ស្របពេលដែលលោក ថាក់ស៊ីន អតីតនាយករដ្ឋមន្ត្រីថៃដែលត្រូវគេបណ្តេញចេញពីតំណែងដោយរដ្ឋប្រហារយោធា កំពុងស្នាក់នៅក្នុងប្រទេសកម្ពុជា រដ្ឋាភិបាលថៃបានផ្ញើសំណុំលិខិតជាផ្លូវការដោយសុំឲ្យរដ្ឋាភិបាលកម្ពុជា ចាត់ការបញ្ជូនខ្លួនលោក ថាក់ស៊ីន ទៅឲ្យរដ្ឋាភិបាលក្រុងបាងកកវិញ នៅព្រឹកថ្ងៃពុធ ទី១១ វិច្ឆិកា ឆ្នាំ២០០៩ ទៅតាមអ្វីដែលកម្ពុជាធ្លាប់មានកិច្ចព្រមព្រៀងជាមួយថៃក្នុងការធ្វើបត្យាប័ន។
ប៉ុន្តែលិខិតស្នើសុំរបស់ថៃត្រូវបានលោកនាយករដ្ឋមន្ត្រីខ្មែរថ្លែងទាត់ចោលចំពោះមុខលោក ថាក់ស៊ីន ក្នុងឱកាសជំនួបជាលក្ខណៈគ្រួសាររវាងលោក ថាក់ស៊ីន និងលោក ហ៊ុន សែន នៅភូមិគ្រឹះរបស់លោកនៅក្រុងតាខ្មៅ ខេត្តកណ្តាល នៅថ្ងៃពុធ ទី១១ វិច្ឆិកា។
លោក ហ៊ុន សែន មានប្រសាសន៍ដូច្នេះ ៖ «ថ្ងៃនេះគេបានបញ្ជូនលិខិតសុំធ្វើបត្យាប័ន ឯកឧត្ដម ថាក់ស៊ីន ត្រឡប់ទៅថៃវិញ កម្ពុជាឥឡូវហ្នឹងក៏ប្រហែលជាបានលិខិតហ្នឹងហើយ គិតថាបញ្ជូនត្រឡប់ទៅវិញនូវលិខិតបដិសេធ របស់យើងអំពីការមិនបញ្ជូន»។
ថ្លែងបែបនេះតាមរយៈសន្និសីទកាសែតនៅភូមិគ្រឹះលោកនាយករដ្ឋមន្រ្តី ហ៊ុន សែន នៅក្រុងតាខ្មៅ ហើយត្រូវបានគេចាក់ផ្សាយតាមកញ្ចក់ទូរទស្សន៍ជាតិកម្ពុជា នៅថ្ងៃពុធទី១១ វិច្ឆិកា។
ជាមួយគ្នានេះដែរលោក ថាក់ស៊ីន ឆ្លើយតបនឹងសំណួររបស់អ្នកសែតដែលសួរថា តើលោកមានអារម្មណ៍ភ្ញាក់ផ្អើលយ៉ាងណាដែរទេ នៅពេលដែលមានលិខិតរដ្ឋាភិបាលលោក អាភីស៊ិត វេតឆាឈីវ៉ាក់ (Abhisit Vejjajiva) ស្នើឲ្យធ្វើបត្យាប័នរូបលោកពីប្រទេសកម្ពុជានោះ?
លោកបានបញ្ជាក់ថា លោកមិនមានការភ្ញាក់ផ្អើលអ្វីនោះទេ ព្រោះនៅប្រទេសផ្សេងៗ ដែលមិនមានកិច្ចព្រមព្រៀងបត្យាប័ន ក៏រដ្ឋាភិបាលថៃបច្ចុប្បន្នបានផ្ញើលិខិតឲ្យបញ្ជូនខ្លួនលោកនៅពេលដែលលោកមានវត្តមាននៅក្នុងប្រទេសណាមួយនោះ។
លោក ថាក់ស៊ីន ឈីនណាវ៉ាត្រ បានបញ្ជាក់ដូច្នេះ ៖ "ខ្ញុំរំពឹងថា គេនឹងធ្វើដូច្នេះ ពីព្រោះគេតាមប្រមាញ់ខ្ញុំទៅតាមប្រទេសដែលខ្ញុំមានកិច្ចព្រមព្រៀង ក៏គេបញ្ជូនទៅដែរ..."។
ជាមួយគ្នានេះដែរ កម្ពុជាបានធ្វើកំណត់ទូតមួយផ្ញើទៅក្រុងបាងកកវិញ ដោយមិនទទួលយកការស្នើសុំឲ្យធ្វើបត្យាប័នលោក ថាក់ស៊ីន នោះឡើយ។
ឆ្លើយតបនឹងការទាត់ចោលនេះ លោកនាយករដ្ឋមន្រ្តីនៃប្រទេសថៃ អាភីស៊ិត វេតឆាឈីវ៉ាក់ បានសម្តែងការសោកស្តាយចំពោះប្រទេសកម្ពុជាដែលរំលោភច្បាប់អន្តរជាតិ។
តាមកាសែតថៃ The Nation បានរាយការណ៍ថា រដ្ឋមន្ត្រីក្រសួងការបរទេសរបស់ប្រទេសថៃ នឹងដាក់សំណើសុំបត្យាប័នលោក ថាក់ស៊ីន ជាថ្មីម្តងទៀតនៅពេលខាងមុខ។
លោក ថាក់ស៊ីន បានមកដល់ប្រទេសកម្ពុជាកាលពីថ្ងៃទី១០ វិចិ្ឆកា តាមយន្តហោះផ្ទាល់ខ្លួន ក្នុងនាមលោកជាទីប្រឹក្សាសេដ្ឋកិច្ចរបស់រដ្ឋាភិបាលកម្ពុជា និងជាទីប្រឹក្សាផ្ទាល់លោកនាយករដ្ឋមន្រ្តី ហ៊ុន សែន៕