ក្រុមសកម្មជនការពារដីធ្លីនិងគ្រួសារបាត់បង់ដីធ្លីសរុបចំនួនជាង១០០នាក់ នៅក្នុងភូមិព្រែកជីក ឃុំជីខក្រោម ស្រុកស្រែអំបិល ខេត្តកោះកុង នៅព្រឹកថៃ្ងព្រហស្បតិ៍ ទី១០ ធ្នូនេះ បានដងែ្ហក្បួនអហិង្សាមួយដើម្បីប្រារព្ធខួបលើកទី៦១ នៃទិវាសិទ្ធិមនុស្សអន្តរជាតិ ១០ ធ្នូ ក្នុងការរំឭកនូវអ្វីដែលពួកគាត់រងការរឹបយកដីធ្លី លំនៅនិងដីធ្លីកសិកម្ម ដោយក្រុមហ៊ុនឯកជន កាលពីពេលថ្មីៗនេះ។
លោកស្រី ថាវ ញឿង ជាគ្រួសាររងការបាត់បង់ដីធ្លីកសិកម្មនិងជាអ្នករៀបចំការដង្ហែក្បួនអហិង្សានេះ បានថែ្លងប្រាប់វិទ្យុអាស៊ីសេរីមកថា ប្រជាពលរដ្ឋកំពុងតែអនុវត្តសិទ្ធិនៅថៃ្ងទី១០ ធ្នូនេះ។
លោកស្រី ថាវ ញឿង បានថ្លែងដូច្នេះ ៖ «គឺជាសិទ្ធិមនុស្ស ជាទូទៅប្រជាពលរដ្ឋម្នាក់ៗមានសិទ្ធិរស់នៅលើដីធ្លី មានសិទ្ធិកាន់កាប់ដីធ្លីរបស់គាត់ មួយទៀតមានសិទ្ធិរស់នៅក្នុងសង្គម ដូចជាបញ្ចេញមតិដើម្បីទាមទាររកយុត្តិធម៌ គឺគាត់មានសិទ្ធិគ្រប់យ៉ាងទាំងអស់»។
ប្រជាពលរដ្ឋម្នាក់ឈ្មោះ កេង កោង ដែលបានចូលរួមក្នុងការដង្ហែក្បួននោះ បានថែ្លងថា ៖ «សិទ្ធិនេះមិនមែនប្រើតែអ្នកមានអំណាចទេ គឺប្រជាជនក៏អាចធ្វើបានទាំងអស់ មានសិទ្ធិដូចគ្នា»។
ប្រជាពលរដ្ឋម្នាក់ទៀតឈ្មោះ ហ៊ុន ប៊ុនថន អាយុ៦០ឆ្នាំ បានថែ្លងថា ៖ «អំពាវនាវសុំឲ្យរដ្ឋាភិបាលធ្វើអ្វីៗឲ្យគោរពច្បាប់ ឲ្យគោរពសិទ្ធិផង កុំចេះតែបំពានតាមទំនើងចិត្ត ពួកខ្ញុំរងគ្រោះវេទនាខ្លាំងណាស់សព្វថ្ងៃនេះ»។
ការដង្ហែក្បួនដោយថ្មើរជើងនេះ បានចាប់ផ្តើមពីឃុំជីខក្រោម សំដៅទៅវត្តមួយនៅក្នុងឃុំជីខលើ ស្រុកស្រែអំបិល ខេត្តកោះកុង ដែលមានចម្ងាយប្រមាណ៧គីឡូម៉ែត្រ។
សមត្ថកិច្ចនគរបាលម្នាក់ដែលកំពុងតែយាមការពារសណ្តាប់ធ្នាប់នៅខណៈដែលប្រជាពលរដ្ឋជាង១០០នាក់កំពុងតែដង្ហែក្បួនអហិង្សានោះ បានមានប្រសាសន៍ថា ៖ «អត់មានប៉ះពាល់ទេ តាមដងផ្លូវអត់មានអី»។
លោក អំ សំអាត ជាប្រធានក្រុមស៊ើបអង្កេតនៃអង្គការការពារសិទ្ធិមនុស្សលីកាដូ បានមានប្រសាសន៍ថា ៖ «សូមកោតសរសើរនូវឆន្ទៈរបស់ប្រជាពលរដ្ឋដែលមានស្មារតីភ្ញាក់រឭកក្នុងការចូលរួមប្រារព្ធពិធី ១០ ធ្នូនេះ»។
គ្រួសារប្រជាពលរដ្ឋចំនួនជាង៤០គ្រួសារ នៅក្នុងភូមិព្រែកជីក ឃុំជីខក្រោម ស្រុកស្រែអំបិល ខេត្តកោះកុង បានរងការរឹបយកដីធ្លីកសិកម្មនិងដីធ្លីផ្ទះសម្បែងចំនួន២០០ហិកតា កាលពីខែតុលា កន្លងទៅថ្មីៗនេះ ក្រោមអំណាចនៃសាលក្រមរបស់តុលាការកំពូលប្រទេសកម្ពុជា ដែលបានរឹបយកដីធ្លីទាំងនោះប្រគល់ឲ្យទៅក្រុមហ៊ុនឯកជនចំនួន២ គឺក្រុមហ៊ុនសុខហុង និងក្រុមហ៊ុនហេងហ៊ុយ បានប្តឹងផ្តល់គ្នាដណ្តើមយកដីធ្លីនៅទីនោះ។
ក្រៅពីការដង្ហែក្បួនរបស់ប្រជាពលរដ្ឋជាង១០០នាក់ខាងលើនេះ អង្គការការពារសិទ្ធិមនុស្សលីកាដូ បានប្រកាសឲ្យដឹងថា ប្រជាពលរដ្ឋខែ្មរជាង១ម៉ឺននាក់នៃសហគមន៍នានា នៅទូទាំងប្រទេសកម្ពុជា ប្រារព្ធខួបលើកទី៦១ នៃទិវាសិទ្ធិមនុស្ស ១០ ឆ្នូនេះ ក្នុងនោះមានសហជីព កសិករ អ្នកនេសាទ យុវជន តន្រ្តីករ អ្នកបើកបរទុកទុក អ្នករត់ម៉ូតូឌុបនិងសកម្មជននៃអង្គការក្រៅរដ្ឋាភិបាលមួយចំនួនទៀត៕