មន្រ្តីជាន់ខ្ពស់មួយរូបនៃក្រសួងការងារនិងបណ្តុះបណ្តាលវិជ្ជាជីវៈ សុំមិនប្រាប់ឈ្មោះ ដែលកំពុងតែដោះស្រាយភ្លាមៗ សង្គ្រោះកម្មកររងគ្រោះទាំងនោះ បានមានប្រសាសន៍ប្រាប់វិទ្យុអាស៊ីសេរីថា ក្រុមអធិការកិច្ចរបស់ក្រសួងកំពុងតែទៅពិនិត្យនៅកន្លែងរោងចក្រនោះហើយ។
មន្រ្តីមួយរូបនៃក្រសួងការងារនិងបណ្តុះបណ្តាលវិជ្ជាជីវៈ សុំមិនប្រាប់ឈ្មោះ បានឲ្យដឹងដូច្នេះ ៖ «កិច្ចការហ្នឹងខាងនាយកដ្ឋានពេទ្យការងារគេចុះទៅហើយ ហើយខាងអង្គភាពបេឡាជាតិ ធានារ៉ាប់រងសង្គមក៏ចុះដែរ ថាដួលអីហ្នឹង គេបានបញ្ជូនទៅមន្ទីរពេទ្យ៣ គឺពេទ្យកាល់ម៉ែត ពេទ្យលោកសង្ឃ និងគ្លីនិកឯកជនអង្គរ និងមានគ្លីនិកកន្លែងណាៗទៀតច្រើនណាស់ ពីព្រោះឮថា ដួលជាង២០០នាក់ឯណោះ។ ដោយសារមូលហេតុអី គឺអត់មាននរណាហ៊ានថាទេ។ ខ្ញុំបានប្រាប់ទៅមន្រ្តីដែលជាវេជ្ជបណ្ឌិត ហើយក៏ជាអធិការពេទ្យការងារដែរ ឲ្យចុះទៅប្រយ័ត្នប្រយែង កុំចេះតែនិយាយផ្ដេសផ្ដាស ថាពុល ប៉ុន្តែពុលដោយសារអី? អាសារធាតុហ្នឹងវាមានរោគសញ្ញារបស់វា កុំចេះតែថាហើយអត់មានភស្ដុតាង អត់មានរោគសញ្ញាច្បាស់លាស់ ខាងនិយោជកគេប្ដឹងវិញ យើងអត់មានអីឆ្លើយរួចទេ»។
កម្មកររងគ្រោះឈ្មោះ នូ មុំ អាយុ៣៦ឆ្នាំ មកពីខេត្តកំពត នៃរោងចក្រ World Best កំពុងតែទទួលការព្យាបាលសង្គ្រោះបន្ទាន់នៅក្នុងមន្ទីរពេទ្យមួយក្នុងទីក្រុងភ្នំពេញ បានថែ្លងថា បានធូរស្រាលហើយ។
កម្មការិនី នូ មុំ បានថ្លែងឲ្យដឹងដូច្នេះ ៖ «ពីមុនរាងធ្ងន់ធ្ងរដែរ ប៉ុន្តែបានគេដាក់សេរ៉ូមឲ្យរាងធូរ។ មុនដំបូងវាធុំក្លិនថ្នាំបាញ់ក្រណាត់ហ្នឹងទៅ ក៏នាំគ្នាវិល»។
កម្មករម្នាក់ទៀតឈ្មោះ ណារី អាយុ២១ឆ្នាំ មកពីខេត្តតាកែវ នៃរោងចក្រ World Best បានថែ្លងថា ៖ «ឥឡូវរាងធូរបន្តិចហើយ គ្រាន់តែនៅថប់ៗបន្តិចដែរ ហើយវិលចង់ក្អួត»។
ក្រុមគ្រូពេទ្យនៅក្នុងមន្ទីរពេទ្យនោះ បានបដិសេធមិនផ្តល់អត្ថាធិប្បាយណាមួយទេ នៅពេលដែលវិទ្យុអាស៊ីសេរីបានព្យាយាមសាកសួរអំពីរោគសញ្ញានៃកម្មកររងគ្រោះទាំងនោះ។
លោក ស៊ី ណា ជាមន្រ្តីនៃសហជីពសេរីកម្មករកម្ពុជា ដែលបានតាមដានរឿងនេះ បានថ្លែងថា ៖ «សន្លប់នៅក្នុងមន្ទីរពេទ្យនេះមានចំនួនមិនដល់១០០នាក់ទេ ប៉ុន្តែគាត់សម្រាកនៅមន្ទីរពេទ្យផ្សេងៗទៀត»។
ប្រភពពីកម្មករនិងមន្រ្តីក្រសួងការងារនិងបណ្តុះបណ្តាលវិជ្ជាជីវៈ បានឲ្យដឹងថា កម្មករនៅក្នុងរោងចក្រ World Best នោះមានចំនួនសរុបជាង២.០០០នាក់ ប៉ុន្តែកម្មកររងគ្រោះនោះមានចំនួនជាង២០០នាក់តែប៉ុណ្ណោះ។
សូមជម្រាបថា កាលពីខែកញ្ញា កន្លងទៅ កម្មកររោងចក្រកាត់ដេរចំនួនប្រមាណ២រោងចក្រនៅក្នុងទីក្រុងភ្នំពេញ បានដួលសន្លប់ផងដែរ ដោយសារការពុលក្លិននៅក្នុងរោងចក្រ គឺរោងចក្រឈ្មោះ Morea Garment មានកម្មករពុលសន្លប់ចំនួន៦៩នាក់ ហើយមួយសប្តាហ៍ក្រោយមក កម្មករ២៤នាក់ទៀតនៅក្នុងរោងចក្រឈ្មោះ Golden Mile បានពុលសន្លប់ផងដែរ៕