ការបញ្ចប់ការតវ៉ា និងការទាមទាររបស់កម្មករក្រុមហ៊ុន ឌូសុង បានកើតមានបន្ទាប់ពីមានកិច្ចប្រជុំដោះស្រាយបញ្ហាជាប់ៗគ្នារយៈពេលពីរថ្ងៃ រវាងតំណាងក្រុមហ៊ុន តំណាងកម្មករ និងតំណាងសហជីពកម្មករសំណង់ និងព្រៃឈើកម្ពុជា រហូតមកដល់រសៀលថ្ងៃទី២ ខែកញ្ញា ឆ្នាំ២០១០។
ប្រធានសហជីពកម្មករសំណង់ និងព្រៃឈើកម្ពុជា លោក សុខ សុវណ្ណដេត បានថ្លែងបន្ទាប់ពីកិច្ចប្រជុំថា ភាគីខាងក្រុមហ៊ុនបានយល់ព្រមលើចំណុចភាគច្រើន តាមការទាមទាររបស់កម្មករហើយ ហើយទន្ទឹមគ្នានេះដែរ លោកបញ្ជាក់បន្ថែមថា ៖ «អ្វីដែលបងប្អូនទាមទារ គាត់បានឯកភាព។ ប៉ុន្តែអ្វីដែលយើងទាមទារហើយ ចំណុចចុងក្រោយបំផុតគឺក្រុមហ៊ុនផ្អាកការងារសិន។ ចំណុចនេះគាត់លើកឡើងថា គាត់នឹងពិភាក្សាជាមួយក្រុមហ៊ុនខាងលើ ដោយសារតែយើងធ្វើកូដកម្មនេះប៉ះពាល់ទៅលើក្រុមហ៊ុនធំ។ អ៊ីចឹងក្រុមហ៊ុនធំ គេអត់ចង់ឱ្យបងប្អូនមានបញ្ហាអ៊ីចឹងទេ»។
លោក សុខ សុវណ្ណដេត បន្តថា ចាប់តាំងពីថ្ងៃទី១ ខែកញ្ញា កម្មករសំណង់របស់ក្រុមហ៊ុនម៉ៅការសំណង់ ឌូសុង បានទាមទារកែសម្រួលលក្ខខណ្ឌការងារចំនួន ២៤ចំណុច ដែលក្នុងចំណុចទាំងនោះ មានជាអាទិ ការដំឡើងប្រាក់ឈ្នួលពីបីដុល្លារកន្លះ ទៅបួនដុល្លារសម្រាប់កម្មករធម្មតា ហើយគុណប្រាក់ឈ្នួលនឹងពីរពេលធ្វើការនៅថ្ងៃបុណ្យ និងថ្ងៃឈប់សម្រាក។ កែប្រែពេលម៉ោងធ្វើការ និងមិនត្រូវធ្វើការបន្ថែមម៉ោងដោយបង្ខំ។ ក្រោយកិច្ចប្រជុំភាគីទាំងពីរបានព្រមព្រៀងគ្នា ១២ចំណុច លើ ២៤ចំណុច។
ក្នុងចំណោមអ្នកតវ៉ា និងក្រុមហ៊ុនម៉ៅការសំណង់ ឌូសុង ប្រមាណ ២០០នាក់ កម្មករម្នាក់ឈ្មោះ ហឿង សុខចាន់ បញ្ជាក់ការទាមទារពីពេលវេលាថា ៖ «គាត់បង្ខំឱ្យខ្ញុំថែមម៉ោង ហើយពេលព្រឹកគាត់ឱ្យខ្ញុំទាំងអស់គ្នាហ្នឹងមកឱ្យទាន់ម៉ោង ៦កន្លះ បើមកមិនទាន់ទេគេអត់ឱ្យចូលទេ។ ដល់ពេលហូបបាយគេឲ្យចេញម៉ោង ១២។ យើងឃ្លានបាយណាស់ យើងក្តៅណាស់។ ខ្ញុំសុំឲ្យបានចូលធ្វើការម៉ោង ៧ ហើយឡើងមកហូបបាយម៉ោង ១១។ សុំតែប៉ុណ្ណឹងទេ»។
ក្រុមហ៊ុន ឌូសុង ជាក្រុមហ៊ុនម៉ៅការសំណង់បន្តពីក្រុមហ៊ុនមួយទៀតឈ្មោះ ប៉ូស្កូ អ៊ីអ៊ែនស៊ី (Posco E&C) ដែលកំពុងសាងសង់អាគារកម្ពស់ ៣៨ជាន់ ឈ្មោះ វឌ្ឍនៈ ខេភីថល (Vattanac Capital) នៅរាជធានីភ្នំពេញ។
មន្រ្តីផ្នែករដ្ឋបាលរបស់ក្រុមហ៊ុន ប៉ូស្កូ អ៊ីអ៊ែនស៊ី ដែលបានចូលប្រជុំដោះស្រាយដែរ គឺកញ្ញា ឃុត ម៉ូលីន ថ្លែងថា បញ្ហាដែលបានកើតឡើងនេះ គឺបណ្តាលមកពីភាគីខាងកម្មករទទួលព័ត៌មានមិនបានគ្រប់គ្រាន់ ព្រោះកម្មករខ្លះទើបចូលធ្វើការថ្មី។
កញ្ញា ឃុត ម៉ូលីន បន្តថា ៖ «ក្រោយពីការពិភាក្សាគ្នាទៅឃើញថា កម្មករហ្នឹងគាត់មានការយល់ដឹងច្រើន ថាខាងក្រុមហ៊ុន ឌូសុង បានផ្តល់លក្ខខណ្ឌការងារល្អដល់កម្មករទាំងអស់ហ្នឹង ហើយគាត់ក៏ព្រមទទួលយក ហើយក្រុមហ៊ុនក៏ព្រមតាមសំណើររបស់គាត់ ដែលគាត់សំណូមពរឱ្យមានពេទ្យ គឺក្រុមហ៊ុនធ្វើតាមគាត់»។
លោក សុខ សុវណ្ណដេត ប្រធានសហជីពកម្មករសំណង់ និងព្រៃឈើកម្ពុជា បានឱ្យដឹងថា ក្រុមហ៊ុនសន្យានឹងបើកប្រាក់ឈ្នួលឱ្យកម្មករនៅថ្ងៃទី៣ ខែកញ្ញា ហើយនឹងផ្អាកសកម្មភាពសាងសង់មួយរយៈ។ កម្មករមួយចំនួនសម្តែងការសង្ស័យថា ក្រុមហ៊ុនអាចនឹងមិនយកពួកគាត់ធ្វើការវិញទេ ព្រោះតែការទាមទាររយៈពេលពីរថ្ងៃ។ ប៉ុន្តែមន្រ្តីសហជីពនិយាយថា ក្រុមហ៊ុនបានសន្យាថា គេនឹងមិនបញ្ឈប់ព្រោះតែការតវ៉ាទេ។ កម្មករនិយាយថា ប្រសិនបើមានការបញ្ឈប់ព្រោះតែការតវ៉ានេះមែន ពួកគាត់នឹងតវ៉ាសាជាថ្មី៕