ទាហានខ្មែរប្រចាំនៅតំបន់ខ្សែត្រៀមប្រយុទ្ធសុំមិនបញ្ចេញឈ្មោះ ប្រាប់វិទ្យុអាស៊ីសេរីឲ្យដឹងថា មេទ័ពកម្ពុជា បានព្រមានវាយប្រហារសងសឹកទៅលើកងទ័ពថៃ ប្រសិនបើកងទ័ពថៃ មិនឈប់បាញ់ និងបោកគ្រាប់បែកមកលើកម្ពុជា។ ការព្រមានរបស់កម្ពុជា ធ្វើឡើងក្នុងជំនួបចរចារវាងមេទ័ពកម្ពុជា និងថៃ នៅថ្ងៃពុធ ទី១៦ ខែកុម្ភៈ។
ទាហានខ្មែរបានឲ្យដឹងទៀតថា ចាប់តាំងពីការចរចាមក ការផ្ទុះអាវុធបានផ្អាកហើយ ៖ «ថ្ងៃនេះអត់មានអីទ។ យើងចរចាគ្នា មេៗចរចាគ្នា ប្រសិនបើផ្ទុះអាវុធទៀតយើងនឹងព្រមានវា។ វាបាញ់តែគ្នាវា។ វាបាញ់ខ្ពស់»។
កាលពីថ្ងៃអង្គារ ទី១៥ ខែកុម្ភៈ មានទីភ្នាក់ងារព័ត៌មានជាច្រើនបានដកស្រង់សម្ដីរបស់មន្ត្រីអ្នកនាំពាក្យយោធាថៃថា កងទ័ពកម្ពុជា បានវាយប្រហារទៅលើកងទ័ពថៃ។
កាសែតបាងកក ប៉ុសិ៍ (Bangkok Post) នៅថ្ងៃពុធ ទី១៦ ខែកុម្ភៈ បានដកស្រង់សម្ដីរបស់អ្នកនាំពាក្យថៃថា កងទ័ពកម្ពុជា បានចាប់ផ្តើមវាយប្រហារមកលើកងទ័ពថៃ នៅម៉ោងប្រមាណ ៨យប់ថ្ងៃអង្គារ ប៉ុន្តែត្រូវបានរុញច្រានចេញទៅវិញ។ មន្ត្រីថៃ បន្ថែមទៀតថា កងទ័ពកម្ពុជា ព្យាយាមវាយយកបន្ទាយទាហានថៃ ទើបបានបណ្ដាលឲ្យមានការបាញ់គ្នាដោយកាំភ្លើងយន្ត និងគ្រាប់បែក។
មន្ត្រីដដែលក៏បានចោទប្រកាន់កម្ពុជាថា មិនបានគោរពសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃទី១៤ ខែកុម្ភៈ ដែលបានស្នើឲ្យភាគីកម្ពុជា និងថៃ រក្សាភាពអត់ធ្មត់ និងដោះស្រាយវិបត្តិដោយអហិង្សា។
ការចោទប្រកាន់របស់ថៃនេះ ត្រូវបានក្រសួងការបរទេសកម្ពុជា បដិសេធ។
ក្រសួងការបរទេសកម្ពុជា បានចេញសេចក្ដីថ្លែងការណ៍នៅថ្ងៃទី១៦ ខែកុម្ភៈថា កងទ័ពថៃ បានវាយប្រហារមកលើកងទ័ពកម្ពុជាមុន។
កម្ពុជាបញ្ជាក់ថា ចាប់ពីម៉ោង ៩យប់ថ្ងៃទី១៥ រហូតដល់ម៉ោង ៥ព្រឹក ថ្ងៃទី១៦ ខែកុម្ភៈ ទាហានថៃ បានបាញ់មកកម្ពុជា ដោយប្រើប្រាស់កាំភ្លើងធុន ៨១មិល្លីម៉ែត្រ និងកាំភ្លើងយន្ត។
សេចក្ដីថ្លែងការណ៍បន្ថែមថា ការបោកគ្រាប់បែកដៃដោយទាហានថៃ បានបណ្ដាលឲ្យទាហានខ្លួនរងរបួសទៅវិញ។ កម្ពុជាក៏បានចោទប្រកាន់ថៃ ថា មិនគោរពបទឈប់បាញ់គ្នា ដែលបានស្នើដោយក្រុមប្រឹក្សាសន្តិសុខអង្គការសហប្រជាជាតិ។
ក្នុងបទសម្ភាសន៍ជាមួយអ្នកយកព័ត៌មានវិទ្យុអាស៊ីសេរី កងទ័ពខ្មែរម្នាក់បានឲ្យដឹងដូច្នេះ ៖
យន់ សាមៀន ៖ កាសែតថៃថា ភាគីកម្ពុជា បានទៅកាត់បន្លាលួសចូលទៅតំបន់ថៃ? ទាហានខ្មែរ ៖ មិនមានទេ នេះជាការបង្ខូចមួលបង្កាច់ទេ យើងទៅធ្វើអីអ៊ីចឹងៗ។ បន់ឲ្យតែគេស្ងាត់ស្ងៀម ត្រូវគ្នាទៅស្រួលចុះរកស៊ីអី។
យន់ សាមៀន ៖ តើភាគីថៃអ្នកបាញ់ ឬខ្មែរអ្នកបាញ់? ទាហានខ្មែរ ៖ ថៃបាញ់គ្នាវា កាំភ្លើង ៧៥មិល្លីម៉ែត្រ និងគ្រាប់បែកវាបោកមួយចំនួន។ វាថា ខ្មែរយើងបាញ់វា តាមពិតវាបាញ់គ្នាវា។ វាបោកគ្រាប់បែក តែយើងមិនតទេ។ សភាពការណ៍ទូទៅមានលក្ខណៈធូរស្រាលហើយ។
រដ្ឋមន្ត្រីការបរទេសកម្ពុជា និងថៃ កាលពីថ្ងៃទី១៤ ខែកុម្ភៈ ក្រោយពីកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិ បានប្រកាសជ័យជម្នះរៀងៗខ្លួន ក្រោយពេលក្រុមប្រឹក្សាស្នើឲ្យភាគីទាំងសងខាងបន្តការចរចាគ្នាតាមយន្តការអាស៊ាន បន្ថែមទៀត។
រដ្ឋមន្ត្រីការបរទេសឥណ្ឌូណេស៊ី និងជាប្រធានអាស៊ានប្រចាំឆ្នាំ នឹងបើកកិច្ចប្រជុំបន្ទាន់មួយនៅថ្ងៃទី២២ ខែកុម្ភៈ ខាងមុននេះ ដើម្បីកំណត់បទឈប់បាញ់ជាអចិន្ត្រៃយ៍មួយ និងគូសវាសផែនទីដំណោះស្រាយជម្លោះព្រំដែនតាមលក្ខណៈការទូត និងសន្តិវិធី៕