ពាក្យបណ្ដឹងនេះ កំពុងត្រូវបានអ្នកច្បាប់របស់រដ្ឋាភិបាលកម្ពុជា កំពុងតែរៀបចំចងក្រង និងផ្ញើទៅតុលាការយុត្តិធម៌អន្តរជាតិ នៅក្រោយពីកិច្ចប្រជុំថ្នាក់រដ្ឋមន្ត្រីការបរទេសអាស៊ាន នៅទី២២ ខែកុម្ភៈ នៅក្នុងប្រទេសឥណ្ឌូណេស៊ី បានឈានដល់ទីបញ្ចប់ខាងមុខនេះ។
លោកនាយករដ្ឋមន្ត្រី ហ៊ុន សែន ប្រទេសកម្ពុជា បានមានប្រសាសន៍នៅក្នុងសន្និសីទកាសែត នៅថ្ងៃទី១៧ ខែកុម្ភៈ នៅឯវិមានសន្តិភាពនៅក្នុងទីក្រុងភ្នំពេញថា កម្ពុជាមិនសុំឲ្យតុលាការយុត្តិធម៌អន្តរជាតិនេះ កាត់ក្ដីជាថ្មីទេ ប៉ុន្តែសុំឲ្យបកស្រាយសាលក្រម ឆ្នាំ១៩៦២។
លោកនាយករដ្ឋមន្ត្រីបានថ្លែងថា ៖ «ខាងភាគីថៃថា បានត្រៀមខ្លួនហើយដែរ។ បើយើងធ្វើយ៉ាងដូច្នេះវាស្រួល កម្ពុជាក៏ស្រួល ថៃក៏ស្រួលក្នុងផ្នែករាជរដ្ឋាភិបាល។ ឥឡូវឧទាហរណ៍ថា គេបកស្រាយទៅថា ហ្នឹងជាដីរបស់ថៃ យើងសុខចិត្តចេញថា ហ្នឹងដីរបស់ថៃ ហើយបើសិនគេបកស្រាយថា ហ្នឹងជាដីកម្ពុជា អាហ្នឹងត្រូវកម្ពុជាយក»។
លោក ហ៊ុន សែន បានប្រកាសឲ្យដឹងដូច្នេះ គឺក្រោយពេលដែលលោកបានជួបជាមួយឧបនាយករដ្ឋមន្ត្រីថៃ លោក ត្រៃរុង ស៊ូវ៉ាន់គិរី (Trairong Suwankiri) ដែលមកបំពេញទស្សនកិច្ចនៅក្នុងប្រទេសកម្ពុជា នៅថ្ងៃទី១៧ ខែកុម្ភៈ ដើម្បីមកចូលរួមពិធីតាំងពិព័រណ៍ពាណិជ្ជកម្មរវាងកម្ពុជា-ថៃ នៅមជ្ឈមណ្ឌលពាណិជ្ជកម្មកោះពេជ្រ នៅក្នុងទីក្រុងភ្នំពេញ។
អ្នកវិភាគនយោបាយនៅក្នុងប្រទេសកម្ពុជា លោកបណ្ឌិត សុខ ទូច បានមានប្រសាសន៍ថា នេះជាជម្រើសថ្មីមួយដែលល្អសម្រាប់កម្ពុជា ៖ «ដូច្នេះយកអាហ្នឹងបកស្រាយមកវិញមក ហើយយើងយកគោលការណ៍មកអនុវត្ត អាហ្នឹងជោគជ័យតែម្ដង ពីព្រោះយើងដឹងហើយថា គ្មានប្រទេសណាដែលមិនរកផលចំណេញឲ្យប្រទេសខ្លួនទេ»។
ឯកសាររបស់រាជបណ្ឌិតសភាប្រទេសកម្ពុជា ដែលបានចងក្រងសំណុំរឿងប្រាសាទព្រះវិហារ បានចែងថា តុលាការយុត្តិធម៌អន្តរជាតិបានជម្រះរឿងក្ដីនៅថ្ងៃទី១៥ ខែមិថុនា ឆ្នាំ១៩៦២ សម្រេចឲ្យខ្មែរបានទទួលជ័យជម្នះក្នុងរឿងក្ដីនេះ។ ដំបូងប្រទេសថៃ បានបដិសេធចំពោះសាលក្រមនេះ។ ប៉ុន្តែនៅទីបញ្ចប់ នៅថ្ងៃទី២១ ខែមិថុនា ឆ្នាំ១៩៦២ លោកសេនាប្រមុខ សារិត ថាណារ័ត្ន (Sarit Thanarat) បានថ្លែងថា ប្រទេសរបស់លោកលំឱនកាយទទួលសេចក្ដីសម្រេចរបស់តុលាការអន្តរជាតិ ដើម្បីគោរពតាមកិច្ចសន្យាធម្មនុញ្ញសហប្រជាជាតិ។
ការប្ដឹងទៅតុលាការយុត្តិធម៌អន្តរជាតិ ត្រូវបានមេដឹកនាំប្រទេសកម្ពុជា លោក ហ៊ុន សែន បានពណ៌នាថា គឺជាជម្រើស ឬច្រកមួយទៀត ក្រោយពីការប្ដឹងទៅក្រុមប្រឹក្សាសន្តិសុខអង្គការសហប្រជាជាតិ និងសមាគមអាស៊ាន ជាភាគីទី៣ ដើម្បីដោះស្រាយចំពោះអ្វីដែលកម្ពុជា បានចោទថា ជាការឈ្លានពានរបស់កងទ័ពថៃ៕