លោក រ៉ុង ឈុន តំណាងក្រុមប្រឹក្សាឃ្លាំមើលព្រំដែនកម្ពុជា និងជាប្រធានសមាគមគ្រូបង្រៀនកម្ពុជាឯករាជ្យ មានប្រសាសន៍ថា ដំណើរចុះទៅពិនិត្យរបស់គណៈប្រតិភូព្រំដែនកម្ពុជា ទៅពិនិត្យមើលការបោះតម្រុយបង្គោលព្រំដែនកម្ពុជា-វៀតណាម លេខ២៧០ នៅភូមិអញ្ចាញ ឃុំជ័យជោគ ស្រុកបុរីជលសារ ត្រូវបានសមត្ថកិច្ចខេត្តតាកែវហាមឃាត់។
លោក រ៉ុង ឈុន បានថ្កោលទោសចំពោះការរារាំងរបស់សមត្ថកិច្ច និងមន្ត្រីថ្នាក់ដឹកនាំរដ្ឋាភិបាល ចំពោះការបោះបង្គោលព្រំដែនលេខ២៧០ ថា គួរឲ្យសង្ស័យ ទំនងជាការបោះបង្គោលព្រំដែននេះ អាចធ្វើឲ្យបាត់បង់បូរណភាពទឹកដី ឬបាត់បង់ដីស្រែ ដូចពលរដ្ឋអះអាងពិតប្រាកដមែន។
លោក រ៉ុង ឈុន មានប្រសាសន៍ដូច្នេះ ៖ «ការណ៍ដែលរារាំងបែបហ្នឹង វាមានមន្ទិលសង្ស័យ ហើយប្រាកដជាការបោះបង្គោលហ្នឹងខុសប្រក្រតីហើយ។ ស្របទៅតាមការអះអាងរបស់ប្រជាពលរដ្ឋពិតប្រាកដមែនហើយ។ អ៊ីចឹងចង់ឲ្យគណៈកម្មការព្រំដែនកម្ពុជា ក៏ដូចជាថ្នាក់ដឹកនាំរាជរដ្ឋាភិបាលកម្ពុជា ត្រូវតែពិចារណាឡើងវិញ រាល់ការបោះបង្គោលរវាងកម្ពុជា វៀតណាម ជៀសវាងកុំឲ្យភាគីកម្ពុជាយើងខាតបង់ បាត់បង់ទឹកដី ដោយសារការបោះបង្គោលព្រំដែននេះ»។
ពលរដ្ឋរស់នៅខេត្តតាកែវ មិនបញ្ចេញឈ្មោះ បានឃើញសកម្មភាពសមត្ថកិច្ចឃាត់ប្រតិភូក្រុមប្រឹក្សាឃ្លាំមើលកម្ពុជា នៅព្រឹកថ្ងៃទី១៣ ខែមិថុនា មានប្រសាសន៍ថា សមត្ថកិច្ចនគរបាល និងទាហានរាប់សិបនាក់ បានដាក់ពង្រាយស្ទើរគ្រប់ច្រកចេញចូលទៅព្រំដែនលេខ២៧០ នៅភូមិអញ្ចាញ ឃុំជ័យជោគ។
ពលរដ្ឋឲ្យដឹងថា ប្រតិភូឃ្លាំមើលព្រំដែនកម្ពុជា បានព្យាយាមធ្វើដំណើរតាមទូក ឆ្ពោះទៅព្រំដែនកម្ពុជា វៀតណាម ត្រង់ចំណុចតម្រុយបង្គោលព្រំដែនលេខ២៧០ ប៉ុន្តែត្រូវបានអាជ្ញាធរហាមឃាត់។
ពលរដ្ឋមានប្រសាសន៍ដូច្នេះ ៖ «ទាហានគេមកច្រើន ដល់ហើយកម្លាំងបង មកពីលើបួន ប្រាំនាក់ ត្រូវគេឃាត់នៅកន្លែងចុះទូក»។
លោក រ៉ុង ឈុន បានដកស្រង់សម្ដីសមត្ថកិច្ចខេត្តតាកែវ ឲ្យដឹងថា ការឃាត់របស់សមត្ថកិច្ច មិនឲ្យប្រតិភូឃ្លាំមើលព្រំដែន ធ្វើដំណើរទៅបង្គោលព្រំដែនលេខ២៧០នោះ គឺពួកគេធ្វើទៅតាមការចង្អុលបង្ហាញពីមេដឹកនាំថ្នាក់លើបញ្ជាមក។
លោក ស៊ឹន សុធានី ប្រធានក្រុមខណ្ឌសីមាបោះបង្គោលព្រំដែនគោកកម្ពុជា ទី៤ ធ្លាប់មានប្រសាសន៍ឲ្យវិទ្យុអាស៊ីសេរីដឹងថា តម្រុយបង្គោលព្រំដែនកម្ពុជា-វៀតណាម លេខ២៧០ ស្ថិតនៅភូមិអញ្ចាញ ស្រុកបុរីជលសារ គឺមិនអនុញ្ញាតពលរដ្ឋណាម្នាក់ ចុះទៅពិនិត្យមើលការបោះបង្គោលព្រំដែននេះឡើយ ព្រោះខ្លាចនាំឲ្យរំខានដល់ក្រុមជំនាញការងារបោះបង្គោលព្រំដែន រវាងកម្ពុជា និងវៀតណាម។
នេះជាករណីទី២ហើយ ដែលអាជ្ញាធរខេត្តតាកែវ ធ្វើការរារាំងនេះ បន្ទាប់ពីគណបក្សប្រឆាំងព្យាយាមទៅពិនិត្យមើលការបោះតម្រុយបង្គោលព្រំដែនកម្ពុជា-វៀតណាម នៅខេត្តតាកែវ កាលពីថ្ងៃទី៣ ខែមិថុនា ថ្មីៗ កន្លងមកនេះ៕