នៅក្នុងសុន្ទរកថាមួយជាសារធាណៈកាលពីថ្ងៃព្រហស្បតិ៍ លោកនាយករដ្ឋមន្ត្រីបានមានប្រសាសន៍ថា ការដឹកនាំនយោបាយរបស់គណបក្សប្រជាជនកម្ពុជាបច្ចុប្បន្នគឺធ្វើឲ្យមនុស្សគ្រប់និន្នាការរស់នៅបាននិងធានាមិនឲ្យមានសង្គ្រាម។
លោកនាយករដ្ឋមន្ត្រី ហ៊ុន សែន បានមានប្រសាសន៍ថា ៖ «បើមានគណបក្សប្រជាជនស្ថានការណ៍រាល់ថ្ងៃគឺនៅដដែល សន្តិភាព ស្ថិរភាពនយោបាយគឺមាន អ្នកណាក៏អាចរស់នៅជាមួយបាន រាជបល្ល័ង្ក ព្រះមហាក្សត្រ និងរបបរាជានិយមអាស្រ័យធម្មនុញ្ញត្រូវបានធានាយ៉ាងរឹងមាំ ប៉ុន្តែបក្សដទៃមិនប្រាកដ តែចូលមកគេដោះស្រាយបញ្ហាបានយ៉ាងម៉េចទេ»។
ប្រសាសន៍របស់លោកនាយករដ្ឋមន្ត្រីបានទទួលប្រតិកម្មតបពីប្រធានគណបក្សសិទ្ធិមនុស្ស។
លោក កឹម សុខា បានថ្លែងកាលពីម្សិលមិញថា គេចង់បានស្ថានភាពមួយនៅក្នុងប្រទេសកម្ពុជាប្រសើរជាងនេះ។
លោក កឹម សុខា បានបញ្ជាក់ថា ៖ «នៅប្រទេសកម្ពុជាយើងឃើញថាអ្នកដឹកនាំដដែល គណបក្សដដែល គំនិតដដែល ហើយវាច្បាស់ជាកម្ពុជាហ្នឹងនៅដដែលឬក៏វាអាចទៅអាក្រក់ជាងហ្នឹង ហើយបើសិនជាបោះឆ្នោតឲ្យគាត់មានន័យថា គាត់បញ្ជាក់ថាគាត់ទុកនៅដដែលហើយ។ គឺដដែលមានន័យដូចដែលយើងឃើញហើយថា នៅមានការរំលោភយកដីធ្លីប្រជាពលរដ្ឋដដែល នៅមានបរទេសរំលោភទឹកដីខ្មែរដដែល នៅមានអំពើពុករលួយដដែល នៅមានភាពក្រីក្រដដែល នៅមានការឈឺចាប់ពេលឈឺ ក្រីក្រអត់មានពេទ្យព្យាបាលដដែល។ អ៊ីចឹងហើយខ្ញុំជឿថាគាត់និយាយហ្នឹងត្រូវ ប៉ុន្តែធម្មតានៅក្នុងប្រទេសប្រជាធិបតេយ្យហើយសេចក្ដីប្រាថ្នារបស់ប្រជាពលរដ្ឋអត់ចង់ស្អីនៅដដែលទេ ចង់ប្រសើរជាងហ្នឹង។ ដូច្នេះហើយបើប្រជាពលរដ្ឋណាចង់បានស្អីដែលប្រសើរជាងហ្នឹងគួរតែរកអ្នកដឹកនាំផ្សេងទៀតដែលប្រសើរជាងហ្នឹង។ ដូច្នេះយើងជឿថា ប្រជាពលរដ្ឋអត់ចង់នៅដដែលទេ ចង់បានប្រសើរជាងហ្នឹង»។
កម្ពុជាមានសង្គ្រាមស៊ីវិលឆាបឆេះក្នុងប្រទេសចាប់តាំងពីឆ្នាំ១៩៧០ដែលធ្វើឲ្យមនុស្សស្លាប់និងគ្រឹះរចនាសម្ព័ន្ធប្រទេសបានខូចរលំរលាយ។ សង្គ្រាមបានបញ្ចប់ក្រោយអង្គការសហប្រជាជាតិបានចូលមកជួយរៀបចំការបោះឆ្នោតសកលខែឧសភា ឆ្នាំ១៩៩៣។ ចាប់តាំងពីនោះមកគឺមានចំនួន១៦ឆ្នាំហើយដែលកម្ពុជាបានចាប់ផ្តើមកសាងសន្តិភាពនិងកសាងជាតិរបស់ខ្លួនបន្តិចម្តងៗសាឡើងវិញ៕