រាជរដ្ឋាភិបាលកម្ពុជាបានប្រកាសម៉ឺងម៉ាត់ បញ្ជាក់ជំហរជាថ្មីរបស់ខ្លួនម្តងទៀតថា កម្ពុជានឹងមិនធ្វើបត្យាប័ន បញ្ជូនអតីតនាយករដ្ឋមន្ត្រីថៃ លោក ថាក់ស៊ីន ឈីនណាវ៉ាត្រ តាមសំណើស្នើសុំជាយថាហេតុណាមួយរបស់រាជរដ្ឋាភិបាលថៃទេ ប្រសិនបើលោក ថាក់ស៊ីន សម្រេចចិត្តមកស្នាក់នៅក្នុងទឹកដីព្រះរាជាណាចក្រកម្ពុជា ឬធ្វើដំណើរចេញចូលកម្ពុជា ដើម្បីបំពេញភារកិច្ចក្នុងការងារណាមួយនោះ។
ក្នុងសេចក្តីថ្លែងការណ៍ពីរទំព័ររបស់អ្នកនាំពាក្យរាជរដ្ឋាភិបាល ចុះថ្ងៃទី៤ ខែវិច្ឆិកា កម្ពុជាបានផ្តល់ហេតុផលដោយផ្អែកលើចំណុចជាច្រើន ដែលក្នុងនោះមាន ៖ ទោះបីជាកម្ពុជានិងថៃ បានចុះហត្ថលេខាកាលពីឆ្នាំ១៩៩៨ លើសន្ធិសញ្ញាស្តីពីបត្យាប័នរវាងប្រទេសទាំងពីរក៏ដោយ រាជរដ្ឋាភិបាលកម្ពុជាយល់ឃើញថា ករណីលោក ថាក់ស៊ីន អតីតនាយករដ្ឋមន្ត្រីថៃ គឺជារឿងនយោបាយ ពីព្រោះលោកបានត្រូវផ្តួលរំលំដោយរដ្ឋប្រហារកាលពីឆ្នាំ២០០៦ ខណៈដែលលោកកំពុងបំពេញបេសកកម្មនៅអង្គការសហប្រជាជាតិ ហើយដំណើររឿងក្តីនិងការផ្តន្ទាទោសប្រឆាំងនឹងរូបលោកនោះ គឺគ្រាន់តែធ្វើឡើងដើម្បីបម្រើហេតុផលនយោបាយតែប៉ុណ្ណោះ។
បន្ថែមពីនេះ លោក ថាក់ស៊ីន បានទទួលការតែងតាំងរួចមកហើយ កាលពីថ្ងៃ២៧ ខែតុលា ឆ្នាំ២០០៩ កន្លងមកនេះ ជាទីប្រឹក្សាផ្ទាល់របស់លោកនាយករដ្ឋមន្ត្រី ហ៊ុន សែន នៃរាជរដ្ឋាភិបាលកម្ពុជា ទទួលបន្ទុកផ្នែកសេដ្ឋកិច្ច។
ទោះជាយ៉ាងនេះក៏ដោយ រាជរដ្ឋាភិបាលកម្ពុជា នៅតែប្រកាន់ជំហរក្នុងការរក្សាចំណងមិត្តភាពនិងកិច្ចសហប្រតិបត្តិការល្អលើគ្រប់វិស័យរវាងកម្ពុជានិងថៃ ហើយចាត់ទុកថា ការអនុញ្ញាតឲ្យលោក ថាក់ស៊ីន ស្នាក់នៅក្នុងប្រទេសកម្ពុជានេះ គឺជាកាយវិការប្រកបដោយគុណធម៌ មិត្តល្អត្រូវចេះជួយគ្នាក្នុងគ្រាលំបាក៕