លោកស្រី ខារ៉ូល រ៉ដលី (Carol Rodley) ឯកអគ្គរដ្ឋទូតសហរដ្ឋអាមេរិកដែលបានអញ្ជើញចូលរួមជាអធិបតីក្នុងការប្រគំតន្ត្រីបាតដៃស្អាតស្អំ ក្រោមប្រធានបទរួមគ្នាប្រឆាំងអំពើពុករលួយ ដែលរៀបចំដោយអង្គការផេកកម្ពុជានិងសម្ព័ន្ធអង្គការសង្គមស៊ីវិលប្រឆាំងអំពើពុករលួយនៅពហុកីឡដ្ឋានជាតិ អូឡាំពិកនៅថ្ងៃសៅរ៍ ទី៣០ ខែឧសភា ឆ្នាំ២០០៩ បានធ្វើការប្រៀបធៀបនូវសាច់ប្រាក់ដែលបាត់បង់តាមរយៈអំពើពុករលួយ។
លោកស្រី ខារ៉ូល រ៉ដលី បានមានប្រសាសន៍តាមរយៈអ្នកបកប្រែថា ៖ «ដោយផ្អែកទៅលើការសិក្សាជាច្រើនបានបង្ហាញថា អំពើពុករលួយបានធ្វើឲ្យកម្ពុជាបាត់បង់ចំណូលជាតិដល់ទៅ៥០០លានដុល្លារក្នុងមួយឆ្នាំៗ ដែលចំណូលនេះអាចជួយដល់ការចំណាយផ្សេងៗទៅលើសេវាអប់រំសាធារណៈ សេវាថែទាំសុខភាពនិងការងារសម្រាប់ប្រជាជនកម្ពុជា។ ថវិកា៥០០លានដុល្លារគឺមានតម្លៃស្មើនឹងការសាងសង់អគារដែលមានបន្ទប់ចំនួន២ម៉ឺនឬមានលទ្ធភាពផ្ដល់ប្រាក់បៀវត្សរ៍ដល់មន្ត្រីរាជការកម្ពុជាបន្ថែមចំនួន២៦០ដុល្លារក្នុងមួយខែ»។
លោកស្រី ខារ៉ូល ក៏បានសម្ដែងផងដែរនូវសេចក្ដីរំពឹងថា រដ្ឋាភិបាលកម្ពុជានឹងអនុម័តច្បាប់ប្រឆាំងអំពីពុករលួយនៅក្នុងឆ្នាំ២០០៩នេះ។
លោកស្រី ខារ៉ូល រ៉ដលី បានមានប្រសាសន៍តាមរយៈអ្នកបកប្រែថា ៖ «សូមជំរុញឲ្យរាជរដ្ឋាភិបាលកម្ពុជាគោរពនូវការសន្យារបស់ខ្លួននិងការអនុម័តនៃច្បាប់ប្រឆាំងនឹងអំពើពុករលួយ។ នៅក្នុងអំឡុងពេលនៃការបោះឆ្នោតកាលពីឆ្នាំ២០០៨គ្រប់គណបក្សនយោបាយទាំងអស់បានសន្យាក្នុងការអនុម័តច្បាប់នេះ។ ឥឡូវនេះដល់ពេលដែលច្បាប់នេះត្រូវអនុវត្តហើយ»។
សូមជម្រាបជូនផងដែរថា ការប្រគំតន្ត្រីបាតដៃស្អាតស្អំមានការចូលរួមសម្ដែងពីសំណាក់អ្នកចម្រៀងនិងសិល្បករ សិល្បការិនីល្បីៗប្រចាំកម្ពុជា រួមទាំងក្រុមកំប្លែងរបស់នាយកុយផងដែរ។
ក្រៅពីការប្រគំតន្ត្រីក៏មានការបញ្ចាំងកាំរស្មីរូបភាពបាតដៃស្អាតស្អំដែលធ្វើឲ្យអ្នកទស្សនាមានការជក់ចិត្ត ក្នុងនោះអ្នកទស្សនាភាគច្រើនបានប្រើប្រាស់ម៉ាស៊ីនថតរូប ម៉ាស៊ីនថតវីដេអូនិងទូរស័ព្ទដៃរបស់ពួកគេថតយកនូវទស្សនីយភាពទាំងនោះទៀតផង។
មន្ត្រីជាន់ខ្ពស់នៃកម្មវិធីបញ្ជ្រាបការប្រឆាំងអំពើពុករលួយដើម្បីសមធម៌នៃអង្គការផេកកម្ពុជា លោកស្រី ហួត រតនៈ បានមានប្រសាសន៍ថា ការប្រគំតន្ត្រីបាតដៃស្អាតស្អំលើកទី១នេះបានប្រកបដោយជោគជ័យលើសពីការរំពឹងទុក។
លោកស្រី ហួត រតនៈ បានបញ្ជាក់ថា ៖ «យើងមានទស្សនិកជនរាប់ម៉ឺននាក់បានចូលរួមទស្សនាការប្រគំតន្ត្រីរបស់យើង»។
ការប្រគំតន្ត្រីបាតដៃស្អាតស្អំបានបញ្ចប់ទៅក្រោមសំនៀងបទពង្សាវតារខ្មែរដែលច្រៀងរួមគ្នាដោយសិល្បករ សិល្បការិនីទាំងអស់៕