លិខិតថ្ងៃទី១២ ខែសីហា មានចុះហត្ថលេខាដោយ លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ បានស្នើឲ្យលោក អ៊ឹម សិទ្ធី រដ្ឋមន្ត្រីក្រសួងអប់រំ បើកការស៊ើបអង្កេតជាបន្ទាន់ទៅលើលិខិតអនាមិកមួយច្បាប់ ផ្ញើមកសមាគមគ្រូ ស្ដីពីសំណូកពុករលួយបានកើតមាននៅក្នុងនាយកដ្ឋានមធ្យមសិក្សាចំណេះទូទៅ នៅសម័យប្រឡងមធ្យមសិក្សាកម្រិតទី២ ទើបបញ្ចប់ថ្មីៗនេះ។
លិខិតអនាមិកបានរៀបរាប់ឈ្មោះមន្ត្រីនៅក្នុងនាយកដ្ឋានមធ្យមសិក្សាចំណេះទូទៅ នៃក្រសួងអប់រំ ដែលបានទទួលសំណូកពីការបែងចែកតួនាទីគណៈមេប្រយោគ ឬអនុរក្សនៅសម័យប្រឡងមធ្យមសិក្សាកម្រិតទី២ កន្លងទៅនេះ។ លិខិតបន្តថា មានបុគ្គលិកសិក្សាខ្លះបានចំណាយថវិកាទៅឲ្យថ្នាក់ដឹកនាំនាយកដ្ឋានចំណេះទូទៅពី ២០ម៉ឺនរៀល ទៅ ៣០ម៉ឺនរៀល ឬពី ១០ ទៅ ១៥ដុល្លារ ជាថ្នូរបានធ្វើជាអនុរក្ស មេប្រយោគ និងពី ៥០ដុល្លារ ឲ្យមានតួនាទីជាអនុប្រធាន ឬប្រធានមណ្ឌលប្រឡងជាដើម។
បន្ថែមលើលិខិត លោក រ៉ុង ឈុន នៅរសៀលថ្ងៃទី១៣ ខែសីហានេះ បានអំពាវនាវឲ្យលោក អ៊ឹម សិទ្ធី រដ្ឋមន្ត្រីក្រសួងអប់រំ ត្រូវបើកការស៊ើបអង្កេតទៅលើលិខិតអនាមិក រកឲ្យឃើញការពិត និងត្រូវផ្តន្ទាទោសមន្ត្រីជាប់ពាក់ព័ន្ធនឹងអំពើពុករលួយ ដើម្បីលើកកម្ពស់វិស័យអប់រំ ពិសេសឲ្យការប្រឡងក្រោយៗទៀត មានលក្ខណៈត្រឹមត្រូវ និងអាចជឿទុកចិត្តបាន។
វិទ្យុអាស៊ីសេរីមិនអាចទំនាក់ទំនងលោក អ៊ឹម សិទ្ធី រដ្ឋមន្ត្រីក្រសួងអប់រំ ដើម្បីបំភ្លឺបានទេតាមទូរស័ព្ទ ជុំវិញអំពើពុករលួយនៅក្នុងវិស័យអប់រំដែលរងការចោទប្រកាន់ នៅគ្រាដែលលោក អ៊ិន ថេ មន្ត្រីនាំពាក្យក្រសួងអប់រំ បានចុចផ្ដាច់ទូរស័ព្ទមិននិយាយស្តីជាមួយអ្នកយកព័ត៌មានវិទ្យុអាស៊ីសេរី នៅថ្ងៃទី១៣ ខែសីហានេះ។
កាលបរិច្ឆេទនៃសម័យប្រឡងសញ្ញាបត្រមធ្យមសិក្សាកម្រិតទី២ ឆ្នាំនេះ មានរយៈពេលពីរថ្ងៃកន្លះ គឺចាប់ពីថ្ងៃទី២៦ ដល់ថ្ងៃទី២៨ ខែកក្កដា ឆ្នាំ២០១០។ ក៏ប៉ុន្តែសម័យប្រឡងឆ្នាំនេះ ត្រូវបានក្រុមគ្រូបង្រៀនមកពីតាមខេត្តក្រុងមួយចំនួន ក្នុងប្រទេសកម្ពុជា បានរិះគន់ថា មន្ត្រីគណៈគ្រប់គ្រងសាលា ឬមន្ត្រីបម្រើការនៅនាយកដ្ឋានមធ្យមសិក្សាចំណេះទូទៅនៃក្រសួងអប់រំបានប្រព្រឹត្តអំពើពុករលួយ ទៅលើការបែងចែកតួនាទីមេប្រយោគ ឬអនុរក្សប្រឡង។
ប្រភពពីគ្រូបង្រៀនមិនបង្ហាញអត្តសញ្ញាណឲ្យដឹងថា ក្នុងគ្រូបង្រៀនម្នាក់ត្រូវចំណាយថវិកាពី ១០ ទៅ ១៥ដុល្លារ ទៅឲ្យថ្នាក់ដឹកនាំរបស់ខ្លួនជាថ្នូរបានចេញធ្វើមេប្រយោគ អនុរក្ស ឬមន្ត្រីកំណែ នៅក្នុងសម័យប្រឡងម្ដងៗ។ ចំណែកបុគ្គលិកសិក្សាដែលមិនមានថវិកាចំណាយទៅឲ្យថ្នាក់ដឹកនាំ ពួកគេមិនមានឱកាសចេញធ្វើអនុរក្ស មេប្រយោគ ឬមន្ត្រីកំណែបានលើសពីម្តងឡើយ។
ទោះមានការចោទប្រកាន់បែបនេះក្តី មន្ត្រីថ្នាក់ដឹកនាំសាលា ឬមន្ទីរអប់រំនៅតាមខេត្តក្រុងមួយចំនួន តែងបានច្រានចោលចំពោះការចោទប្រកាន់ ដោយអះអាងថា មិនមានអំពើពុករលួយក្នុងការបែងចែកតួនាទីបុគ្គលិកសិក្សាចេញធ្វើមេប្រយោគ ឬអនុរក្ស ក្នុងសម័យប្រឡងម្តងៗឡើយ។
ពាក់ព័ន្ធសំណូកពុករលួយនេះដែរ លោកមេធាវី សុក សំអឿន ប្រធានក្រុមអ្នកច្បាប់ការពារសិទ្ធិកម្ពុជា មានប្រសាសន៍ថា តាមក្រមព្រហ្មទណ្ឌសម័យអ៊ុនតាក់ ទាំងអ្នកសូក និងទទួលសំណូក គឺសុទ្ធតែប្រឈមមុខតាមផ្លូវច្បាប់ដូចៗគ្នា គ្រាន់តែអ្នកផ្ដល់សំណូកមានទោសស្រាលជាងអ្នកទទួលសំណូក។
រដ្ឋសភាប្រទេសកម្ពុជា កាលពីថ្ងៃទី១១ ខែមីនា ឆ្នាំ២០១០ បានអនុម័តសេចក្ដីព្រាងច្បាប់ប្រឆាំងអំពើពុករលួយ មាន ៥៧មាត្រា និង ៩ជំពូកជាស្ថាពររួចហើយ។
ច្បាប់ប្រឆាំងអំពើពុករលួយនេះ បានចែងអំពីការផ្ដន្ទាទោសឲ្យជាប់គុករវាងពី ៧ថៃ្ង ទៅ ៥ឆ្នាំ ចំពោះទោសកំហុសតូចតាច និងត្រូវផ្ដន្ទាទោសឲ្យជាប់គុកចន្លោះពី ៥ឆ្នាំ ទៅ ១៧ឆ្នាំ ឬមួយជីវិត ចំពោះទោសកំហុសនៃអំពើពុករលួយធ្ងន់ធ្ងរ។
លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ និងជាសមាជិកក្រុមប្រឹក្សាជាតិប្រឆាំងអំពើពុករលួយ បានឲ្យដឹងពីរូបភាពនៃសំណូកពុករលួយដែលត្រូវប្រឈមចំពោះមុខច្បាប់ដូច្នេះ ៖ «កម្រិតប៉ុណ្ណាដែលហៅថា ពុករលួយ? កុំគិតថា មួយរៀល ពីររៀល មួយពាន់រៀល ឬពីរពាន់រៀលលុយយើងមិនមែនពុករលួយនោះ ប៉ុន្តែគ្រាន់តែច្បាប់យើង ឲ្យយើងបែងចែកថា អ្វីដែលជាកម្រិតពុករលួយកើតឡើងដោយសារជីវភាពប្រចាំថ្ងៃ អ្វីទៀតក្រៅពីអាហ្នឹងគឺទោសធ្ងន់លើបញ្ហាប៉ុណ្ណឹងទេ។ ប៉ុន្តែមិនអាចនិយាយថា ក្រោម ២០ដុល្លារជាអំពើមួយមិនពុករលួយទេ សូន្យដុល្លារក៏ជាពុករលួយដែរ ឲ្យតែមានការប្រើអំណាចខ្លួនរំលោភទៅលើអ្វីមួយ»។
ទោះជាបែបនេះក្តី សំណូកពុករលួយនៅក្នុងវិស័យអប់រំដែលរងការរិះគន់ ត្រូវបានសាធារណជនអះអាងថា មិនទាន់ឃើញមានចំណាត់ការណាមួយពីមន្ត្រីថ្នាក់ដឹកនាំក្រសួងអប់រំ ទៅតាមការអំពាវនាវរបស់សមាគមគ្រូបង្រៀន ឬលោកគ្រូ អ្នកគ្រូ ទៅតាមការស្នើសុំនៅឡើយទេពាក់ព័ន្ធអំពើពុករលួយនេះ៕