លោក ឈុំ សុជាតិ អនុរដ្ឋលេខាធិការ និងជាអ្នកនាំពាក្យក្រសួងការពារជាតិ បានមានប្រសាសន៍ឲ្យដឹងថា កងកម្លាំង រួមទាំងកាំភ្លើងតូចធំ និងរថពាសដែក បានដកចេញចំនួន៥០%តាមយុទ្ធសាស្ត្រកំណត់ ហើយកងទ័ពដែលបានដកមកក្រោយនោះគឺមានចំនួនបីកងពល គឺកងពលមកពីខេត្តព្រះវិហារ កងពលមកពីខេត្តកំពង់ធំ និងកងពលតូចលេខ១១ ជាដើមនោះ។
លោក ឈុំ សុជាតិ បានបញ្ជាក់ថា ៖ «កន្លែងណាយើងគួរដក កន្លែងណាយើងមិនគួរដក យើងគិតលើចំនួនទ័ពជាក់ស្ដែង។ មិនបានន័យថា ៥០%នៃចំនួនដែលនៅមុខ ដក៥០ដូចយើងចែកទេ... បានន័យថា ចំនួនរួមហ្នឹងយើងគិតគូរថា កន្លែងណាយើងត្រូវធ្វើឈ្នាន់ យើងត្រូវរក្សាទុក កន្លែងណាយើងមិនត្រូវធ្វើទេ យើងដកចេញមកក្រោយ។ បានន័យថា យើងដកនេះ ដកក្នុងនាមយុទ្ធសាស្ត្រយោធារបស់យើង យើងមិនដកទាំងស្រុងទេ។ ភាគច្រើនទ័ពយើងគាត់មានមូលដ្ឋានអីរៀបចំអស់ហើយនៅកន្លែងដែលចាំបាច់ គាត់អាចត្រឡប់ទៅវិញបានទាន់ពេលវេលា»។
ការដកកម្លាំងកងទ័ពចេញនោះធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន មានប្រសាសន៍ថា កងទាហានថៃបានដកចេញពីតំបន់ព្រំដែនក្បែរតំបន់ប្រាសាទព្រះវិហារខ្មែរនោះ ហើយសភាពការណ៍នឹងមិនមានការផ្ទុះអាវុធនោះទេ។
លោក Jonh Jonhson មន្ត្រីអ្នកនាំពាក្យស្ថានទូតសហរដ្ឋអាមេរិកប្រចាំនៅកម្ពុជា បានមានប្រសាសន៍ដែរថា សកម្មភាពដកកងទ័ពនេះគឺជាសញ្ញាល្អនៃដំណើរការចរចាដោយសន្តិវិធីរវាងប្រទេសទាំងពីរ ហើយនឹងឈានទៅរកដំណោះស្រាយសន្តិភាពមួយ។
ចំពោះការដកទ័ពមួយចំនួននេះ លោក សុន ឆ័យ អ្នកតំណាងរាស្ត្រគណបក្សសមរង្ស៊ី បានមានប្រសាសន៍ថា ការដកកងទ័ពនេះមិនមែនជាដំណោះស្រាយបញ្ហាព្រំដែនជាមួយប្រទេសថៃនោះឡើយ។
លោក សុន ឆ័យ បានមានប្រសាសន៍ថា ៖ «ចង់ដឹងដែរថា ការដកមកវិញនេះដោយហេតុអី? ព្រោះតាមព័ត៌មានថា ដកតែខាងយើងហើយថៃគេនៅរក្សាសភាពការណ៍គេដដែលទេ។ បញ្ហាព្រំដែនជាមួយថៃនេះ មិនយល់ថាតើជាយុទ្ធសាស្ត្របែបម៉េចដែលរដ្ឋាភិបាលសម្រេចចិត្តបែបហ្នឹង ឬមួយថៃបានសន្យាថា មិនធ្វើសកម្មភាពឈ្លានពានបន្ថែមទៀត ឬយ៉ាងដូចម្តេច? ទោះបីជាយ៉ាងណាក៏ដោយខ្ញុំថា ការដកទ័ពនេះមិនឈានទៅដល់ការនាំឲ្យថៃគោរពបូរណភាពទឹកដីយើងនោះទេ»។
លោក សុន ឆ័យ បញ្ជាក់ថា ដំណោះស្រាយបញ្ហាព្រំដែនជាមួយនឹងប្រទេសថៃនោះ គឺមិនអាចធ្វើបានតាមកម្លាំងកងទ័ពឬការចរចាទេ្វភាគីរវាងកម្ពុជានិងថៃនោះទេ ដំណោះស្រាយអាចជោគជ័យទៅបានលុះត្រាតែមានការចូលរួមពីអន្តរជាតិ រួមទាំងប្រទេសតំបន់អាស៊ានជំរុញឲ្យប្រទេសថៃគោរពបូរណភាពទឹកដីនៃប្រទេសជាសមាជិក និងជំរុញឲ្យប្រទេសជាហត្ថលេខីនៃកិច្ចព្រមព្រៀងសន្តិភាពទីក្រុងប៉ារីសនោះ ដើម្បីធានាថា ប្រទេសថៃមិនរំលោភលើបូរណភាពទឹកដីនៃប្រទេសកម្ពុជា៕