គណៈកម្មាធិការដើម្បីការបោះឆ្នោត ដោយសេរី និងយុត្តិធម៌នៅកម្ពុជា ខុមហ្វ្រែល (Comfrel) នៅថ្ងៃទី១ ខែមិថុនា បានបង្ហាញរបាយការណ៍ឲ្យដឹងថា នៅក្នុងអំឡុងពេលឃោសនាបោះឆ្នោតរើសសមាជិកក្រុមប្រឹក្សា ឃុំ-សង្កាត់ ឆ្នាំ២០១២ នេះ មានឃាតកម្មសម្លាប់មនុស្សចំនួន ៣ករណី ទៅលើសកម្មជន គណបក្ស សម រង្ស៊ី គណបក្សសិទ្ធិមនុស្ស និងគណបក្ស នរោត្តម រណឫទ្ធិ។
ទោះមិនទាន់មានការសន្និដ្ឋានថា ករណីឃាតកម្មទាំង ៣ ពាក់ព័ន្ធទៅនឹងឃាតកម្មនយោបាយ ឬយ៉ាងណាក៏ដោយនោះ ក៏ប៉ុន្តែករណីឃាតកម្មនេះបានកើតទៅលើសកម្មជនគណបក្សនយោបាយ ក្នុងដំណាក់កាលនៃដំណើរការបោះឆ្នោតច្រើនខុសពីធម្មតា។
ទោះយ៉ាងណា ខុមហ្វ្រែល សង្កេតឃើញថា រយៈពេល ១៥ថ្ងៃ នៃយុទ្ធនាការឃោសនាបោះឆ្នោតជ្រើសរើសសមាជិកក្រុមប្រឹក្សា ឃុំ-សង្កាត់ អាណត្តិទី៣ មានដំណើរការប្រសើរជាងឆ្នាំ២០០៧។ ព្រោះពុំឃើញមានបង្កឧបសគ្គ និងហិង្សាធ្ងន់ធ្ងរទៅលើសកម្មភាពគណបក្សនយោបាយតាមមូលដ្ឋាននោះទេ។
របាយការណ៍ ខុមហ្វ្រែល ចេញផ្សាយព្រឹកថ្ងៃសុក្រ ទី១ ខែមិថុនា ឆ្នាំ២០១២ បានឲ្យដឹងទៀតថា យុទ្ធនាការឃោសនាបោះឆ្នោត ឃុំ-សង្កាត់ ឆ្នាំ២០០២ មានទំនាស់កើតឡើងចំនួន ១០ករណី ក្នុង១ថ្ងៃ។ ការបោះឆ្នោតឆ្នាំ២០០៧ កើតមាន ៨ករណី ក្នុង១ថ្ងៃ និងឆ្នាំ២០១២ កើតមាន ៦ករណី ក្នុង១ថ្ងៃ។
លោក ធន សារ៉ាយ ប្រធានគណៈកម្មាធិការនាយក និងជាប្រធានសមាគម អាដហុក មានប្រសាសន៍ក្នុងសន្និសីទកាសែត នាទីស្នាក់ការអង្គការ ខុមហ្វ្រែល ថា ភាពមិនប្រក្រតីកើតមានក្នុងអំឡុងពេលយុទ្ធនាការឃោសនាបោះឆ្នោត ឃុំ-សង្កាត់ អាណត្តិទី៣ មានដូចជា ករណីហែកខិត្តប័ណ្ណ ការទិញទឹកចិត្តអ្នកបោះឆ្នោត ការរំខានក្នុងពេលឃោសនា ការទម្លាក់ស្លាកគណបក្ស សរុបប្រមាណជិត ១០០ករណី។
ទំនាស់ភាគច្រើន បង្កដោយសកម្មជនគណបក្សប្រជាជនកម្ពុជា ហើយគណបក្សដែលរងគ្រោះ ភាគច្រើនមកពីគណបក្ស សម រង្ស៊ី និងគណបក្សសិទ្ធិមនុស្ស។
ទោះជាបែបណាក្តី លោក គល់ បញ្ញា នាយកប្រតិបត្តិអង្គការ ខុមហ្វ្រែល បានឲ្យដឹងថា ការបោះឆ្នោត ឃុំ-សង្កាត់ អាណត្តិទី៣នេះ មានប្រជាពលរដ្ឋប្រមាណ ១លាន ៥សែននាក់ បាត់ឈ្មោះពីក្នុងបញ្ជីបោះឆ្នោត និងមិនអាចបោះឆ្នោតបាន។ បន្ថែមលើនេះ លោកព្រួយបារម្ភថា នៅថ្ងៃបោះឆ្នោត អាចមានពលរដ្ឋច្រើននាក់ទៀត រកឈ្មោះមិនឃើញក្នុងបញ្ជី ឬតាមការិយាល័យបោះឆ្នោត។
ស្រដៀងគ្នាដែរ លោក បណ្ឌិត ហង្ស ពុទ្ធា នាយកប្រតិបត្តិអង្គការ និចហ្វិក បានហៅសកម្មភាពរបស់គណបក្សនយោបាយ ដែលធ្វើសកម្មភាពក្នុងពេលឃោសនាបោះឆ្នោត ឃុំ-សង្កាត់ អាណត្តិទី៣ មានភាពចាស់ទុំច្រើនជាង អាណត្តិកន្លងទៅ។
លោក ទេព នីថា អគ្គលេខាធិការ គ.ជ.ប ក៏បានឲ្យដឹងថា អំពើហិង្សា ឬទំនាស់ផ្សេងៗដែលកើតមានក្នុងពេលយុទ្ធនាការឃោសនារបស់គណបក្សនយោបាយចូលរួមបោះឆ្នោត ឃុំ-សង្កាត់ អាណត្តិទី៣ មានដំណើរការល្អជាងអាណត្តិទី២ ឆ្នាំ២០០៧។ លោកបានអំពាវនាវឲ្យប្រជាពលរដ្ឋមានសិទ្ធិបោះឆ្នោត ចូលរួមបោះឆ្នោតឲ្យបានគ្រប់គ្នា នៅថ្ងៃអាទិត្យ ទី៣ ខែមិថុនា ខាងមុខ។
លោកមេធាវី សុក សំអឿន ជានាយកក្រុមអ្នកច្បាប់ការពារសិទ្ធិកម្ពុជា បានថ្លែងថា ភាពមិនប្រក្រតីកើតមានក្នុងអំឡុងពេលយុទ្ធនាការឃោសនាបោះឆ្នោត ឃុំ-សង្កាត់ អាណត្តិទី៣នេះ ស្ថាប័ន គ.ជ.ប ច្រើនធ្វើការសម្របសម្រួលច្រើនជាងយកច្បាប់មកអនុវត្ត។ លោកព្រួយបារម្ភថា ការសម្របសម្រួលនេះ អាចនាំឲ្យមានបញ្ហាធ្ងន់ធ្ងរនៅអាណត្តិបោះឆ្នោតខាងមុខ។
កាលបរិច្ឆេទ នៃការបោះឆ្នោតជ្រើសរើសសមាជិកក្រុមប្រឹក្សា ឃុំ-សង្កាត់ អាណត្តិទី៣ នឹងប្រព្រឹត្តទៅនៅថ្ងៃអាទិត្យ ទី៣ ខែមិថុនា ឆ្នាំ២០១២។ ការបោះឆ្នោតនេះមានគណបក្សនយោបាយចូលរួមចំនួន ១០គណបក្ស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។