សមាជិកសភាអឺរ៉ុប លោកស្រី សេស៊ីលីយ៉ា វិកស្ត្រម (Cecilia Wikstrom) បានព្រមានទុកជាមុនថា បើសិនជាការបោះឆ្នោតនៅឆ្នាំ២០១៣ ខាងមុខនោះគ្មានវត្តមានរបស់មេដឹកនាំគណបក្សប្រឆាំងនោះទេ នោះការបោះឆ្នោតនោះមិនត្រូវចាត់ទុកថា ធ្វើឡើងដោយសេរី និងយុត្តិធម៌នោះឡើយ។
ថ្លែងនៅក្នុងសន្និសីទកាសែតនៅព្រឹកថ្ងៃសុក្រ ទី២០ ឧសភា លោកស្រីសមាជិកសភាអឺរ៉ុប បញ្ជាក់បន្តទៀតថា ការនាំយកមកវិញនូវមេដឹកនាំនយោបាយ គឺដើម្បីឲ្យការបោះឆ្នោតមានការជជែករស់រវើក ហើយបើសិនជាគ្មានវត្តមានរបស់លោកទេ មិនមែនមានតែសហគមន៍អឺរ៉ុបតែមួយនោះទេ ដែលត្រូវប្រតិកម្មនោះ ប៉ុន្តែគឺជាប្រតិកម្មសម្រាប់សហគមន៍អន្តរជាតិទាំងមូលផងដែរ ហើយប្រជាជនត្រូវតែមានការជួបប្រជុំគ្នាជាទ្រង់ទ្រាយធំ ដើម្បីទាមទារការត្រឡប់មកវិញរបស់លោក សម រង្ស៊ី។
លោកស្រី សេស៊ីលីយ៉ា វិកស្ត្រម ថ្លែងបន្តដូច្នេះ ៖ "សូមយកលោក សម រង្ស៊ី ត្រឡប់មកប្រទេសនេះវិញ ពីព្រោះថា នេះជាប្រទេសរបស់គាត់ ហើយគាត់មានឆន្ទៈក្នុងការបម្រើពលរដ្ឋ ហើយសហគមន៍អន្តរជាតិត្រូវតែប្រតិកម្មចំពោះបញ្ហានេះ ដើម្បីការទាមទារនូវសិទ្ធិវិលត្រឡប់មកវិញរបស់លោក សម រង្ស៊ី ដោយសុវត្ថិភាព"។
មកដល់ពេលនេះគេមិនទាន់ឃើញសញ្ញាវិជ្ជមានណាមួយរបស់រដ្ឋាភិបាលខ្មែរស្ដីអំពីការបន្ទន់ជំហរឲ្យមេដឹកនាំបក្សប្រឆាំង លោក សម រង្ស៊ី វិលត្រឡប់មកវិញនៅឡើយទេ។ មន្ត្រីអ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន ថ្លែងថា រដ្ឋាភិបាលមិនដែលហាមឃាត់លោក សម រង្ស៊ី នោះទេ ប៉ុន្តែលោក សម រង្ស៊ី ត្រូវទទួលនូវអ្វីដែលជាកាតព្វកិច្ចយុត្តិធម៌របស់តុលាការនៅពេលដែលលោកវិលត្រឡប់មកវិញ។
មន្ត្រីរូបនេះបញ្ជាក់ដដែលថា អវត្តមានរបស់លោក សម រង្ស៊ី មិនទាក់ទងទៅដល់ការបោះឆ្នោតដោយសេរី និងយុត្តិធម៌នោះទេ ៖ "លទ្ធិប្រជាធិបតេយ្យនៅកម្ពុជា មិនមែនស្ថិតនៅលើបុគ្គលណាម្នាក់នោះទេ វាស្ថិតនៅលើប្រព័ន្ធ"។
លោក សម រង្ស៊ី មេដឹកនាំបក្សប្រឆាំងធំជាងគេនៅកម្ពុជា ត្រូវតុលាការខេត្តស្វាយរៀង ផ្ដន្ទាទោសចំនួន ២ឆ្នាំ ដោយចោទថា លោកបានញុះញង់បំបែកបំបាក់ចំណងសាមគ្គីភាពខ្មែរ-វៀតណាម នៅក្នុងរឿងព្រំដែន។
ក្រោយមករដ្ឋាភិបាលលើកមួយករណីផ្សេងទៀត ក្រោយពីលោកបានផ្សព្វផ្សាយនូវឯកសារផែនទីរបស់ហ៊្គូហ្គល អ៊ើស (Googl Earth) ដោយនិយាយថា ការបោះបង្គោលព្រំដែនរវាងខ្មែរ និងវៀតណាម លេខ១៨៤ ១៨៥ ១៨៦ និងបង្គោលលេខ ១៨៧ បាននាំឲ្យខ្មែរបាត់បង់ទឹកដី។ សរុបចុងក្រោយ លោកត្រូវតុលាការខ្មែរផ្ដន្ទាទោសដាក់ពន្ធនាគារសរុបចំនួន ១៤ឆ្នាំ៕