នៅក្នុងសេចក្តីប្រកាសព័ត៌មានរបស់ទីស្តីការគណៈរដ្ឋមន្ត្រីបានឲ្យដឹងថា ការគាំទ្រនិងអនុម័តលើសេចក្តីព្រាងច្បាប់នេះ គឺជាការប្រយុទ្ធប្រឆាំងអំពើពុករលួយដែលជាផ្នែកមួយនៃកម្មវិធីកំណែទម្រង់រដ្ឋរបស់រដ្ឋាភិបាលកម្ពុជា ដើម្បីឲ្យមានអភិបាលកិច្ចល្អ ពង្រឹងនិតីរដ្ឋ ការអភិវឌ្ឍសេដ្ឋកិច្ចជាតិប្រកបដោយចិរភាពនិងរួមចំណែកកាត់បន្ថយភាពក្រីក្រជូនប្រជាពលរដ្ឋ។
នៅក្នុងវិធីបង្ការនិងវិធានការប្រឆាំងអំពើពុករលួយ រាជរដ្ឋាភិបាលបានកំណត់នូវយុទ្ធសាស្ត្រដោយផ្តោតលើកត្តាសារវន្តចំនួន៣ដែលមានប្រទាក់ក្រឡាគ្នា គឺទី១ ការអប់រំនិងបង្ការទប់ស្កាត់អំពើពុករលួយ ទី២ ការអនុវត្តច្បាប់ ឬការបង្ក្រាបបទល្មើសពុករលួយនិងទី៣ ការចូលរួមនិងការគាំទ្រពីមហាជន។
នៅក្នុងសេចក្តីព្រាងច្បាប់ប្រឆាំងអំពើពុករលួយនោះមានចំនួន៩ជំពូកនិង៥៧មាត្រា ហើយនឹងក្លាយទៅជាឧបករណ៍គតិយុត្តដ៏សំខាន់បន្ថែមទៀត សម្រាប់កំណត់អំពីយន្តការនៃការអនុវត្តការងារប្រឆាំងអំពើពុករលួយ ការដាក់ទណ្ឌកម្មនិងនីតិវិធីនានាក្នុងការបង្ក្រាបបទល្មើសពុករលួយ៕