ប្រភពព័ត៌មានពីកងយោធាខ្មែរដែលកំពុងប្រចាំការនៅតាមខ្សែបន្ទាត់ព្រំដែន នៅតំបន់អូរស្មាច់ ខេត្តឧត្តរមានជ័យ បានអះអាងថា គេបានប៉ះប្រយុទ្ធគ្នាចំនួន ២លើករយៈពេលខ្លី ជាមួយកងទាហានថៃនៃខេត្តសុរិន្ទ បន្ទាប់ពីកងទាហានថៃមួយក្រុមបានព្យាយាមបណ្ដេញឲ្យកងការពារព្រំដែនខ្មែរ ដែលកំពុងប្រចាំការនៅតំបន់បង្គោលឡាក់លេខ១៤ រុះរើខ្ទមចាកចេញមិនបានសម្រេច។
កងទាហានវរការពារព្រំដែនខ្មែរលេខ៤០២ មួយរូប ដែលមិនបញ្ចេញឈ្មោះ ប្រចាំនៅចំណុចព្រំដែនក្បែរកន្លែងប៉ះទង្គិចគ្នានោះ បានមានប្រសាសន៍កាលពីវេលាម៉ោង ១២ថ្ងៃត្រង់ ថ្ងៃសៅរ៍ ថា ការប៉ះទង្គិចគ្នារវាងទាហានខ្មែរ-ថៃបានកើតឡើងចំនួន ២លើកនៅក្បែរជើងភ្នំតាថង នៃបង្គោលព្រំដែនលេខ១៤ ភាគខាងកើតពីច្រកព្រំដែនអូរស្មាច់ ដោយទាហានទាំងសងខាងបានបាញ់អាវុធធុន M79, B40 និងកាំភ្លើងដៃតគ្នា លើកទីមួយរយៈពេលប្រហែល ១៥នាទី និងលើកទី២ ប្រហែល ៥នាទី។
ទាហានដដែលបានបញ្ជាក់ថា ៖ «វាឈរជើងនៅនឹងអាងចម្រាក់ភ្នំតាថងខាងឆ្វេង ហើយយើងឈរម្ខាង ភ្នំយើងតើ! នៅក្នុងបង្គោលឡាក់លេខ១៤។ ចំណុចកន្លែងយើងឈរជើងធ្វើផ្ទះនៅ វាឲ្យយើងរុះរើ ដល់យើងរុះរើម៉េច! ធ្វើនៅដីយើងតើ! បាញ់ ២ដងព្រឹកមិញ ពីម៉ោង ៧:៤៥នាទីម្ដង ម៉ោង ៩:៤៥នាទីម្ដងទៀត ពីរដង។ វាចូលមកបាញ់យើងមុន។ វាបាញ់ផ្លោងហើយបានទ័ពថ្មើរជើងវាចុះមក»។
ទោះយ៉ាងណាការប៉ះទង្គិចគ្នាដោយអាវុធនោះ ទាហានខ្មែរអះអាងថា ពុំមានអ្នករងរបួសឬក៏ស្លាប់ទេ។
មេបញ្ជាការវរការពារព្រំដែនខ្មែរលេខ៤០២ ប្រចាំតំបន់អូរស្មាច់ លោក តុន ញាណ បានបដិសេធមិនអធិប្បាយជុំវិញព្រឹត្តិការណ៍ប៉ះទង្គិចគ្នានោះយ៉ាងណាទេ។
ចំណែកអគ្គបញ្ជាការរងនៃកងយោធពលខេមរភូមិន្ទប្រចាំទិសយោធភូមិភាគទី៤ លោកឧត្ដមសេនីយ៍ឯក ជា តារា បានមានប្រសាសន៍កាលពីព្រឹកថ្ងៃសៅរ៍ថា ការប៉ះទង្គិចគ្នានោះគឺបានបង្កឡើងដោយទាហានថៃ ដែលនៅចម្ងាយ ២០០ម៉ែត្រក្នុងព្រំដែនរបស់គេ បានបាញ់រះមកលើទាហានខ្មែរមុន ប៉ុន្តែលោកមិនបានដឹងពីមូលហេតុច្បាស់លាស់នៅឡើយ។
លោកឧត្ដមសេនីយ៍ឯក ជា តារា បានអះអាងថា ៖ «ព្រឹកមិញនេះនៅខាងកើតអូរស្មាច់ ភាគីថៃហ្នឹងគាត់មិនដឹងយ៉ាងម៉េច ប្រហែលជាស្រវឹងពីក្បាលល្ងាចក៏មិនដឹង បាញ់ ២០០ម៉ែត្រពីកម្លាំងយើង។ អត់មានរបួសអត់មានអីទេ! ព្រឹត្តិការណ៍ព្រឹកមិញហ្នឹងមិនមានអីទេ ដោះស្រាយចប់ហើយ! ឥឡូវហ្នឹងមេវរ និងមេវរបានជួបគ្នារួចហើយ»។
ទីភ្នាក់ងារព័ត៌មានបារាំង AFP បានដកស្រង់យកសំដីមេបញ្ជាការយោធាថៃមួយរូបដែលមិនបញ្ចេញឈ្មោះ បានទទួលស្គាល់ថា ទាហានរបស់គេពិតជាមានការប៉ះទង្គិចជាមួយកងការពារព្រំដែនខ្មែរមែន ដោយការប៉ះទង្គិចគ្នាតាមព្រំដែននោះ គឺជាការយល់ច្រឡំនឹងគ្នា។ មន្ត្រីយោធាថៃ បានអះអាងទៀតថា គ្មានទាហានរបស់គេរងរបួស ឬស្លាប់ក្នុងព្រឹត្តិការណ៍នោះទេ។
ការប្រឈមមុខដាក់គ្នារវាងទាហានខ្មែរ និងថៃនៅតាមតំបន់ព្រំដែនខ្លះ បានកើតមានឡើងចាប់តាំងពីថៃបានលើកកងទ័ពរាប់រយនាក់ចូលលុកលុយទីវត្តខ្មែរ កែវសិខាគិរីស្វរៈ ជាប់ប្រាសាទព្រះវិហារកាលពីថ្ងៃទី១៥ ខែកក្កដា ឆ្នាំ២០០៨រហូតមក៕