សកម្មភាពភ្ជួររាល់ដោយម៉ាស៊ីនគោយន្ត និងត្រាក់ទ័ររបស់វៀតណាមចំនួនជាង ១០គ្រឿង កំពុងតែបន្តតាំងពីខែវិច្ឆិកា ឆ្នាំ២០១០ រហូតមកដល់ពេលនេះ គឺនៅក្នុងភូមិសាស្ត្រនៃភូមិធ្លោក ឃុំច្រកម្ទេស ក្រុងបាវិត ខេត្តស្វាយរៀង នៅក្បែរព្រែកបូរាណមួយ ជាប់និងព្រំដែនកម្ពុជា-វៀតណាម ដែលខណ្ឌចែករវាងឃុំច្រកម្ទេស និងឃុំមនោរម្យ នៅក្នុងទឹកដីកម្ពុជា។
កសិករម្នាក់នៅក្នុងចំណោមគ្រួសារកសិករខ្មែរជាច្រើនរយគ្រួសារ រស់នៅភូមិធ្លោក ឃុំច្រកម្ទេស ក្រុងបាវិត ខេត្តស្វាយរៀង ជាប់និងកន្លែងដីស្រែកំពុងតែភ្ជួររាស់នោះ បានថ្លែងប្រាប់វិទ្យុអាស៊ីសេរី សុំមិនឲ្យប្រាប់ឈ្មោះក្នុងការផ្សាយថា ពួកគាត់ព្រួយបារម្ភថា ដីស្រែកសិកម្មនៅទីនោះនឹងបាត់បង់នៅថ្ងៃណាមួយមិនខាន ៖ "ព្រែកហ្នឹង គឺជាព្រែកប្រជាពលរដ្ឋ រាល់ឆ្នាំលែងក្របី គោ ផឹកទឹក ឥឡូវហ្នឹងដាំអស់ មានកន្លែងណាឲ្យទឹកគោ ក្របី។ ភ្ជួរផ្ដាច់ផ្លូវរទេះ កន្លែងដែលប្រជាពលរដ្ឋគាត់បរដឹកអូស ដឹកព្រៃ ឥឡូវគេភ្ជួរដាច់អស់។ ឥឡូវប្រជាពលរដ្ឋគាត់បរកាត់តាមណាទេ។ ទីមួយគឺផ្លូវហ្នឹងឯង"។
កសិករម្នាក់ទៀតបានថ្លែងថា លោកមានដីស្រែចំនួន ៥ហិកតារ នៅក្បែរនោះដែរ ប៉ុន្តែគេមិនឲ្យប៉ះឆ្លងកាត់តាមរយៈផ្លូវរទេះពីបូរាណទេ ៖ "គេវាស់វែង ខ្ញុំនៅឈរនៅកន្លែងហ្នឹងដែរ។ ហើយដីខ្ញុំនៅចំណុចកន្លែងហ្នឹងដែរ។ ខ្ញុំមិនបរទៅណា។ បរទៅប៉ះគេ គេប្ដឹងខ្ញុំឥឡូវ"។
កសិករខ្មែរជាច្រើនរយគ្រួសារនៅទីនោះមិនហ៊ានងើបតវ៉ាទេ ដោយសារភ័យខ្លាចនិងការគំរាមរបស់មេភូមិថានិងប្ដឹង ឬចាប់ខ្លួន បើសិនណាប្រជាពលរដ្ឋហ៊ានតវ៉ា។
មេភូមិធ្លោក ឃុំច្រកម្ទេស ក្រុងបាវិត ខេត្តស្វាយរៀង លោក គង់ រ៉ុន បានបំភ្លឺថា ប្រជាពលរដ្ឋបានលក់ដីស្រែឲ្យទៅក្រុមនៅមូលដ្ឋានមួយ។ ហើយក្រុមហ៊ុននេះបានជួលដីស្រែទាំងនោះ ជួលឲ្យទៅគ្រួសារវៀតណាមដាំដំឡូងមីតាមរយៈកិច្ចសន្យានៅរៀងរាល់ ៦ខែម្ដង។ ការធ្វើនេះ បានដឹងឮដោយអាជ្ញាធរមូលដ្ឋានប៉ុណ្ណោះ។ លោកបន្តថា ៖ "គេធ្វើក្រុមហ៊ុនជាមួយវៀតណាមមែន ប៉ុន្តែយើងនៅហ្នឹង យើងអត់មានទីផ្សារលក់ គេធ្វើ និងដាំជាមួយនិងវៀតណាម គេដឹកទៅវៀតណាម ប៉ុន្តែយើងធ្វើក្រុមហ៊ុនជាមួយគេទេ យើងមិនបានជួលឲ្យគេទេ។ គេគិតតាមមួយរដូវៗ ហ្នឹង ៦ខែ។ យើងធ្វើកិច្ចសន្យាមួយរដូវ យើងគិតមួយរដូវ"។
ប្រតិកម្មទៅនិងការជួលដីស្រែកសិកម្មនេះ ប្រធានគណៈកម្មការកិច្ចការងារព្រំដែនកម្ពុជា លោក វ៉ា គឹមហុង បានមានប្រសាសន៍ថា លោកសុំឲ្យអាជ្ញាធរមូលដ្ឋាន និងក្រុមហ៊ុនបញ្ឈប់កិច្ចសន្យានេះជាបន្ទាន់ បើគ្មានការយល់ព្រមពីគណៈកម្មការព្រំដែនជាមុន ៖ "សូមឲ្យអាជ្ញាធរដែនដី ដែលជាប់ព្រំដែនទាំងអស់ ហាមឃាត់មិនឲ្យជួល មិនឲ្យធ្វើអ្វីទាំងអស់។ មិនអនុញ្ញាតឲ្យធ្វើទេ។ កាលណាធ្វើហ្នឹង គឺត្រូវតែមានការទទួលខុសត្រូវដោយអាជ្ញាធរខេត្ត និងអាជ្ញាធរដែនដី ដែលធ្វើផ្ដេសផ្ដាសចឹង គឺថាយើងហាមឃាត់"។
អ្នកច្បាប់ និងជាមេធាវី លោក ជូង ជូងី បានមានប្រសាសន៍ថា លោកមានការព្រួយបារម្ភនៅថ្ងៃអនាគត ៖ "តាមច្បាប់ភូមិបាល មានតែប្រជាពលរដ្ឋខ្មែរ ដែលមានសញ្ជាតជាខ្មែរទេ ទើបអាចមានសិទ្ធិជាម្ចាស់កម្មសិទ្ធិលើដីធ្លី។ អ៊ីចឹងចំពោះជនជាតិបរទេស គឺអត់អាចមានសិទ្ធិធ្វើកម្មសិទ្ធិដីធ្លីបានទេ ប៉ុន្តែដល់ពេលរឿងពាក់ព័ន្ធ ជួលឲ្យបរទេស ច្បាប់អត់និយាយដល់កម្រិតហ្នឹង"។
លោក វ៉ា គឹមហុង បានបញ្ជាក់ថា គោលនយោបាយរបស់រដ្ឋាភិបាលមិនអនុញ្ញាតឲ្យជួលដីធ្លីនៅជាប់ព្រំដែនឲ្យទៅប្រទេសជិតជាងណាមួយទេ។ លោកសន្យាថានឹងពិនិត្យមើលរឿងនេះ៕