កងទាហានខ្មែរជាច្រើនកន្លែងដែលកំពុងប្រឈមមុខដោយអាវុធជាមួយទាហានថៃ នៅតំបន់ជម្លោះព្រលានឥន្រ្ទី ភ្នំព្រទ្យ និងខ្សែត្រៀមជួរមុខជិតប្រាសាទព្រះវិហារ បានត្រៀមខ្លួនចាំប្រយុទ្ធជាថ្មី ចាប់តាំងតែពីយប់ថ្ងៃអង្គារ រហូតដល់ព្រឹកថ្ងៃពុធ ទី២៩ ខែតុលា បន្ទាប់ពីបានឮសំឡេងមីនកប់ក្រោមដីមួយគ្រាប់ផ្ទុះឡើងកណ្ដាលរាត្រីចម្ងាយប្រមាណ ២៥០ម៉ែត្រ នៅពីមុខខ្សែត្រៀមព្រលានឥន្រ្ទីមក។
មេបញ្ជាការរងកងពលថ្មើរជើងលេខ ៤៣ លោកវរសេនីយ៍ឯក ប៊ុន ធាន បានមានប្រសាសន៍កាលពីព្រឹកថ្ងៃពុធ ថា កាលពីវេលាម៉ោងជាង ១១យប់ ថ្ងៃអង្គារ ពិតជាមានការផ្ទុះមីននៅពីមុខខ្សែត្រៀមរបស់ទាហានខ្មែរ ចម្ងាយប្រមាណ ២៥០ម៉ែត្រ ក៏ប៉ុន្តែរហូតដល់ព្រឹកថ្ងៃពុធ គេពុំទាន់បានរកឃើញនូវមូលហេតុនៃការផ្ទុះនេះ ដែលបណ្ដាលមកពីការលបលួចចូលមកក្នុងដីខ្មែរ ពីកងទាហានថៃ ឬក៏បណ្ដាលមកពីសត្វព្រៃដើរជាន់ ឬយ៉ាងណានៅឡើយទេ ដោយសារតំបន់នោះសំបូរទៅដោយគ្រាប់មីនចាស់កប់នៅក្រោមដី ហើយទាហានខ្មែរមិនហ៊ានចូលពិនិត្យ។
លោក ប៊ុន ធាន ថ្លែងដូច្នេះថា ៖ «ឮផ្ទុះម៉ោង ១១ និង១០នាទីយប់មិញ ប៉ុន្តែខ្ញុំឲ្យបងប្អូនឆែក[ពិនិត្យ]មើលដូចមិនឃើញមានស្អីផង។ ខ្ញុំមិនហ៊ានរុកមិនហ៊ានដើរដែរម្ដុំហ្នឹង...»។
នៅពេញមួយថ្ងៃពុធនេះ មិនអាចធ្វើការទំនាក់ទំនងទៅកងទាហាននិងមេបញ្ជាការយោធាថៃប្រចាំតំបន់នោះ ដើម្បីបញ្ជាក់ឲ្យបានច្បាស់លាស់អំពីមូលហេតុនៃការផ្ទុះមីន ដែលអាចបណ្ដាលឲ្យទាហានថៃមានការរងរបួស ឬយ៉ាងណា បាននៅឡើយទេ។
ចំណែកមន្រ្តីយោធាខ្មែរមួយរូបរបស់កងពលអន្តរាគមន៍លេខ ១២ បានមានប្រសាសន៍ឲ្យដឹងថា កាលពីវេលាម៉ោងប្រមាណជា ៨ព្រឹកថ្ងៃពុធ គេឃើញឧទ្ធម្ភាគចក្រយោធាថៃមួយគ្រឿង បានចុះទៅកន្លែងផ្ទុះនោះ តែគេពុំបានប្រាកដថា ឧទ្ធម្ភាគចក្រនោះបានដឹកយកអ្នករបួស ឬយ៉ាងណានោះទេ ៖ «មានយន្តហោះមក កាលពីព្រឹកមិញហ្នឹង ប៉ុន្តែមិនដឹងថា វាមកយកអ្នករបួស ឬវាហោះមកយ៉ាងម៉េចទេ»។
តាមកងទាហានខ្មែរបានឲ្យដឹងថា បន្ទាប់ពីស្នូរផ្ទុះមីនមក ទាំងកងទាហានខ្មែរនិងថៃ នៅតំបន់ខ្សែត្រៀមជួរមុខ បានហក់ចូលទៅក្នុងលេណដ្ឋានត្រៀមប្រយុទ្ធសាជាថ្មី ហើយភាពជ្រួលច្របល់របស់ទាហានទាំងសងខាង បានបន្តរហូតដល់ព្រឹកថ្ងៃពុធ។
ទាក់ទិននឹងបញ្ហាគ្រាប់មីនក្រោមដីនេះ ប្រធានគណៈកម្មការដោះស្រាយបញ្ហាព្រំដែនកម្ពុជា លោក វ៉ា គឹមហុង បានមានប្រសាសន៍ថា កាលពីថ្ងៃអង្គារ លោកបានអញ្ជើញទៅតំបន់ប្រាសាទព្រះវិហារ ដើម្បីពិនិត្យទីតាំងនៅតាមព្រំដែនខ្លះ ដែលគ្រោងនឹងដោះមីនចេញតាមការចង្អុលបង្ហាញរបស់គណៈកម្មការព្រំដែនដើម្បីឈានទៅរកការបោះបង្គោលព្រំដែនសម្រាប់អនាគត ប្រសិនបើភាគីថៃ មានការយល់ព្រមដូចគ្នានេះ។
លោក វ៉ា គឹមហុង មានប្រសាសន៍ដូច្នេះថា ៖ «ខ្ញុំមករឿងខាងដោះមីន ខាងគណៈកម្មការព្រំដែន មកចង្អុលទីតាំងដែលយើងត្រូវដោះមីននៅតំបន់ប្រាសាទព្រះវិហារនេះ។ ទិសដៅដោះមីន គឺការបោះបង្គោលព្រំដែនទៅថ្ងៃក្រោយ បើឯកភាពគ្នា វាអាចទៅមុខទៀត បើថាមិនទាន់ទេ យើងទៅដោះមីនពីខាងយើង ធ្វើផ្លូវឡើងទៅលើប្រាសាទ»។
សូមរំឭកថា នៅជុំវិញតំបន់ប្រាសាទព្រះវិហារដែលជាទឹកដីខ្មែរ នៅមានគ្រាប់មីនចាស់ៗ សល់ពីសម័យសង្រ្គាមជិត ៣០ឆ្នាំ រាប់ម៉ឺនគ្រាប់ កប់ក្រោមដីនៅឡើយ ហើយចាប់តាំងតែពីទាហានថៃបានចូលលុកលុយព្រំដែនខ្មែរពីថ្ងៃទី១៥ ខែកក្កដា រហូតដល់ថ្ងៃទី២៩ ខែតុលា មានការផ្ទុះមីនចំនួន៤គ្រាប់ហើយ បណ្ដាលឲ្យទាហានថៃ យ៉ាងហោចណាស់ ៣នាក់បានរងរបួស៕