សវនាការបឋមរបស់សាលាក្តីខ្មែរក្រហមនៅថ្ងៃទី២ ដែលផ្តោតការពិភាក្សាសំខាន់លើការស្នើសុំរបស់សហព្រះរាជអាជ្ញា ឱ្យអង្គជំនុំជម្រះសាលាដំបូងទទួលស្គាល់ឯកសារភាពយន្តថ្មី ទាក់ទងនឹងមន្ទីរ ស-២១ ដែលខ្លួនទើបទទួលបានពីមជ្ឈមណ្ឌលឯកសារកម្ពុជា បានបញ្ចប់ទៅដោយការតវ៉ាជំទាស់យ៉ាងខ្លាំងក្លាពីសហមេធាវីការពារក្តីរបស់ ឌុច។
លោក កា សាវុទ្ធ សហមេធាវីជាតិកម្ពុជា ដែលការពារក្តីឲ្យ ឌុច បានជំទាស់យ៉ាងដាច់អហង្ការចំពោះឯកសារភាពយន្តពីរឈុត ថតដោយអ្នកកាសែតវៀតណាម នៅដើមឆ្នាំ១៩៧៩ ដែលសហព្រះរាជអាជ្ញាស្នើសុំឱ្យអង្គជំនុំជម្រះសាលាដំបូងទទួលស្គាល់នោះ ថាជាឯកសារភាពយន្តប្រឌិតឡើងតាមបែបនយោបាយ ហើយលោកបន្ថែមថា មិនត្រូវឱ្យនយោបាយចូលជ្រៀតជ្រែកក្នុងរឿងក្តីនេះទេ។
នៅក្រោយសវនាការ លោក ឆាំង យុ នាយកមជ្ឈមណ្ឌលឯកសារកម្ពុជា ដែលទទួលបានឯកសារភាពយន្តនេះពីប្រទេសវៀតណាម មានប្រសាសន៍ទាក់ទងនឹងការលើកឡើងរបស់លោក កា សាវុទ្ធ ខាងលើថា រឿងសំខាន់គឺការពិតដែលបង្ហាញនៅក្នុងភាពយន្តនោះ ដូចជាអំពីទិដ្ឋភាពទីតាំងមន្ទីរ ស-២១ អំពីកុមារ នង ចាន់ផល ជាដើម។
លោក ឆាំង យុ មានប្រសាសន៍ដូច្នេះ ៖ «ទិដ្ឋភាពកន្លែងដូចជា រូបភាពគុក រូបភាពកូនក្មេង ... វាមិនមែនទាក់ទងនឹងនយោបាយ វាជាការពិត។ យើងមិនត្រូវធ្វើនយោបាយទៅលើការពិត។ ការពិតគឺមាន [នង] ចាន់ផល មានឪពុកជាប់គុកនៅក្នុងហ្នឹង ម្ដាយជាប់គុកនៅក្នុងហ្នឹង ហើយបានស្លាប់ ហើយខ្លួនឯងក៏នៅក្នុងហ្នឹងដែរ។ ហ្នឹងជាការពិត»។
ចំណុចសំខាន់ ដែលសហមេធាវីការពារក្តីលើកឡើងដើម្បីជំទាស់នឹងភាពយន្តឯកសារនោះ មាន ៨ចំណុច ដូចជាការថតខុសទិសច្រកទ្វារ, ស្លាកសញ្ញាក្លោងទ្វារចូល, ការមិនមានរោងជាងដូចសព្វថ្ងៃ, មិនមានអាងទឹកនៅក្បែរច្រកទ្វារចូល, រូបភាពនិងចំនួនខុសគ្នាអំពីសាកសពជនរងគ្រោះ ដែលបន្សល់ទុក, ការមានតែរូបកូនក្មេង និងមិនមានអ្នកនៅរស់ជាមនុស្សចាស់, រូបភាពដែលក្មេងមានសុខភាពល្អ ដែលមិនអាចទទួលយកបាន និងទី៨ ទាក់ទងនឹងបញ្ជីឈ្មោះអ្នកទោសមិនទាន់មានការបញ្ជាក់ច្បាស់លាស់។
ទោះជាយ៉ាងនេះក្ដី លោក ឆាំង យុ មានប្រសាសន៍បន្ថែមថា អ្វីៗគឺសម្រេចនៅលើចៅក្រមនៃអង្គជំនុំជម្រះ។
សូមបញ្ជាក់ជូនថា នៅចុងបញ្ចប់នៃសវនាការបឋមនេះ អង្គជំនុំជម្រះសាលាដំបូងបានកត់សម្គាល់ថា ការពិចារណាការស្នើសុំរបស់សហព្រះរាជអាជ្ញានិងការជំទាស់របស់សហមេធាវីការពារក្ដីអំពីឯកសារថ្មីនេះនឹងលើកយកទៅពិចារណានៅក្នុងពេលធ្វើសវនាការលើអង្គសេចក្ដីនៃករណីរបស់ ឌុច ប៉ុន្តែកាលបរិច្ឆេទនៃសវនាការលើអង្គសេចក្ដីនៃករណីរបស់ ឌុច នេះ អង្គសវនាការមិនទាន់បានសម្រេចនៅឡើយទេ ដោយសាលាដំបូងនឹងប្រកាសឲ្យដឹងនៅពេលខាងមុខ៕