ក្រុមអ្នករត់ម៉ូតូឌុបជាច្រើននាក់បានអះអាងថា កាលពីវេលាម៉ោង៦និង៣០នាទី ល្ងាចថ្ងៃទី១៣ ខែមីនា រថយន្ត Lexus ពណ៌ខ្មៅមួយគ្រឿងពាក់ផ្លាក់លេខភ្នំពេញ ២K៥៥.៦៧ ដែលគេដឹងថា ជារថយន្តរបស់មន្ត្រីគយប្រចាំច្រកទ្វារអន្តរជាតិប៉ោយប៉ែតបានបើកបុកម៉ូតូឌុប១គ្រឿងជិះគ្នាពីរនាក់បណ្តាលឲ្យស្រ្តីម្នាក់នៅខាងក្រោយរងរបួសធ្ងន់។
ក្រោយពីបើកបុកម៉ូតូលើកំណាត់ផ្លូវពីផ្សារអគ្គ រថយន្តគយនោះបានបើកកិនបន្ថែមលើម៉ូតូនោះដើម្បីរត់គេចចូលទៅភោជនីយដ្ឋាននាគទិព្វ ប៉ុន្តែត្រូវបានប៉ូលិសចរាចរណ៍ដោះលែងឲ្យរថយន្តនោះចេញពីភោជនីយដ្ឋាននាគទិព្វទើបបង្កឲ្យក្រុមអ្នករត់ម៉ូតូឌុបជាច្រើននាក់ផ្សេងទៀតនាំគ្នាទៅតវ៉ាដល់ទីស្នាក់គយ។
ម្ចាស់ម៉ូតូឌុប លោក អ៊ួន សំអាង បានថ្លែងឲ្យដឹងថា ក្រោយមកមានមនុស្សជាង១០០នាក់ភាគច្រើនជាអ្នករត់ម៉ូតូឌុប និងប្រជាពលរដ្ឋបានលើកគ្នាទៅតវ៉ាដល់ទីស្នាក់ការគយតែត្រូវមន្ត្រីគយជិត ១០នាក់ទាញកំាភ្លើងវែងខ្លីបើកសោរភ្ជង់បង្ខំឲ្យចាកចេញ។
លោក អ៊ួន សំអាង មានប្រសាសន៍ដូច្នេះថា ៖ «បុកភ្លាមគ្នាខ្ញុំមកភ្លាមដេញតាមឡាន ដល់ពេលចេញពីនាគទិព្វហើយ វាបើករត់ចេញទៅកន្លែងគយ»។
អធិការនគរបាលស្រុកអូរជ្រៅ លោក នុត លី បានមានប្រសាសន៍ថា លោកបានបញ្ជូនកម្លាំងប៉ូលិសចរាចរណ៍ទៅកាន់ភោជនីយដ្ឋាននាគទិព្វ ប៉ុន្តែកម្លាំងប៉ូលិសមិនបានឃាត់រថយន្តមន្ត្រីគយនោះទេ គឺគ្រាន់តែយកម៉ូតូរងគ្រោះមកទុកនៅអធិការដ្ឋាននគរបាលស្រុកប៉ុណ្ណោះ។
ទោះជាយ៉ាងណា លោក នុត លី បានព្យាយាមលាក់អត្តសញ្ញាណមន្ត្រីគយរូបនោះ ហើយថែមទាំងបដិសេធថា មន្រ្តីគយមិនបានប្រើអាវុធភ្ជង់ទៅលើក្រុមអ្នកតវ៉ានោះទេ។
អនុប្រធានសាខាគយប្រចាំច្រកទ្វារអន្តរជាតិប៉ោយប៉ែត លោក អៀង សារូ បានមានប្រសាសន៍ថា លោកមិនបានដឹងពីករណីខាងលើនេះទេ ៖ «សួរទៅខាងរដ្ឋបាលគេមើល៍ក្រែងលោគេដឹង»។
ទោះជាយ៉ាងណា បើតាមលេខាធិការសមាគមប្រជាធិបតេយ្យឯករាជ្យសេដ្ឋកិច្ចក្រៅប្រព័ន្ធ លោក ជា សុគន្ធ បានថ្លែងថា រថយន្តផ្លាកលេខភ្នំពេញ ២K៥៥៦៧ ជាកម្មសិទ្ធិ លោក ជ័យ រិន ជាអនុប្រធានសាខាគយប្រចាំច្រកទ្វារអន្តរជាតិប៉ោយប៉ែត។
លោកបន្តថា សូម្បីរូបលោកក៏ត្រូវមន្ត្រីគយយកកាំភ្លើងភ្ជង់ដែរ ៖ «មេគយកាំភ្លើងខ្លីគេមកភ្ជង់ខ្ញុំ វាឲ្យកូនចៅវាកាន់កាំភ្លើងគ្រប់ដៃ ព្រោះអីមានតែមេគយទេមានកំាភ្លើងខ្លីកាន់»។
លោក ជា សុគន្ធ បានអះអាងបញ្ជាក់ថា ប្រជាពលរដ្ឋនិងក្រុមអ្នករត់ម៉ូតូរាប់រយនាក់កំពុងធ្វើញត្តិដាក់ទៅទីចាត់ការគយនៅទីក្រុងភ្នំពេញ ទាមទារឲ្យមានការដាក់ពិន័យដកមន្ត្រីគយដែលបានប្រើកាំភ្លើងភ្ជង់គំរាមទៅលើប្រជាពលរដ្ឋនោះចេញពីតំណែង៕