ចំនួនអ្នកចូលរួមខាងលើនេះត្រូវបានប្រកាសឲ្យដឹងដោយលោក រាជ សម្បត្តិ ប្រធានផ្នែកកិច្ចការសាធារណៈរបស់សាលាក្តីខ្មែរក្រហមក្នុងពេលធ្វើសន្និសីទសារព័ត៌មានកាលពីរសៀលថ្ងៃពុធ ទី២២ ខែកក្កដា។
នៅក្នុងសន្និសីទសារព័ត៌មាន លោក រាជ សម្បត្តិ បានថ្លែងទៅកាន់អ្នកកាសែតចំនួនអ្នកចូលរួមជាង១ម៉ឺន២ពាន់នាក់នេះ គឺគិតចាប់តាំងពីថ្ងៃទី៣០ ខែមីនា ឆ្នាំ២០០៩មក។
លោក រាជ សម្បត្តិ ថ្លែងបន្ថែមដូច្នេះ ៖ «តាំងពីនោះមកយើងឃើញចំនួនប្រជាជនគាត់កើនរហូត ហើយគាត់បានចូលរួមយ៉ាងច្រើន ដោយឡែកយើងយល់ថា ប្រព័ន្ធផ្សព្វផ្សាយ ជាពិសេសវិទ្យុគឺមានសមត្ថភាពខ្លាំងមែនទែនក្នុងការជំរុញឲ្យមានការចូលរួមពីប្រជាជនកម្ពុជា។ ដោយឡែកមន្រ្តីផ្នែកកិច្ចការសាធារណៈយើងពីររូប គឺលោក សុវណ្ណរុំ និងលោក វិចិត្រ គាត់បានបន្តកិច្ចការរបស់គាត់ ដូចជាយប់មិញអ៊ីចឹង គាត់បានទៅស្នាក់នៅខេត្តកំពង់ធំ ហើយគាត់បាននាំប្រជាជនមក ថ្វីត្បិតតែវាមានចម្ងាយឆ្ងាយ ប៉ុន្តែពួកគាត់បានធ្វើកិច្ចការនេះប្រកបទៅដោយជោគជ័យ»។
នៅថ្ងៃពុធ ទី២២ ខែកក្កដាដែរ នៅសាលាសវនាការ យើងឃើញមានពលរដ្ឋខ្មែរច្រើនកុះករមកចូលរួមទស្សនាការជំនុំជម្រះរឿងក្តីរបស់ កាំង ហ្កេកអ៊ាវ ហៅ ឌុច អតីតប្រធានគុកទួលស្លែង ដែលជាប់ចោទថាបានបញ្ជាឲ្យសម្លាប់អ្នកទោសជាង១ម៉ឺននាក់ក្នុងរបបកម្ពុជាប្រជាធិបតេយ្យពីឆ្នាំ១៩៧៥ ដល់ ១៩៧៩។
ការឆ្លុះបញ្ចាំងអំពីចំនួនអ្នកចូលរួមខាងលើ លោក រាជ សម្បត្តិ មានប្រសាសន៍ដូច្នេះ ៖ «យើងរីករាយ យើងឃើញថាប្រជាជនកម្ពុជាមានការចាប់អារម្មណ៍ច្រើនក្នុងរឿងក្តីនេះ»។
លោក រាជ សម្បត្តិ មានប្រសាសន៍ថា ពលរដ្ឋខ្មែរច្រើនកុះករដែលមកចូលរួមទស្សនាការជំនុំជម្រះរឿងក្តីរបស់ កាំង ហ្កេកអ៊ាវ ហៅ ឌុច នៅថ្ងៃពុធ ទី២២ ខែកក្កដា គឺមានចំនួនជាង៤០០នាក់មកពីស្រុកសន្ទុក ខេត្តកំពង់ធំ។
ក្នុងចំណោមអ្នកចូលរួម៤០០នាក់ដែលមកពីស្រុកសន្ទុក ខេត្តកំពង់ធំនោះ លោក ហួត ឈាងកាំង ជាអ្នកធ្លាប់រៀនជាមួយ ឌុច កាលពីឆ្នាំ១៩៥៨ មានឱកាសជូន ឌុច ត្រឹមតែម្ខាងជញ្ជាំងកញ្ចក់ប៉ុណ្ណោះ។
លោក ហួត ឈាងកាំង កត់សម្គាល់ ឌុច ដូច្នេះ ៖ «ខុសប្លែកបន្តិចទេ ត្រង់ថានិយាយម៉ឺងម៉ាត់ ពីព្រោះមុននេះគេហៅមនុស្សញី ដល់ឥឡូវអត់ទេ រាងម៉ឺងម៉ាត់។ ឃើញគាត់នៅនេះខ្ញុំស៊ីញ៉ូ ស្រាប់តែស្ទុះមកតែម្ដង ជួបនឹងកញ្ចក់»។
សូមជម្រាបឡើងវិញដែរថា ការជំនុំជម្រះក្ដីរបស់ កាំង ហ្កេកអ៊ាវ ហៅ ឌុច សាលាក្តីខ្មែរក្រហមគ្រោងនឹងធ្វើបន្តរហូតដល់ថ្ងៃទី១ ខែតុលា ឆ្នាំ២០០៩៕