ការពិត ចៀសវាងការនិយាយបិទបាំងអំពីកំហុស ហើយយើងត្រូវទទួលស្គាល់ទៅនឹងអ្វី ដែលអាជ្ញាធរយួនកំពុងតែបានរំលោភមកលើទឹកដីប្រជាពលរដ្ឋខ្មែរយើងពិតប្រាកដ ហើយសាក្សីរស់គឺជាប្រជាពលរដ្ឋដែលរស់នៅក្នុងមូលដ្ឋានជាក់ស្ដែង»។
លោកទេសរដ្ឋមន្ត្រី វ៉ា គឹមហុង មន្ត្រីទទួលបន្ទុកកិច្ចការព្រំដែនកម្ពុជា ធ្លាប់មានប្រសាសន៍ថា ការបោះតម្រុយបង្គោលព្រំដែនកម្ពុជា ជាមួយប្រទេសជិតខាង មិនមែនមន្ត្រីជំនាញ ឬថ្នាក់ដឹកនាំរដ្ឋាភិបាលធ្វើឡើងដោយមិនមានការពិភាក្សាល្អិតល្អន់នោះទេ ព្រោះជារឿងទទួលខុសត្រូវចំពោះមុខប្រវត្តិសាស្ត្រ។ លោក វ៉ា គឹមហុង បានចាត់ទុកសកម្មភាពទិតៀនរបស់មន្ត្រីបក្សប្រឆាំង ឬសង្គមស៊ីវិល ទៅលើមន្ត្រីជំនាញព្រំដែន ថា ជាការរារាំងក្នុងការពន្លឿនការបោះបង្គោលព្រំដែនរបស់រដ្ឋាភិបាល។
លោក វ៉ា គឹមហុង មានប្រសាសន៍ថា ៖ «យើងធ្វើទៅតាមបច្ចេកទេសខ្ពស់នៃការវាស់វែងខណ្ឌព្រំសីមារវាងប្រទេស និងប្រទេស។ យើងមិនមែនជាគណៈកម្មការដែលគ្មានការទទួលខុសត្រូវនោះទេ! ហេតុដូច្នេះបើគណបក្សប្រឆាំងលោកមិនទុកចិត្តទៅលើស្ថាប័នជាតិរបស់លោកហើយ លោកមិនដឹងជាទៅទុកចិត្តអ្នកណា? លោកទៅទុកចិត្តលើអង្គការក្រៅរដ្ឋាភិបាលនៅស្រុកបារាំង នៅស្រុកអាមេរិក ឬនៅស្រុកស្វ៊ីស សាស្ត្រាចារ្យនេះ សាស្ត្រាចារ្យនោះ! ពិបាកណាស់មករំខានកិច្ចការរបស់គណៈកម្មការយើង។ បើរំខានយើង យើងមានសិទ្ធិការពារប្រយោជន៍រាជរដ្ឋាភិបាលរបស់ប្រទេសជាតិយើងដែរ!»។
កន្លងមកចំពោះការទិតៀនទៅលើមន្ត្រីរដ្ឋាភិបាល ជុំវិញការបោះតម្រុយបង្គោលព្រំដែនរវាងកម្ពុជា ជាមួយប្រទេសជិតខាង មានមន្ត្រីសង្គមស៊ីវិល មន្ត្រីបក្សប្រឆាំងមួយចំនួន បានរត់ចោលស្រុក និងមួយចំនួនទៀតត្រូវបានមន្ត្រីរដ្ឋាភិបាលចោទប្រកាន់ចាប់ដាក់ពន្ធនាគារ ដោយសារតែមន្ត្រីទាំងនោះហ៊ានទិតៀនទៅលើបញ្ហាព្រំដែននេះ។
បញ្ហាព្រំដែននេះដែរ កាលពីថ្ងៃពុធ ទី២៧ ខែមករា ឆ្នាំ២០១០ តុលាការខេត្តស្វាយរៀងបានកាត់ទោសលោក សម រង្ស៊ី មេដឹកនាំបក្សប្រឆាំងឲ្យជាប់ពន្ធនាគារ ២ឆ្នាំ និងពលរដ្ឋ ២នាក់ទៀតក្នុងម្នាក់ ១ឆ្នាំ និងពិន័យជាប្រាក់សរុបជាង ៦០លានរៀល ចោទពីបទបំផ្លាញទ្រព្យសម្បត្តិសាធារណៈ បន្ទាប់ពីបានចូលរួមដកតម្រុយបង្គោលព្រំដែនកម្ពុជាវៀតណាមលេខ ១៨៥ នៅឃុំសំរោង ស្រុកចន្ទ្រា កាលពីថ្ងៃទី២៥ ខែតុលា ឆ្នាំ២០០៩។
ទោះយ៉ាងនេះក្តី លោក យឹម សុវណ្ណ មិនបានបញ្ជាក់ពីកាលបរិច្ឆេទនៃការចុះពិនិត្យបង្គោលតម្រុយព្រំដែនជាថ្មីទៀត ធ្វើនៅពេលណា ឬនៅទីតាំងណានោះទេ ព្រោះដើម្បីកុំឲ្យអាជ្ញាធរមករំខាន។
ប្រទេសកម្ពុជាកំពុងធ្វើការបោះបង្គោលព្រំដែនជាមួយប្រទេសជិតខាង ដូចជាប្រទេសថៃ វៀតណាម និងប្រទេសលាវ ក្នុងនោះរដ្ឋាភិបាលកម្ពុជាមានផែនការបញ្ចប់ការបោះបង្គោលព្រំដែនជាមួយប្រទេសវៀតណាម នៅបំណាច់ឆ្នាំ២០១២៕