អង្គការឃ្លាំមើលពិភពលោក (Global Witness) ដែលធ្លាប់តែងតែជំរុញឲ្យរដ្ឋាភិបាលកម្ពុជា កម្ចាត់អំពើពុករលួយនោះ បានស្វាគមន៍ចំពោះវិធានការថ្មីរបស់រដ្ឋាភិបាលដែលមិនធ្លាប់មានពីមុនមក ក្នុងការអនុវត្តទៅមន្ត្រីពុករលួយក្នុងប្រព័ន្ធតុលាការ។ អង្គការនេះក៏បានទាមទារឲ្យរដ្ឋាភិបាលកម្ពុជា ពិនិត្យ និងតាមដានផងដែរ ទៅលើក្រុមមន្ត្រីក្នុងជួររដ្ឋាភិបាលជាច្រើន ដែលធ្លាប់ត្រូវគេរាយការណ៍ថា ជាក្រុមដែលប្រព្រឹត្តអំពើពុករលួយកម្រិតខ្ពស់នោះ។
លោក ចច បូឌិន (George Boden) ដែលជាមន្ត្រីទទួលបន្ទុកខាងកិច្ចការតំបន់អាស៊ី របស់អង្គការ Global Witness មានប្រសាសន៍ថា ស្ថាប័នរបស់លោកសូមកោតសរសើរដល់ចំណាត់ការរបស់រដ្ឋាភិបាលកម្ពុជា លើកដំបូង ក្នុងកិច្ចខិតខំប្រឹងប្រែងបំបាត់អំពើពុករលួយ។
លោកមានប្រសាសន៍បន្តថា អង្គភាពប្រឆាំងអំពើពុករលួយ គួរធ្វើការស៊ើបអង្កេត ឬចាត់វិធានការឲ្យមានប្រសិទ្ធភាពថែមទៀត ចំពោះក្រុមមន្ត្រីមានអំណាចមួយចំនួន និងក្រុមគ្រួសាររបស់ប្រមុខដឹកនាំខ្មែរ ដែលរងការចោទប្រកាន់ពីបទពុករលួយក្នុងការចូលរួមបំផ្លាញធនធានធម្មជាតិរបស់ប្រទេស។
លោក ចច បូឌិន បន្ថែមថា ៖ "ទាក់ទិនអំពើពុករលួយកម្រិតរបស់កម្ពុជា យើងអាចក្រឡេកមើលទៅលើការចោទប្រកាន់នានា អំពីការលក់អាជ្ញាប័ណ្ណសម្បទានដីសេដ្ឋកិច្ច ឬអាជ្ញាប័ណ្ណរុករករ៉ែ ទៅក្រុមហ៊ុនឯកជនបរទេសយ៉ាងសម្ងាត់នោះជាដើម។ ហើយអ្វីដែលយើងមើលឃើញជាច្រើនលើកច្រើនសាកន្លងមកនោះ គឺថា កម្ពុជាខ្វះតម្លាភាព ដោយសារប្រាក់ចំណូលពីការលក់អាជ្ញាប័ណ្ណទាំងនេះមិនបានចុះក្នុងបញ្ជីគណនេយ្យរបស់រដ្ឋ"។
លោក ឱម យ៉ិនទៀង ប្រធានអង្គភាពប្រឆាំងអំពើពុករលួយនៅមិនអាចផ្ដល់បទសម្ភាសន៍ជាមួយវិទ្យុអាស៊ីសេរីបានទេ ទាក់ទិនទៅនឹងការជំរុញរបស់អង្គការ Global Witness ឲ្យពិនិត្យលើករណីក្រុមមន្ត្រីក្នុងការបំផ្លាញធនធានធម្មជាតិរបស់កម្ពុជានោះ។
របាយការណ៍ប្រចាំឆ្នាំរបស់អង្គការឃ្លាំមើលពិភពលោក កាលពីឆ្នាំ២០០៩ ដែលមានចំណងជើងថា កម្ពុជាជាប្រទេសសម្រាប់លក់ បានផ្សាយថា លោក ឱម យ៉ិនទៀង ដែលជាទីប្រឹក្សារបស់លោកនាយករដ្ឋមន្ត្រី ហ៊ុន សែន និងជាអតីតប្រធានគណៈកម្មការសិទ្ធិមនុស្សរបស់រដ្ឋាភិបាល គឺជាអ្នកនៅពីក្រោយការផ្ដល់អាជ្ញាប័ណ្ណរុករករ៉ែទៅក្រុមហ៊ុនបរទេស ប៉ុន្តែការចោទប្រកាន់នេះ ធ្លាប់ត្រូវបានលោក ឱម យ៉ិនទៀង បដិសេធ។
អង្គភាពប្រឆាំងអំពើពុករលួយរបស់រដ្ឋាភិបាលដែលដឹកនាំដោយលោក ឱម យ៉ិនទៀង កាលពីថៃ្ងទី២៩ ខែវិច្ឆិកា ថ្មីៗនេះ បានចុះចាប់ព្រះរាជអាជ្ញាតុលាការខេត្តពោធិ៍សាត់ លោក តុប ច័ន្ទសិរីវុធ រួមនឹងជនសមគំនិតពីរនាក់ទៀត ពីបទចោទប្រកាន់ប្រព្រឹត្តអំពើពុករលួយលើប្រាក់សំណូកចំនួន ៨ពាន់ដុល្លារអាមេរិកពីអ្នកដឹកឈើខុសច្បាប់។
ទន្ទឹមនឹងការស្វាគមន៍របស់អង្គការឃ្លាំមើលពិភពលោក (Global Witness) ចំពោះចំណាត់ការរបស់អង្គភាពប្រឆាំងអំពើពុករលួយកន្លងមកនេះ ក្រុមសង្គមស៊ីវិលនៅកម្ពុជា ក៏បានអបអរចំពោះវិធានការនេះដែរ។
មន្ត្រីផ្នែកស៊ើបអង្កេតរបស់អង្គការការពារសិទ្ធិមនុស្សអាដហុក លោក ចាន់ សុវ៉េត មានប្រសាសន៍ថា ការចាប់មន្ត្រីតុលាការពីបទពុករលួយជាជំហានមួយល្អឆ្ពោះទៅរកការបោសសម្អាតការស៊ីសំណូកសូកប៉ាន់ទាំងឡាយ ដែលតែងកើតមានក្នុងសង្គមរបស់កម្ពុជា។
លោក ចាន់ សុវ៉េត មានប្រសាសន៍បន្តថា ទន្ទឹមនឹងការអបអរនេះ លោកក៏មានការព្រួយបារម្ភផងដែរ ចំពោះការចាប់ខ្លួនលោក តុប ច័ន្ទសិរីវុធ អតីតព្រះរាជអាជ្ញាខេត្តពោធិ៍សាត់នេះ ថា បានធ្វើឡើងសមស្របទៅតាមនីតិវិធី ឬយ៉ាងណានោះ។
ទោះបីជាយ៉ាងណាក៏ដោយ ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង ធ្លាប់មានប្រសាសន៍ប្រាប់ក្រុមអ្នកយកព័ត៌មានថា អង្គភាពរបស់លោកមានភស្តុតាងគ្រប់គ្រាន់ក្នុងការចាប់ខ្លួនលោក តុប ច័ន្ទសិរីវុធ ហើយថា ការចាប់ខ្លួននេះ មិនមែនការបំពានលើអំណាចតុលាការនោះឡើយ។
ចំណែកពីប្រទេសអង់គ្លេសឯណោះវិញ លោកបណ្ឌិត ឡៅ ម៉ុងហៃ ដែលជាអ្នកឃ្លាំមើលប្រព័ន្ធយុត្តិធម៌នៅកម្ពុជា មានប្រសាសន៍ស្រដៀងគ្នាទៅនឹងលោក ចាន់ សុវ៉េត ខាងលើដែរ ដែលលោកព្រួយបារម្ភអំពីការបំភិតបំភ័យដល់ប្រព័ន្ធតុលាការ។
តែទោះបីជាយ៉ាងក៏ដោយ លោកមានប្រសាសន៍ថា វាជាចលនាចាប់ផ្តើមមួយដ៏ល្អ ក្នុងការបោសសម្អាតប្រព័ន្ធតុលាការកម្ពុជា ដែលល្បីសុះសាយជាយូរឆ្នាំមកហើយខាងអំពើពុករលួយនោះ។
ច្បាប់ប្រឆាំងអំពើពុករលួយរបស់កម្ពុជា កាលពីថ្ងៃទី១១ ខែមីនា ឆ្នាំ២០១០ ត្រូវបានអនុម័តដោយសំឡេងភាគច្រើនក្នុងរដ្ឋសភាចំនួន ៨២ លើ ៨២សំឡេង។
លោកស្រី ជា វណ្ណាត ដែលជាអ្នកវិភាគឯករាជ្យអំពីស្ថានការណ៍នៅកម្ពុជា បានឲ្យដឹងថា ដើម្បីការបំបាត់អំពើពុករលួយឲ្យមានប្រសិទ្ធភាពនោះ គឺត្រូវធ្វើយ៉ាងណាបង្ការកុំឲ្យអំពើនេះកើតមានទាន់។
ចំណែកលោក អំ សំអាត ដែលជាបុគ្គលិកផ្នែកស៊ើបអង្កេតរបស់អង្គការលីកាដូ បានអំពាវនាវដល់អង្គភាពប្រឆាំងអំពើពុករលួយរបស់កម្ពុជា ឲ្យចាត់វិធានការបន្ថែមទៀតទៅលើមន្ត្រីរដ្ឋាភិបាលជាន់ខ្ពស់។
ក្រុមអ្នកវិភាគនិយាយថា គេនៅមានមន្ទិលសង្ស័យជាច្រើនចំពោះអង្គភាពប្រឆាំងអំពើពុករលួយថា មិនមានភាពឯករាជ្យ និងមិនមានតម្លាភាព ខណៈក្រុមមន្ត្រីនៃអង្គភាពនេះភាគច្រើនត្រូវបានតែងតាំងដោយរដ្ឋាភិបាល។
របាយការណ៍របស់អង្គការតម្លាភាពអន្តរជាតិ (Transparency International) សម្រាប់ឆ្នាំ២០១០ បានបង្ហាញសន្ទស្សន៍ពីការវាយតម្លៃដល់បណ្ដាប្រទេសជាច្រើនក្នុងពិភពលោក បានរកឃើញថា កម្ពុជាស្ថិតក្នុងជួរទី១៥៤ ក្នុងចំណោមប្រទេសចំនួន ១៧៨ ដែលអនុវត្តនូវតម្លាភាព។
អង្គការ Global Witness ធ្លាប់បានរាយការណ៍ផងដែរថា តម្លាភាពនៅកម្ពុជា នៅមានកម្រិត ដោយសារប្រាក់ចំណូលរបស់ប្រទេសជាច្រើនមិនបានចុះក្នុងបញ្ជីគណនេយ្យរបស់រដ្ឋ។
កាលពីឆ្នាំ២០០៩ អង្គការនេះបានរាយការណ៍ផងដែរថា ក្រុមហ៊ុនប្រេងរបស់ប្រទេសអង់គ្លេស ឈ្មោះ BHP Billiton បានផ្ដល់លុយចំនួន ១លានដុល្លារដល់កម្ពុជា ហើយក្រុមហ៊ុន PT Medico Energy International របស់ប្រទេសឥណ្ឌូណេស៊ី បានឲ្យលុយចំនួន ៧លាន ៥សែនដុល្លារសហរដ្ឋអាមេរិកដល់អាជ្ញាធរប្រេងកាតជាតិរបស់កម្ពុជា ហើយលុយទាំងនោះមិនបានឃើញចុះក្នុងបញ្ជីគណនេយ្យរបស់រដ្ឋរហូតមកទល់សព្វថ្ងៃនេះ៕