ក្រៅពីមានការមិនស៊ើបអង្កេត និងចាត់ការ ក៏មានការចោទប្រកាន់ថា មានលេចចេញឯកសារផ្លូវការរបស់តុលាការ ប៉ះពាល់ដល់កិច្ចដំណើរការរបស់តុលាការទៀតផង។
ការតវ៉ាគ្នានេះ បានធ្វើឲ្យអង្គការឃ្លាំមើលការកាត់ទោសនៅសាលាក្ដីខ្មែរក្រហមមួយចំនួន អំពាវនាវឲ្យចៅក្រមនៅសាលាក្ដី ធ្វើការឲ្យបានត្រឹមត្រូវ និងផ្ដល់យុត្តិធម៌ពិតប្រាកដដល់អ្នករងគ្រោះ ដោយសាររបបខ្មែរក្រហម។
អង្គការលើកលែងទោសអន្តរជាតិ ឬហៅថា អាមណេស្ទី អ៊ិនធើណាហ្សូណល (Amnesty International) បានអះអាងថា សាលាក្ដីខ្មែរក្រហមកំពុងបំភ្លេចចោលការស៊ើបអង្កេតស្វែងរកជនជាប់ចោទបន្ថែមក្នុងករណីលេខ ០០៣ ខណៈដែលមានសេចក្ដីរាយការណ៍ និងសង្ស័យថា ដំណើរការសាលាក្ដីនេះកន្លងទៅធ្វើការមិនមានតម្លាភាព និងក្រោមសម្ពាធនយោបាយ ដែលនាំឲ្យប៉ះពាល់ដល់ឯករាជភាពនៃការកាត់ក្ដី។
ក្នុងសេចក្ដីថ្លែងការណ៍មួយចុះផ្សាយលើគេហទំព័ររបស់ខ្លួននៅថ្ងៃទី ៨ ខែមិថុនា ឆ្នាំ ២០១១ អង្គការលើកលែងទោសអន្តរជាតិ បានប្រើពាក្យថា អង្គការនេះ «ព្រួយបារម្ភជាទីបំផុត» ចំពោះបញ្ហាខកខានទាំងនោះ ដែលជាហេតុធ្វើឲ្យមានហានិភ័យក្នុងបេសកកម្មស្នូលរបស់សាលាក្ដីខ្មែរក្រហមក្នុងការផ្ដល់យុត្តិធម៌ដល់ជនរងគ្រោះ ដែលគេសម្លាប់ និងធ្វើបាបក្នុងរបបខ្មែរក្រហម រួមទាំងប្រជាជនខ្មែរទាំងអស់។
សេចក្ដីថ្លែងការណ៍របស់អង្គការលើកលែងទោសអន្តរជាតិនេះ គឺធ្វើឡើងបន្ទាប់ពីសាលាក្ដីខ្មែរក្រហមប្រកាសបិទការស៊ើបអង្កេតសំណុំរឿងលេខ ០០៣ កាលពីថ្ងៃទី២៩ ខែមេសាឆ្នាំ២០១១។
អង្គការលើកលែងទោសអន្តរជាតិបានរិះគន់សហចៅក្រមស៊ើបអង្កេតសាលាក្ដីខ្មែរក្រហមថា មិន បានបំពេញតួនាទីទៅតាមនីតិវិធីច្បាប់ក្នុងកម្រិតនិយាមអន្តជាតិទេ ព្រោះចៅក្រមស៊ើបអង្កេត មិនបានអនុវត្ត ៥ចំណុចសំខាន់ៗ ដូចជា មិនបានកោះហៅ និងសួរចម្លើយជនសង្ស័យ ស៊ើបសួរជនសង្ស័យ ជនរងគ្រោះ និងសាក្សីជាដើម។ ចៅក្រមមិនបានរឹបអូសវត្ថុតាង មិនបានពិនិត្យទីតាំង មិនបានស្វែងរកមតិយោបល់ពីក្រុមអ្នកច្បាប់ រួមទាំងមិនបានស្រាវជ្រាវរកព័ត៌មានបន្ថែម និងជំនួយការពីភាគី ឬស្វែងរកជំនួយគាំទ្រពីអង្គការសហប្រជាជាតិ និងអង្គការក្រៅរដ្ឋាភិបាលណាមួយ ក្នុងដំណើរការស៊ើបអង្កេតករណី ០០៣ នេះទេ។
ទាក់ទងនឹងការចោទប្រកាន់នេះ មន្ត្រីសាលាក្ដីខ្មែរក្រហម បានពោលថា ការចោទប្រកាន់នេះ គឺជារឿងចាស់ច្រំដែល ដែលបានកើតឡើងជារឿយៗ កន្លងមក។
លោក ឌឹម សុវណ្ណារុំ មន្ត្រីទទួលបន្ទុកកិច្ចការសាធារណៈ នៃសាលាក្ដីខ្មែរក្រហម បានឆ្លើយតបទៅនឹងការចោទប្រកាន់របស់អង្គការលើកលែងទោសអន្តរជាតិនេះជាមួយនឹងការព្រមានថា ស្ថាប័ននេះ រួមទាំងមជ្ឈដ្ឋានខាងក្រៅដទៃទៀតផង មិនមានសិទ្ធិលូកលាន់កិច្ចការផ្ទៃក្នុងរបស់សាលាក្ដីខ្មែរក្រហមនេះទេ ហើយលោកបញ្ជាក់ថា ចៅក្រមស៊ើបអង្កេតរបស់សាលាក្ដីខ្មែរបានបំពេញតួនាទីស៊ើបអង្កេតរបស់ខ្លួន តាមនីតិវិធីច្បាប់បានត្រឹមត្រូវ គឺមិនដូចការចោទប្រកាន់នោះទេ ៖ «សម្រាប់ករណី ០០៣ សហចៅក្រមស៊ើបអង្កេតបានចេញសេចក្ដីប្រកាសច្បាស់ហើយថា សហចៅក្រមស៊ើបអង្កេតធ្វើការស៊ើបអង្កេតនៅលើកិច្ចការរបស់ខ្លួន ហើយការងាររបស់ខ្លួនដែលបានបំពេញហ្នឹង គឺដោយឯករាជ្យ ហើយចៅក្រមស៊ើបអង្កេតប្រឆាំងដាច់ខាតរាល់ការជ្រៀតជ្រែកពីខាងក្រៅ»។
ទោះជាសហចៅក្រមស៊ើបអង្កេតបិទការស៊ើបអង្កេតយ៉ាងនេះក្ដី លោក ឌឹម សុវណ្ណារុំ បញ្ជាក់ថា សាលាក្ដីបានទុកពេលឲ្យភាគីដែលពាក់ព័ន្ធ ដើម្បីតវ៉ា ក្នុងករណីយមិនសុខចិត្តលើចំណុចណាមួយចំពោះការស៊ើបអង្កេត នេះ ៖ «យើងបិទការស៊ើបសួរទៅគឺយើងទុកឲ្យភាគីដែលភាគីពាក់ព័ន្ធធ្វើការតវ៉ា។ សហព្រះរាជអាជ្ញាពិនិត្យមើលសំណុំរឿង ថាតើត្រូវមានការស្នើសុំស៊ើបសួរបន្ថែម ឬក៏អត់។ បើមានការស្នើសុំឲ្យស៊ើបសួរបន្ថែម។ សហចៅក្រមស៊ើបអង្កេតត្រូវពិចារណាថា តើខ្លួននឹងត្រូវបន្តការស៊ើបសួរបន្ថែម ឬយ៉ាងណា? ហ្នឹងតាមនីតិវិធីច្បាប់ណា៎»។
ស្របពេលនេះដែរ មានសេចក្ដីរាយការណ៍ថា លោកព្រះរាជអាជ្ញាអន្តរជាតិក្នុងសាលាក្ដីខ្មែរក្រហម លោក អេនឌ្រូវ ខេលៃ (Andrew Caylay) បានប្ដឹងឧទ្ធរណ៍តវ៉ាសុំឲ្យមានការស៊ើបអង្កេតបន្ថែមលើករណីលេខ ០០៣ នេះ ព្រោះការស៊ើបអង្កេតកន្លងមកមិនបាន។
បន្ទាប់មក កញ្ញា សេង ធារី ដែលជាភាគីដើមបណ្ដឹងរដ្ឋប្បវេណីក្នុងករណីលេខ ០០៣ មួយរូប បានចេញលិខិតថ្លែងអំណរគុណលោក អេនឌ្រូវ ខេលៃ ហើយបានសរសើរ និងថា លោកបានប្រឹងប្រែង ធ្វើការប្រកបទៅដោយវិជ្ជាជីវៈជាមន្ត្រីច្បាប់មួយរូប ដោយបានបង្ហើបឱ្យដឹងព័ត៌មានទាក់ទងនឹងករណីយលេខ ០០៣។
ស្របពេលនេះដែរ កញ្ញា សេង ធារី បានហៅសេចក្ដីអំពាវនាវរបស់អង្គការលើកលែងទោសអន្តរជាតិ ដែលរិះគន់ការស៊ើបអង្កេតរឿងក្ដី ០០៣ នេះថា ជាសំឡេងគាំទ្រ ជួយផ្ដល់យុត្តិធម៌ឲ្យភាគីបណ្ដឹងរដ្ឋប្បវេណីបន្ថែមទៀត ទៅលើព័ត៌មានស៊ើបអង្កេតជនសង្ស័យបន្ថែមក្នុងករណីយលេខ ០០៣ នេះ ៖ «ក្នុងការជជែក ក្នុងការស្រាវជ្រាវរបស់ខ្ញុំ ខ្ញុំដឹងថា លោក មាស មុត និងលោក ស៊ូ ម៉េត មានវត្តមានក្នុង ០០៣។ ហើយអ្វីដែលបានកើតឡើងក្នុងរយៈពេលថ្មីៗ នេះ អ្វីដែលឯកសារតុលាការ ដែលមានភាពសម្ងាត់ ដែលបានទទួលដោយអ្នកកាសែត ហ្នឹងគឺត្រឹមត្រូវមែន។ បើអ៊ីចឹងការអំពាវរបស់ (Amnesty International) ខ្ញុំសុំកោតសរសើរ ហើយខ្ញុំស្របនូវអ្វីដែលគាត់បានអំពាវនាវ ពីព្រោះវាស្របនឹងអ្វីដែលយើងកំពុងអំពាវនាវដែរ»។
អង្គការលើកលែងទោសអន្តរជាតិ ដែលមានការិយាល័យនៅទី ក្រុងឡុងដុង (London) ប្រទេសអង់គ្លេស (England) បានអំពាវនាវឲ្យសាលាក្ដីខ្មែរក្រហមគោរពច្បាប់ និងគោលការណ៍ ហើយអនុវត្តការងារមានតម្លាភាព និងបើកចំហ។ ជាពិសេស ចំពោះជនរងគ្រោះ ដើម្បីតាមដានព័ត៌មានស៊ើបអង្កេត និងការកាត់ទោស ហើយត្រូវទាត់ចោលរាល់អន្តរាគមន៍ណា ដែលមិនមានលក្ខណៈសមរម្យ និងមិនយុត្តិធម៌។
មន្ត្រីសាលាក្ដីបានបញ្ចប់ការស៊ើបអង្កេតករណីលេខ ០០២ ហើយ។ ជនជាប់ចោទក្នុងករណីលេខ ០០២ មានអតីតមេដឹកនាំខ្មែរក្រហមជាន់ខ្ពស់ ៤ រូប គឺ នួន ជា ដែលជាបងធំទី ២ នៃបក្សកុម្មុយនិស្តកម្ពុជា និងជាប្រធានសភានៃរបបកម្ពុជាប្រជាធិបតេយ្យ, ខៀវ សំផន ប្រធានគណៈប្រធានរដ្ឋ, អៀង សារី ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស និង អៀង ធីរិទ្ធិ ប្រធានក្រសួងសង្គមកិច្ច ក្នុងការទទួលខុសត្រូវចំពោះជីវិតមនុស្សជិត ២លាននាក់ ដែលបានស្លាប់ក្នុងរបបខ្មែរក្រហមកាន់អំណាចពីឆ្នាំ ១៩៧៥ ដល់ឆ្នាំ ១៩៧៩។
អតីតមេដឹកនាំខ្មែរក្រហមជាន់ខ្ពស់ ៤ រូប ជាប់ចោទពីបទឧក្រិដ្ឋកម្មប្រល័យពូជសាសន៍ ឧក្រិដ្ឋកម្មសង្គ្រាម ឧក្រិដ្ឋកម្មប្រឆាំងមនុស្សជាតិ។ សាលាក្ដីខ្មែរក្រហម គ្រោងបើកសវនាការកាត់ទោសជនជាប់ចោទទាំង ៤ នៅថ្ងៃទី ២៧ មិថុនា ឆ្នាំ ២០១១។
ទាក់ទងនឹងការកាត់ក្ដីអតីតមេដឹកនាំជាន់ខ្ពស់ នៅក្នុងសំណុំរឿងលេខ ០០៣ និង០០៤ នេះដែរ ភាគីរដ្ឋាភិបាលកម្ពុជា ដែលកន្លងមកបានព្រមព្រៀងបង្កើតតុលាការកូនកាត់ខ្មែរក្រហម ដែលមានសហចៅក្រម និងព្រះរាជអាជ្ញាបរទេសចូលរួមដំណើរការក្ដីនេះ បានជំទាស់ថា ការចោទប្រកាន់ជនសង្ស័យបន្ថែមទៀត អាចធ្វើឲ្យប្រទេសកម្ពុជាផ្ទុះសង្គ្រាមជាថ្មីម្ដងទៀត ខណៈដែលភាគីអង្គការសហប្រជាជាតិជំរុញឲ្យមានកោះហៅសាក្សីបន្ថែម។
អ្នកវិភាគក្នុងស្រុកមួយចំនួនបានប្រមើលថា ដំណើរការក្ដី ០០៣ និង០០៤ ពិតជាមិនអាចទៅរួចតាមផែនការកំណត់ទេ ដោយគេរំពឹងថា ឯករាជភាពរបស់មន្ត្រីតុលាការ នឹងមិនអាចធន់នឹងគំនាបខាងបញ្ហានយោបាយ រួមទាំងការរអាក់រអួលខាងវិបត្តិជំនួយហិរញ្ញវត្ថុរាប់លានដុល្លារក្នុងមួយឆ្នាំៗ ជាចំនួនទឹកប្រាក់មួយច្រើនសន្ធឹក ដែលសាលាក្ដីកូនកាត់មួយនេះ កំពុងប្រឈមមុខស្រាប់ផង៕