តំណាងរាស្ត្រគណបក្សប្រជាជនកម្ពុជា លោក ជាម យៀប បានមានប្រសាសន៍ថា ការអនុម័តនូវសេចក្ដីព្រាងក្រមព្រហ្មទណ្ឌនេះ គឺជាការបើកផ្លូវដើម្បីឈានទៅដល់ការបង្កើតច្បាប់ប្រឆាំងអំពើពុករលួយ។
លោក ជាម យៀប មានប្រសាសន៍ដូច្នេះ ៖ «ខ្ញុំមានសុទិដ្ឋិនិយមថា យ៉ាងយូរបំផុតនៅក្នុងឆមាសទី១ នៃឆ្នាំ២០១០ ច្បាប់ប្រឆាំងអំពើពុករលួយនឹងត្រូវចេញជាដាច់ខាត»។
ចំណែកតំណាងរាស្ត្រគណបក្សសមរង្ស៊ី លោកស្រី មូរ សុខហួរ បានថ្លែងថា តំណាងរាស្ត្រគណបក្សសមរង្ស៊ី បានគាំទ្រនូវការអនុម័តសេចក្ដីព្រាងក្រមព្រហ្មទណ្ឌ ព្រោះក្រមព្រហ្មទណ្ឌនេះ មានសារសំខាន់សម្រាប់បង្កើតច្បាប់ប្រឆាំងអំពើពុករលួយ។ ទោះយ៉ាងណា លោកស្រីបានបញ្ជាក់ថា តំណាងរាស្ត្រគណបក្សសមរង្ស៊ី បានលើកដៃគាំទ្រទាំងក្ដីព្រួយបារម្ភចំពោះមាត្រាមួយចំនួនដែលមិនបានចែងឲ្យបានច្បាស់ពីនិយមន័យនិងខ្លឹមសារ ជាពិសេសគឺចំណុចដែលទាក់ទងនឹងសេរីភាពក្នុងការបញ្ចេញមតិ ការចោទប្រកាន់ស្ពីពីបទបរិហារកេរ្តិ៍ ការដាក់ទោសទណ្ឌលើករណីសូកប៉ាន់ជាដើម។
លោកស្រី មូរ សុខហួរ បានថ្លែងយ៉ាងដូច្នេះ ៖ «បើសិនជាត្រឹមតែប៉ូលិសចរាចរណ៍ ស៊ីសំណូក៥ដុល្លារ តើយើងដាក់ទោសគាត់៧ឆ្នាំ ដូចអភិបាលខេត្តស៊ីញ៉េកុងត្រាឲ្យគេ ដែលពាក់ព័ន្ធនឹងការអភិវឌ្ឍរាប់លានដុល្លារទេ?»។
ដោយឡែក លោក កឹម សុខា ប្រធានគណបក្សសិទ្ធិមនុស្ស បានអះអាងថា តំណាងរាស្ត្រទាំងបីរូបនៃគណបក្សរបស់លោក មិនគាំទ្រការអនុម័តសេចក្ដីព្រាងក្រមព្រហ្មទណ្ឌនេះទេ ហើយគណបក្សសិទ្ធិមនុស្សបានចេញសេចក្ដីថ្លែងការណ៍របស់ខ្លួននៅរសៀលថ្ងៃច័ន្ទនេះ បញ្ជាក់អំពីការព្រួយបារម្ភខ្លាំងជាងគេទៅលើការប៉ះពាល់នៃសេរីភាពបញ្ចេញមិតិរបស់អ្នកនយោបាយប្រឆាំង ដោយសារតែក្រមព្រហ្មទណ្ឌថ្មីនោះ នឹងដាក់ទោសទណ្ឌទៅលើការបរិហារកេរ្តិ៍ ជេរប្រមាថ ត្រូវបានគេជឿថា មានភាពរឹតត្បិតចំពោះរឿងនេះ។
លោក កឹម សុខា បានអះអាងដូច្នេះ ៖ «នីតិរដ្ឋមិនមែនគ្រាន់តែមានច្បាប់ទេ ហើយដែលច្បាប់នោះ ធ្វើឲ្យអាចអនុវត្តទៅរំលោភលើសិទ្ធិសេរីភាពប្រជាពលរដ្ឋ គេមិនហៅថានីតិរដ្ឋទេ»។
គួរបញ្ជាក់ជូនថា សេចក្ដីព្រាងក្រមព្រហ្មទណ្ឌមាន៦គន្ថី ១២មាតិកា ៥០ជំពូក និង៦៧២មាត្រា ហើយរដ្ឋសភាបានចាប់ផ្ដើមពិភាក្សាតាំងពីថ្ងៃទី១ តុលា រហូតមកដល់ថ្ងៃទី១២ តុលា រដ្ឋសភាក៏បានអនុម័តសេចក្ដីព្រាងក្រមព្រហ្មទណ្ឌនេះទាំងមូល។
លោកស្រី មូរ សុខហួរ បានបញ្ជាក់បន្ថែមថា គ្មានផ្នែកណាមួយនៃសេចក្ដីព្រាងក្រមព្រហ្មទណ្ឌនេះ ត្រូវកែប្រែឡើយ សូម្បីតែពាក្យមួយម៉ាត់ដែលនាំឲ្យមានការបារម្ភខ្លាំងទៅលើចំណុចមួយចំនួន៕