ទង្វើរបស់កម្ពុជានេះ បានធ្វើឡើងនៅបន្ទាប់ពីរាជរដ្ឋាភិបាលថៃបានកោះហៅឯកអគ្គរាជទូតរបស់ខ្លួនចេញពីកម្ពុជា កាលពីរសៀលថ្ងៃព្រហស្បតិ៍ ទី៥ វិច្ឆិកា នេះដែរ ក្រោយដែលរដ្ឋាភិបាលថៃ បានប្រឆាំងតវ៉ាទៅនឹងការតែងតាំងអតីតនាយករដ្ឋមន្ត្រីថៃ លោក ថាក់ស៊ីន ឈីនណាវ៉ាត្រ (Thaksin Shinawatra) ជាទីប្រឹក្សាផ្ទាល់របស់លោកនាយករដ្ឋមន្រ្តី ហ៊ុន សែន និងជាទីប្រឹក្សារាជរដ្ឋាភិបាលកម្ពុជា ទទួលបន្ទុកសេដ្ឋកិច្ចនោះមក។
លោកឧបនាយករដ្ឋមន្ត្រី សុខ អាន បានមានប្រសាសន៍នៅក្នុងសន្និសីទកាសែតកាលពីយប់ថ្ងៃ៥ វិច្ឆិកានេះថា ៖ «រាជរដ្ឋាភិបាលកម្ពុជាក៏បានសម្រេចចិត្តកោះហៅលោកជំទាវ យូ អយ ដែលជាឯកអគ្គរាជទូតរបស់យើងប្រចាំព្រះរាជាណាចក្រថៃ ឲ្យត្រឡប់មកប្រទេសវិញមួយរយៈពេលដែរ ដូច្នេះយើងអាចចាត់ទុកថា នេះជាបដិការរវាងរដ្ឋាភិបាលនិងរដ្ឋាភិបាល។ យើងមិនអាចនិយាយបានថា វិធានការនេះនឹងនាំឲ្យប៉ះពាល់ដល់ទំនាក់ទំនងទ្វេភាគីកម្រិតណានោះទេ អាស្រ័យដែលភាគីទាំងសងខាងប្រកាន់យកនាពេលខាងមុខនេះទៀត។ ការកោះហៅទូតនេះជារឿងធម្មតាដល់សភាពការណ៍វាល្អវិញ ទូតទាំងពីរត្រឡប់មកធ្វើការដូចដើមវិញទៅ»។
លោកឧបនាយករដ្ឋមន្ត្រី សុខ អាន ក៏បានមានប្រសាសន៍បញ្ជាក់ប្រាប់ផងដែរថា ការតែងតាំងលោក ថាក់ស៊ីន ជាទីប្រឹក្សារបស់រាជរដ្ឋាភិបាលកម្ពុជានេះ គឺជារឿងធម្មតា សូម្បីតែប្រធានាធិបតីកូរ៉េខាងត្បូងបច្ចុប្បន្ន ក៏ធ្លាប់បានធ្វើជាទីប្រឹក្សាផ្ទាល់របស់លោកនាយករដ្ឋមន្ត្រី ហ៊ុន សែន ពីមុនផងដែរ។
លោក សុខ អាន មានប្រសាសន៍ដូច្នេះ ៖ «អ្នកដឹកនាំរដ្ឋាភិបាលខ្លះក៏បាននិយាយដែរថា ការតែងតាំងឯកឧត្ដម ថាក់ស៊ីន អតីតនាយករដ្ឋមន្រ្តីថៃ ដោយកម្ពុជា ជាទីប្រឹក្សាហ្នឹង វាជារឿងធម្មតា វាជារឿងផ្ទៃក្នុងរបស់កម្ពុជា មិនមានពាក់ព័ន្ធអ្វីទៅដល់ការងារក្រៅប្រទេសនោះទេ ព្រោះកន្លងមកយើងក៏បានកត់សម្គាល់ដែរ សូម្បីតែឯកឧត្ដមប្រធានាធិបតីបច្ចុប្បន្ន នៃសាធារណរដ្ឋកូរ៉េ ពីមុនលោកក៏ធ្លាប់ធ្វើជាទីប្រឹក្សាជូនសម្ដេចអគ្គមហាសេនាបតីតេជោ ហ៊ុន សែន ដែរ»។
ក្នុងសន្និសីទកាសែតកាលពីថ្ងៃ៥ វិច្ឆិកានេះ រដ្ឋមន្ត្រីការបរទេសថៃ បានថ្លែងថា ទង្វើរបស់លោកនាយករដ្ឋមន្ត្រី ហ៊ុន សែន ចំពោះការតែងតាំងលោក ថាក់ស៊ីន នេះ បានត្រូវចាត់ទុកថា ជាការជ្រៀតជ្រែកចូលកិច្ចការផ្ទៃក្នុង និងជាការមើលងាយដល់ប្រព័ន្ធតុលាការថៃ ហើយថា លោកនាយករដ្ឋមន្ត្រី ហ៊ុន សែន ពុំអាចធ្វើការបែងចែកឲ្យដាច់ស្រឡះរវាងទំនាក់ទំនងផ្ទាល់ខ្លួន និងផលប្រយោជន៍ជាតិរវាងប្រទេសទាំងពីរ កម្ពុជានិងថៃ។
សូមជម្រាបជូនផងដែរថា ក្នុងសេចក្តីថ្លែងការណ៍របស់អ្នកនាំពាក្យរាជរដ្ឋាភិបាលកម្ពុជា បានអះអាងថា កម្ពុជានៅតែប្រកាន់ជំហរក្នុងការរក្សាចំណងមិត្តភាព និងកិច្ចសហប្រតិបត្តិការល្អលើគ្រប់វិស័យរវាងប្រទេសទាំងពីរ ហើយចាត់ទុកថា ការអនុញ្ញាតឲ្យលោក ថាក់ស៊ីន ស្នាក់នៅនិងចេញចូលក្នុងប្រទេសកម្ពុជានេះ គឺជាកាយវិការប្រកបដោយគុណធម៌ ដែលមិត្តល្អត្រូវចេះជួយគ្នាក្នុងគ្រាលំបាក។
មតិសង្គមស៊ីវិលជុំវិញបញ្ហាការដកឯកអគ្គរាជទូតរវាងកម្ពុជានិងថៃ
ស្តីពីបញ្ហាដកឯកអគ្គរាជទូតរវាងកម្ពុជានិងថៃនេះ មន្ត្រីសង្គមស៊ីវិលមួយចំនួនបានផ្តល់ទស្សនៈនិងយោបល់ខុសៗគ្នា។
លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា បានមានប្រសាសន៍យ៉ាងនេះថា ៖ «ឥឡូវនេះ ខ្ញុំថា ជាប្រធានបទមួយដ៏រសើប រាជរដ្ឋាភិបាលខ្មែរយើងគួរតែមានការប្រុងប្រយ័ត្ន យើងមិនចង់ឲ្យមានការតានតឹងរវាងប្រទេសថៃ និងប្រទេសកម្ពុជាទេ។ យើងដឹងថា លោក ថាក់ស៊ីន គឺជារឿងនយោបាយនៅក្នុងប្រទេសថៃក៏ដោយ ខ្ញុំមើលទៅការតែងតាំងនេះវាគ្រាន់តែជាប្រតិកម្មមួយរបស់សម្ដេចនាយករដ្ឋមន្រ្តីទៅលើបញ្ហាថៃ ជាពិសេសបញ្ហាជម្លោះព្រំដែននិងករណីផ្សេងទៀតដែលថៃបានធ្វើ។ ប៉ុន្តែខ្ញុំយល់ថា ការប្រតិកម្មនេះ ប្រទេសកម្ពុជាគួរតែបង្ហាញភាពចាស់ទុំជាងថៃ ត្រូវតែព្យាយាមធ្វើម៉េចកាត់បន្ថយភាពតានតឹងរវាងប្រទេសទាំងពីរ ព្រោះនៅពេលមានជម្លោះនៅពេលមានភាពតានតឹងបច្ចុប្បន្ន យើងឃើញថាខាតដល់សេដ្ឋកិច្ចប្រទេសទាំងសងខាង ហើយប៉ះពាល់ដល់ប្រជាពលរដ្ឋអ្នកក្រីក្រខ្លាំង»។
ចំណែកឯលោក ជា មុន្នី ប្រធានសហជីពសេរីកម្មករនៃព្រះរាជាណាចក្រកម្ពុជា បានមានប្រសាសន៍ថា បញ្ហាដកមន្ត្រីទូតចេញពីកម្ពុជានិងថៃនេះ អាចប៉ះពាល់ខ្លាំងដល់វិស័យសេដ្ឋកិច្ចនិងកម្មករខ្មែររាប់ពាន់នាក់។
លោក ជា មុន្នី មានប្រសាសន៍ដូច្នេះ ៖ «យើងឃើញថា ផលិតផលមួយចំនួននាំយកមកពីប្រទេសថៃ ទី១។ ទី២យើងឃើញថា ពលករកម្ពុជាបានចូលធ្វើការនៅក្នុងប្រទេសថៃ រាប់ម៉ឺននាក់ ដូច្នេះយើងមានការព្រួយបារម្ភទៅនឹងសុវត្ថិភាពមន្រ្តីស៊ីវិល ឬក៏ប្រជាពលរដ្ឋខ្មែរដែលកំពុងតែរស់នៅប្រទេសថៃ យើងឃើញថា បើកាលណាដកទូត ដាច់ខាតព្រំប្រទល់ត្រូវតែបិទ កាលណាបិទ ព្រំប្រទល់ប្រទេសថៃ គឺជាច្រកមួយសំខាន់ណាស់ក្នុងការផ្ទេរទំនិញរវាងកម្ពុជា-ថៃទៅវិញទៅមក។ ប្រសិនបើយើងមិនបានរក្សាចំណងរវាងកម្ពុជា-ថៃ ឲ្យបានល្អទេ យើងនឹងមានបញ្ហាជាច្រើន។ ទី១ បញ្ហាវិបត្តិសេដ្ឋកិច្ច បញ្ហាទី២ គឺបញ្ហារវាងនយោបាយថៃនិងកម្ពុជា ហើយក្នុងនោះយើងឃើញថា ប៉ះពាល់ច្រើនទៅដល់ពលករ ពលការិនីកម្ពុជា ដែលកំពុងធ្វើការនៅក្នុងប្រទេសថៃនេះ»។
ទោះបីជាមានការអះអាងខាងលើនេះបែបណាក៏ដោយ លោក សុក សំអឿន ប្រធានក្រុមអ្នកច្បាប់ការពារសិទ្ធិកម្ពុជា បានមានប្រសាសន៍ពន្យល់ថា ការតែងតាំងលោក ថាក់ស៊ីន នេះ បើគិតតាមច្បាប់ពុំមានខុសឆ្គងអ្វីឡើយ។
លោក សុក សំអឿន មានប្រសាសន៍ដូច្នេះ ៖ «ពីរឿងបញ្ហាច្បាប់វាមិនពាក់ព័ន្ធខុសឆ្គងអីទេ ហើយម្យ៉ាងទៀត រដ្ឋាភិបាលយើងឲ្យតម្លៃថា អ្វីដែលគេចោទប្រកាន់លោក ថាក់ស៊ីន ជារឿងនយោបាយ បើគាត់ជាឧក្រិដ្ឋជនធម្មតាទៅ ហ្នឹងយើងមិនសមយកឧក្រិដ្ឋជនមកធ្វើជាទីប្រឹក្សា ក៏ប៉ុន្តែនេះជារឿងនយោបាយ ព្រោះបញ្ហានយោបាយយើងមិនទាន់ដឹងយ៉ាងម៉េចទេ មិនអ៊ីចឹង? ក្រែងលោកបោះឆ្នោតលើកក្រោយទៅ គណបក្សជាតិថៃ របស់លោក ឆាវ៉ាលីត យុងឆៃយុត (Chavalit Yongchaiyudh) គាត់ឈ្នះឆ្នោតវិញទៅ លោក ថាក់ស៊ីន ចូលស្រុកទៅ អាចមានទំនាក់ទំនងធម្មតាល្អវិញ ហ្នឹងធម្មតា»៕