តុលាការក្រុងភ្នំពេញបានកោះហៅចាងហ្វាងកាសែត ខ្មែរអមតៈ ឲ្យចូលខ្លួនឆ្លើយបំភ្លឺនៅល្ងាចថ្ងៃច័ន្ទសប្ដាហ៍ក្រោយនេះ នៅគ្រាដែលមានពាក្យបណ្ដឹងពីមន្ត្រីរដ្ឋាភិបាលមួយរូបប្ដឹងចោទថា ចាងហ្វាងកាសែតនោះបានផ្សាយព័ត៌មានមិនពិត និងបរិហារកេរ្តិ៍ ជុំវិញការផ្សាយថា សកលវិទ្យាល័យកម្ពុជារបស់មន្ត្រីរូបនោះបានលក់ឯកសារពាក្យសុំប្រឡងថៃ្ល និងមានការត្អូញត្អែរពីនិស្សិត។
ដើមបណ្ដឹងនៃសំណុំរឿងនេះគេបានស្គាល់ថា គឺលោក កៅ គឹមហួន ជារដ្ឋលេខាធិការនៃក្រសួងការបរទេសកម្ពុជា និងជានាយកនៃសកលវិទ្យាល័យកម្ពុជា នៅក្នុងទីក្រុងភ្នំពេញ។ ដីកាកោះហៅសាកសួរនោះបានធ្វើទ្បើងដោយលោកព្រះរាជអាជ្ញា លឹម មករន្ទ នៃតុលាការក្រុងភ្នំពេញ។
ចាងហ្វាងកាសែត ខែ្មរអមតៈ លោក ប៊ុន ថា ដែលបានទទួលដីកាកោះហៅកាលពីថ្ងៃទី១២ ខែមីនាកន្លងទៅនេះ បានមានប្រសាសន៍ប្រាប់វិទ្យុអាស៊ីសេរីថា លោកនឹងទៅឆ្លើយបំភ្លឺតាមការកោះហៅនៅថ្ងៃច័ន្ទដើមសប្ដាហ៍ក្រោយនេះ។
លោក ប៊ុន ថា បានបញ្ជាក់ថា ៖ «គេហៅខ្ញុំជាលើកទី២ ម៉ោង២កន្លះថ្ងៃច័ន្ទ។ ហៅដើម្បីសាកសួរ គេគ្រាន់តែថា ដើម្បីសាកសួរ ដីកាកោះហៅហ្នឹង»។
សុខ សេរី ៖ ក្រោមបទចោទអ្វី? ប៊ុន ថា ៖ បរិហារកេរ្តិ៍ និងផ្សាយព័ត៌មានមិនពិត។ សុខ សេរី ៖ ផ្សាយរឿងអ្វី? ប៊ុន ថា ៖ ខ្ញុំចុះរឿងសកលវិទ្យាល័យកម្ពុជាលក់ដឺម៉ង់ថ្លៃ។
មេធាវីការពារក្ដីឲ្យលោក ប៊ុន ថា គឺលោក សំ សុគង់ បានមានប្រសាសន៍ថា លោកកំពុងតែត្រៀមខ្លួនការពារក្តីនេះ ៖ «ខ្ញុំបានដាក់ពាក្យការពារទៅតាមការពឹងពាក់របស់កូនក្ដីខ្ញុំហើយ។ ខ្ញុំបានថតចម្លងសំណុំរឿងពីតុលាការមកសិក្សាដើម្បីធ្វើការតវ៉ា ឬក៏ធ្វើការជជែកនៅពេលដែលសាកសួរកូនក្ដីខ្ញុំនៅថ្ងៃស្អែកនេះ»។
ការប្តឹងដោយលោក កៅ គឹមហួន នាយកសកលវិទ្យាល័យកម្ពុជា ប្រឆាំងនឹងលោក ប៊ុន ថា ចាងហ្វាងកាសែតខែ្មរអមតៈ គឺក្រោយពីកាសែតនេះបានចេញផ្សាយអត្ថបទព័ត៌មានចំនួនពីរ កាលពីខែតុលា ឆ្នាំ២០០៩កន្លងទៅ ជុំវិញការត្អូញត្អែររបស់និស្សិតអំពីការលក់ពាក្យសុំប្រឡងមានតម្លៃថ្លៃ រវាង ២០.០០០រៀល ទៅ ២៥.០០០រៀលក្នុងម្នាក់ៗ នៅក្នុងចំណោមសិស្សជាច្រើនពាន់នាក់ដែលសុំពាក្យប្រឡងយកអាហារូបករណ៍។
វិទ្យុអាស៊ីសេរីមិនអាចសុំការពន្យល់ពីលោក កៅ គឹមហួន ជានាយកសកលវិទ្យាល័យកម្ពុជាបានទេ ដោយទូរស័ព្ទរបស់លោកបានបិទ មិនបានឆ្លើយតប។
មេធាវីរបស់លោក កៅ គឹមហួន ជាដើមបណ្ដឹង គឺលោក ជា សុខចាន់ បានមានប្រសាសន៍ថា លោកកំពុងតែត្រៀមការពារកូនក្តីរបស់លោកដើម្បីរកយុត្តិធម៌ ៖ «លក្ខណៈរបស់ខ្ញុំ គឺខ្ញុំបានត្រៀមខ្លួនរួចជាស្រេចហើយក្នុងការស្វែងរកយុត្តិធម៌ជូនកូនក្ដីខ្ញុំ»។
សុខ សេរី ៖ តើលោកយល់ឃើញថា ការដែលសរសេរចោទប្រកាន់ហ្នឹងគឺជារឿងទោសព្រហ្មទណ្ឌដែលគួរតែផ្ដន្ទាទោស ឬមួយក៏អាចសម្រុះសម្រួលគ្នាបាន? ជា សុខចាន់ ៖ ចំពោះចំណុចនេះ ខ្ញុំអត់អាចឆ្លើយបានទេ ព្រោះថា នេះជាការសម្រេចក្ដីរបស់តុលាការទេ។
នៅជុំវិញការប្ដឹងនេះ ប្រធានក្រុមអ្នកស៊ើបអង្កេតនៃអង្គការការពារសិទ្ធិមនុស្ស លីកាដូ លោក អំ សំអាត បានមានប្រសាសន៍អត្ថាធិប្បាយថា ៖ «វាជារឿងមួយដែលមានការសោកស្ដាយណាស់ ចំពោះអ្នកកាសែត ហើយត្រូវបានគេប្ដឹងអំពីបទបរិហារកេរ្តិ៍ និងផ្សាយព័ត៌មានមិនពិត ហើយជារឿយៗយើងឃើញថា អ្នកកាសែតត្រូវបានគេយកបទទាំងអស់នេះ យកមកចោទជាបន្តបន្ទាប់ ហើយរហូតដល់មានអ្នកកាសែតខ្លះជាប់ពន្ធនាគារ»។
មានអ្នកកាសែតចំនួន ២នាក់ហើយកំពុងតែជាប់ឃុំខ្លួននៅក្នុងគុកព្រៃសរយៈពេល ១ឆ្នាំ និង ២ឆ្នាំ ក្រោមបណ្តឹងបរិហារកេរ្តិ៍ និងផ្សាយព័ត៌មានមិនពិត ក្នុងនោះមានលោក ហង្ស ចក្រា ចាងហ្វាងកាសែត ខែ្មរម្ចាស់ស្រុក និងលោក រស់ សុឃិត ជាអ្នកកាសែតរបស់ទស្សនាវដ្ដីមួយ៕