អ្នកនាំពាក្យនៃទីស្ដីការគណៈរដ្ឋមន្ត្រី លោក ផៃ ស៊ីផាន នៅថ្ងៃសៅរ៍ ទី១១ ខែកញ្ញា បានមានប្រសាសន៍ឲ្យដឹងថា លោក សុខ អាន ឧបនាយករដ្ឋមន្រ្ដី និងរដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី មានគម្រោងនឹងរៀបចំកិច្ចប្រជុំគណៈកម្មាធិការបេតិកភណ្ឌពិភពលោក លើកទី៣៦ សម្រាប់ឆ្នាំ២០១២។ កិច្ចប្រជុំនេះធ្វើឡើងដើម្បីបែងចែកបទពិសោធន៍របស់កម្ពុជា ដែលបានទទួលជោគជ័យក្នុងការអភិរក្សប្រាសាទបុរាណ។
លោក ផៃ ស៊ីផាន បន្ថែមទៀតថា កម្ពុជាបានជូនដំណឹងទៅអង្គការយូណេស្កូ (Unesco) អំពីគម្រោងរបស់កម្ពុជា ចង់ធ្វើជាម្ចាស់ផ្ទះនៃកិច្ចប្រជុំគណៈកម្មាធិការបេតិកភណ្ឌពិភពលោក ប៉ុន្ដែកម្ពុជា នៅមិនទាន់ទទួលបានការយល់ព្រមពីអង្គការយូណេស្កូ នៅឡើយទេ។
លោកបន្តទៀតថា ទីក្រុងសៀមរាបមានហេដ្ឋារចនាសម្ព័ន្ធគ្រប់គ្រាន់សម្រាប់កម្ពុជាធ្វើការម្ចាស់ផ្ទះកិច្ចប្រជុំ ។សម្រាប់១០ ឆ្នាំចុងក្រោយនេះ ខេត្តសៀមរាបបានទទួលឥស្សរជនពិភពលោកមានចំនួនរហូតទៅដល់ ៣៦ ជាប្រធានាធិបតី នាយករដ្ឋមន្ត្រី និងមេដឹកនាំ។
លោក ផៃ ស៊ីផាន បន្ថែមទៀតថា កម្ពុជាមានបទពិសោធន៍គ្រប់គ្រាន់ដើម្បីចែករំលែកទៅឲ្យសមាជិកនៃគណៈកម្មាធិការបេតិកភណ្ឌពិភពលោក អំពីការអភិរក្សប្រាសាទបុរាណ។
គម្រោងរបស់កម្ពុជាធ្វើជាម្ចាស់ផ្ទះនៃកិច្ចប្រជុំគណៈកម្មាធិការបេតិកភណ្ឌពិភពលោក ធ្វើឡើងក្រោយពេលដែលអង្គការយូណេស្កូ កាលពីថ្ងៃសុក្រ ទី៣០ ខែកក្កដា បានប្រកាសថា ជម្លោះពាក្យសម្ដីកម្ពុជា និងថៃ ត្រូវបានបញ្ចប់ហើយ បន្ទាប់ពីកម្ពុជា និងថៃ បានទទួលយកការសម្រេចចិត្តរបស់សមាជិកគណៈកម្មាធិការបេតិកភណ្ឌពិភពលោក ជុំវិញការគ្រប់គ្រងទីតាំងបេតិកភណ្ឌពិភពលោកប្រាសាទព្រះវិហារខ្មែរ។
ការសម្រេចចិត្តនេះបានទទួលស្គាល់ថា មជ្ឈមណ្ឌលបេតិកភណ្ឌពិភពលោករបស់អង្គការយូណេស្កូ បានទទួលយកឯកសារដាក់ដោយភាគីកម្ពុជា ដើម្បីធ្វើការពិចារណានៅឯកិច្ចប្រជុំលើកទី៣៥ ឆ្នាំ២០១១ នៅប្រទេសបារ៉េន (Bahrain)។ សេចក្ដីសម្រេចចិត្តនេះ ដែលបានដាក់ជូនដោយប្រធានដឹកនាំគណៈកម្មាធិការបេតិកភណ្ឌពិភពលោក ហើយនិងរដ្ឋមន្ត្រីក្រសួងវប្បធម៌របស់ប្រទេសប្រេស៊ីល ជូកា ហ្វឺរីរ៉ា (Juca Ferreira) នៅឯប្រទេសប្រេស៊ីល។
កម្ពុជាបានដាក់គម្រោងការអភិរក្ស និងអភិវឌ្ឍតំបន់ទ្រនាប់នៃប្រាសាទព្រះវិហារខ្មែរ ទៅឲ្យគណៈកម្មាធិការបេតិកភណ្ឌពិភពលោក ដើម្បីអនុម័តទទួលយក ប៉ុន្តែភាគីថៃបានជំទាស់មិនឲ្យគណៈកម្មាធិការបេតិកភណ្ឌពិភពលោកទទួលយកគម្រោងរៀបចំប្រាសាទ ព្រះវិហារទេ ដោយលើកហេតុផលថា គម្រោងរបស់កម្ពុជា អាចប៉ះពាល់ដល់តំបន់ជម្លោះក្បែរប្រាសាទព្រះវិហារខ្មែរ។
លោក ផៃ ស៊ីផាន បានបដិសេធថា គម្រោងរបស់កម្ពុជា មិនពាក់ព័ន្ធទៅនឹងកិច្ចការរបស់ថៃនោះទេ៕