ប៉ុន្តែទោះបីយ៉ាងណាក្តី លោកបានបញ្ជាក់ថា ច្រកនៃបញ្ហានេះចូលតាមទ្វារណា ដំណោះស្រាយនៃបញ្ហានេះ គប្បីចេញតាមទ្វារដដែលនោះ។
លោក ជាម យៀប មានប្រសាសន៍ដូច្នេះថា ៖ «បើសិនជាលោក សម រង្ស៊ី បង់មុនទៅ អត់មានការងារអីទេ ប៉ុន្តែគាត់ហ្នឹង គឺថា គាត់ឈ្លើន គាត់ធ្វើឲ្យមានច្របូកច្របល់ ហើយនឹងអាលគាត់ដើរប្ដឹង ដើរបង្កាច់បង្ខូចគេគ្រប់បែបយ៉ាងទាំងអស់។ នេះខ្ញុំគ្រាន់តែសូមជម្រាបក្នុងនាមកូនខ្មែរម្នាក់ទេ ដែលលោក សម រង្ស៊ី តែងតែធ្វើរបៀបហ្នឹងច្រើនលើកច្រើនសាហើយ ដល់ពេលស្លោភ្នែក គេដកអភ័យឯកសិទ្ធិចេញ ស្លោភ្នែក បានទៅប្ដឹងទៅ IPU (សហភាពអន្តរសភា) ប្ដឹងទៅព្រះករុណាគ្រប់បែបយ៉ាងទាំងអស់។ ឥឡូវគឺថា អ៊ីចេះ ចូលតាមច្រកណាចេញតាមច្រកហ្នឹង គឺថានៅពេលដែលគណៈអចិន្រ្តៃយ៍លោកសម្រេចឲ្យព្យួរអភ័យឯកសិទ្ធិដើម្បីឲ្យតុលាការអាចសួរគាត់បានហ្នឹង គឺពេលដែលគាត់បង់រួចហើយអ៊ីចឹងទៅ គាត់ត្រូវធ្វើលិខិតដើម្បីសុំទៅសម្ដេចវិញ ដើម្បីបំពេញអភ័យឯកសិទ្ធិជូនគាត់វិញ គឺជាការចប់រឿង»។
ចំណែកលោក សម រង្ស៊ី ដែលបច្ចុប្បន្នកំពុងស្នាក់នៅក្នុងប្រទេសបារាំងនោះ ឲ្យដឹងថា នៅថ្ងៃទី២៦ ខែកុម្ភៈ ជាថ្ងៃលោកត្រូវគណៈកម្មាធិការអចិន្រ្តៃយ៍រដ្ឋសភាដកអភ័យឯកសិទ្ធិ លោកក៏បានដាក់លិខិតសុំអភ័យឯកសិទ្ធិរបស់លោកត្រឡប់វិញផងដែរ ប៉ុន្តែពុំមានចម្លើយតបជាវិជ្ជមានភ្លាមៗឡើយ។
តបទៅនឹងចំណុចផលវិបាកនៃការមិនឆ្លើយភ្លាមៗរបស់គណៈកម្មាធិការអចិន្រ្តៃយ៍ តម្រូវទៅនឹងភាពយឺតយ៉ាវក្នុងការបង់បា្រក់ តាមសេចក្តីសម្រេចបិទផ្លូវតវ៉ារបស់ក្រុមប្រឹក្សាធម្មនុញ្ញនោះ លោកប្រធានគណបក្សប្រឆាំងរូបនេះបានបដិសេធ។
លោក សម រង្ស៊ី មានប្រសាសន៍យ៉ាងដូច្នេះថា ៖ «មិនត្រូវនិយាយបែបហ្នឹងទេ ខ្ញុំមានហេតុផលចង់ប្រើមធ្យោបាយស្របច្បាប់ឲ្យបានពេញលេញ យោងនីតិវិធីតុលាការ យោងគោលការណ៍ដែលថា បទព្រហ្មទណ្ឌ គឺមានតែតុលាការ ហើយតុលាការកំពូលដែលជាអ្នកសម្រេចចុងក្រោយ។ ខ្ញុំឆ្ងល់ណាស់ថា នីតិវិធីតុលាការមិនទាន់បានប្រើប្រាស់បានពេញលេញផង រដ្ឋសភាគឺគេប្រញិបប្រញាប់ធ្វើសេចក្ដីសម្រេចដកអភ័យឯកសិទ្ធិខ្ញុំ ហ្នឹងរឿងតុលាការ។ ដល់គណៈកម្មាធិការជាតិរៀបចំការបោះឆ្នោត គេបានសរសេរលិខិតមួយទៅតុលាការថា គ.ជ.ប. បន្ទាប់ពីខ្ញុំបានបង់ប្រាក់ពិន័យហើយ គេដកពាក្យបណ្ដឹងរបស់គេហើយ ដូច្នេះ រឿងតុលាការចប់ហើយ រដ្ឋសភាគួរណាស់តែបញ្ចប់ជាបន្ទាន់ តែគេថា ឥឡូវនេះគេអត់ប្រញាប់ទេ គេចង់អូសបន្លាយដល់ប៉ុន្មានថ្ងៃ ប៉ុន្មានសប្ដាហ៍ ប៉ុន្មានខែទៀតស្រេចតែចិត្តគេ ខ្ញុំថាធ្វើបែបនេះមិនសមរម្យទាល់តែសោះ»។
សូមបញ្ជាក់ថា កាលពីថ្ងៃច័ន្ទដើមសប្តាហ៍នេះ មន្រ្តីជាន់ខ្ពស់នៃក្រសួងយុត្តិធម៌ប្រទេសកម្ពុជា ដែលជាដើមសំណើនៃការសុំដកអភ័យឯកសិទ្ធិនោះ បានឲ្យដឹងថា មកទល់ពេលនេះ លោកពុំទាន់បានទទួលសេចក្តីស្នើពីតុលាការដើម្បីប្រគល់អភ័យឯកសិទ្ធិអ្នកតំណាងរាស្រ្ត សម រង្ស៊ី ដែលគណៈកម្មាធិការអចិន្រ្តៃយ៍រដ្ឋសភាបានសម្រេចព្យួរកាលពីថ្ងៃទី២៦ ខែកុម្ភៈ កន្លងទៅនោះ ត្រឡប់វិញទៅឲ្យលោក សម រង្ស៊ី វិញ នៅឡើយទេ។
គួររំឭកបន្ថែមផងដែរថា ដោយសារសភាកម្ពុជានិងសហភាពអន្តរសភា ដែលមានប្រាថ្នា ហើយបានប្តេជ្ញាកសាងទំនាក់ទំនងល្អនឹងគ្នានោះ សហភាពអន្តរសភាដែលមានរដ្ឋសភានៃប្រទេសជាង ២០០ នៅជុំវិញពិភពលោកនោះ ក្នុងពេលកន្លងទៅ បានសម្រេចចិត្តថា នឹងមានការជួបប្រជុំសភាពិភពលោកដ៏ធំមួយ នៅរាជធានីភ្នំពេញ ដោយមានរដ្ឋសភាកម្ពុជាធ្វើជាម្ចាស់ផ្ទះនៅសប្តាហ៍ក្រោយនេះ៕